Manugtudlu 11 - Hanunuu

Ti Buruwatun Madunung pag Tawu

¹ Nigusyuhan kanmu kuwarta hampay sa uryan may kitaun kawu.

² Ayaw-ayawa kanmu kuwarta sa nanuhay-tuhay pag nigusyu, dahil unman nimu alam nu hintay pag kakurian ti rumas-ug sa kalibutan.

³ Nu madamul ti rurum, magkauran yi. Nu naan pag magpu ti kayu, ati lang pag pumirmaminti tida.

⁴ Nu pirmi lang kawu mag-alagad marinu pag panahun, unman kawu makatanum, unman diman may anihun.

⁵ Nu kabitay balaw nimu magkaalaman ti palakaw durus ngatay nu kabitay kay magdaka ti lapsag sa tiyan niya ina, katunda diman ti pagbuwatun Diyus, ti nagbuwat tanan pag bagay, balaw diman nimu inda masalman.

⁶ Pagtanum kawu buu sirang, dahil balaw nimu alam nu manubu tanan ngatay kay iba lang.

⁷ Pagmasulung kita sa kanta buhi, parihu sa kanta magbaya sa marayaw.

⁸ Nu malawig kanmu buhi, pagbaya kawu. Alalahana nimu, rumas-ug ti malawig pag udas kamatayan. Inda tanan ti magpangyari unman may kabuluhan.

⁹ Kamu pag kalay-awan, pagbaya kamu habang anak waya. Buwata niyu kanyu pagkaibgan buwatun, dapat alalahana niyu parusahan kamu Diyus angay sa kanyu binwat.

¹⁰ Danga kamu magkaarimputu ngatay magkaruku dahil ti panahun kalay-awan maglawuy lang.