Manugtudlu 2 - Hanunuu

Ti Kabayaan Unman may Pulus

¹ Sinubukan niku magpakasulung sa kang sadili kagustuhan hampay maalaman niku nu hintay ti mayad sa buhi. Dapat naisip niku inda unman diman may pulus.

² Ti pagkasari ag pagbaya kalukuhan ag unman may pulus.

³ Sinubukan niku magpakasulung sa panab-anan pag-inum intus. Sinubukan niku mamwat kalukuhan dapat kang kadunungan magpigil di sa kang isip. Nag-isip aku barang imaw inda ti pinakamayad buwatun manga tawu sa kay dag-ud pag buhi sitay sa kalibutan.

⁴ Nagbuwat aku daraka pag manga bagay: namatindug aku kang manga balay ag nantanum manga ubas.

⁵ Nagpabuwat aku manga taranuman ag pinatanuman niku inda manga tuhay-tuhay pag kalasi manga burak kayu.

⁶ Nagpabuwat aku manga bubun hampay padanman kang tanman.

⁷ Nanmili aku manga panawuhun lalaki ag babayi, may manga panawuhun diman aku manga nianak sa kang balay. Aku ti may pinakamayamu manga hayup sa tanan mag-uli sa Hirusalim.

⁸ Mayamu kang natipun manga gintu, manga pilak ag tuhay waya pag manga kayamanan ginan sa manga hari hanggan sa kang nasakupan pag manga rugar. Mayamu kang manga manugkanta lalaki ag babayi, ag mayamu diman kang asawa — imaw ti kabayaan manga lalaki.

⁹ Aku ti pinakamayaman pag tawu magkabuhi sa buu Hirusalim ag parargu di kang kadunungan.

¹⁰ Bin-ul niku ti una hintay kang pagkaibgan. Binwat niku ti una hintay ti makapasulung sa kangku. Masulung gid aku sa tanan niku manga binuwat, ag imaw inda kay suhul sa tanan niku binudlayan.

¹¹ Dapat pagka inisip niku mayad ti tanan niku manga binuwat, naisip niku inda tanan unman may pulus; ga parihu lang sa maglagas aku durus. Unman gid may pulus ti tanan niku binudlayan sitay sa kalibutan.

¹² Hintay waya nguna ti mabuwat dumasun pag hari? Hintay waya lugud, nu unman ti nabwat diman kaybi sa kabag-u. Sinubukan diman niku ipaparihu ti kadunungan ag ti kalukuhan.

¹³ Ag nakitan niku mayad ti kadunungan kaysa kalukuhan, katunda diman ti karayawan mayad waya kaysa kadudulman.

¹⁴ Ti madunung pag tawu alam nu naan tag kay patabgan, dapat ti kurang sa intindi maglakaw sa kadudulman. Dapat naisip niku usa lang kanda patabgan, ti kamatayan.

¹⁵ Nakan magkumun aku sa kang sadili, “Nu hintay ti mangyari sa unman may intindi imaw diman ti mangyari sa kangku. Nakan unu ti mab-ul niku pag kaayadan sa kang pagkamadunung? Unman diman inda may pulus!

¹⁶ Kita tanan, madunung man ngatay unman may intindi, mamatay sa uryan, ag parihu lang malimtan.”

¹⁷ Nakan pagkadat-an niku ti buhi, dahil ti manga buruwatun sitay sa kalibutan magdara lang sa kangku kakurian. Inda tanan unman may pulus; ga parihu lang sa maglagas aku durus.

¹⁸ Pagkadat-an niku ti tanan binudlayan niku sitay sa kalibutan, dahil tayakan lang diman waydi niku inda sa tawu umilis sa kangku.

¹⁹ Ag si unu ti nakaalam nu madunung inda pag tawu ngatay unman may intindi? Dapat una unu waya siya, siya diman ti mangapu sa tanan niku binudlayan sa buu niku kabisugan ag kadunungan. Unman diman inda may pulus!

²⁰ Nakan maghinayang aku sa tanan niku binudlayan sitay sa kalibutan.

²¹ Dahil una waya mamudlay kawu sa buu nimu kadunungan ag kakayahan, tayakan diman waydi nimu ti tanan binudlayan sa tawu balaw nagbudlay para sa inda. Unman diman inda may pulus, ag balaw makatadlungan.

²² Hintay lugud ti mab-ul tawu sa kay magbudlay ag magsikap sitay sa kalibutan?

²³ Ti tanan pagbuwatun niya sa buu niya buhi magpadaut lang sa kay nalub-anan. Nakan una sa yabi unman makapahari kay naisipan. Unman diman inda may pulus!

²⁴ Ti pinakamayad buwatun tawu imaw ti pagkaun, pag-inum, ag ti pagpakasulung sa kay binudlayan. Ag naisip niku inda ginan diman sa Diyus,

²⁵ dahil kabitay kita makakaun ag makabaya sa kanta binudlayan nu unman inda pag-ipakaun Diyus?

²⁶ Sa kay tutuu, pagpakan-an Diyus kadunungan, hanggan kaalaman ag kabayaan ti magpakaun kasulungan sa kanya pag tawu. Dapat ti manga makasalanan pagpabudlayun niya sa kakatipun kayamanan, hampay kanda matipun iayaw niya sa manga tawu magpakaun kabayaan sa kanya. Ti pangabudlay manga makasalanan unman diman may pulus; ga parihu lang sa maglagas sida durus.