Manugtudlu 12 - Hanunuu

¹ Alalahana kanmu Manuglalang habang anak waya kawu, sa unman waya magras-ug ti udas kakurian ag sumabi kawu, “Unman aku magbaya sa kang buhi.”

² Alalahana nimu siya bag-u misalup ti init, bag-u dumulum ti bulan hanggan ti manga pamgasan, bag-u makubkub kawu madamul pag rurum.

³ Rumas-ug ti sirang kanmu manga kamang mangurug ag kanmu manga tuud manlumuy. Kanmu manga ngipun unman yi makatalta dahil pira wadi, kanmu manga mata unman yi makakit mayad.

⁴ Kanmu manga tuli unman yi makadnug mayad, una ingay galingan ngatay uni manga manuk ngatay karantahan udyi nimu masaydan.

⁵ Magkadala yi kawu magdayik sa abwat pag rugar ngatay maglakaw usa-usa sa karsada. Manlagti yi kanmu manga buhuk ag madura yi kanmu kabisugan hanggan manga pagkaibgan. Aban sa uryan, atabug yi kawu sa kanmu ulian unman may katapusan, ag mayamu ti manrukuan sa kanmu sa manga karsada.

⁶ Nakan alalahana ti Diyus habang buhi waya kawu, habang unman waya magkabugtas ti tarikada pilak ag unman waya magkagipak ti sukadan gintu, ngatay unman waya magkabugtas ti higut banga pansaruk sa bubun, ag magipak ti banga.

⁷ Nu katunda, bumalik kawu sa daga nu naan kawu ginan, ag kanmu ispiritu bumabalik sa Diyus imaw ti nagpakaun inda.

⁸ Aku ti manugtudlu magkumun, “Unman gid may pulus! Unman gid may pulus ti tanan!”

Galanga ag Sunda ti Diyus

⁹ Tuhay waya sa madunung inda pag manugtudlu, pagtudluan diman niya ti manga tawu tungkul sa kay naalaman. Inadalan niya kaayad ti mayamu pag manga sanglitan kay banggitun sitay.

¹⁰ Sinubukan niya gamitun ti kang-ud pag manga pamagaw, ag kay manga isinurat sitay kang-ud ag tutuu.

¹¹ Ti manga pamagaw madunung pag tawu parihu sa maybahad pag sugkud pag gamitun sa paggiya sa manga manada, ag parihu diman inda sa paku magdulut mayad. Ipinakaun inda Diyus, imaw kanta manug-alaga.

¹² Anak, pag-aman kawu inda waya pag usa ka bagay: Ti magsurat manga ribru unman may katapusan, ag ti subra pag adal makabudlay.

¹³ Taynguna nabasa nimu inda tanan, inda kang uryan patigayun: Paggalang kawu sa Diyus ag sunda kay manga sugu, dahil imaw inda ti katungkulan kada tawu.

¹⁴ Dahil sintinsiyahan Diyus ti tanan nita pagbuwatun, mayad aw ngatay daut, hanggan ti manga pagbuwatun nita sa lihim.