Manugtudlu 10 - Hanunuu

¹ Ti namatay pag langaw magpabawu sa usa ka pamanglu, katunda diman ti diit pag kalukuhan, magdaut sa kadunungan ag kadayawan.

² Ti madunung pag tawu magkaibug bumuwat mayad, dapat ti unman may intindi pag tawu magkaibug bumuwat daut.

³ Una sa maglakaw unman may intindi pag tawu, mag-akitan unman siya may kadunungan ag pag-ipakakit sa tanan kay kalukuhan.

⁴ Nu nangisug sa kanmu ti usa ka takinan, danga kawu kadaka magbul-iw sa kanmu katungkulan, nu balaw kawu mangingay, barang patawadun di niya kawu una waya kabitay kabuyat kanmu nabwat kasalanan.

⁵ May usa waya ka balaw mayad pag bagay ti nakitan niku sitay sa kalibutan, inda pagbuwatun lang manga takinan:

⁶ Ti manga unman may intindi pagpakan-an abwat pag katungkulan, dapat ti manga mayaman pagpakan-an lang ababa pag katungkulan.

⁷ Nakitan diman niku ti manga panawuhun masakyan sa kabayu habang ti may kadayawan pag manga tawu maglakaw lang parihu sa manga panawuhun.

⁸ Nu mangutkut kawu kali, barang kawu ti malagpak siti. Nu lumapus kawu sa ukang alad batu, barang kagtun kawu ulay.

⁹ Nu mamuil kawu batu, barang kawu ti madugsakan tunda. Nu manaris-ak kayu kawu, barang mabiyagan kawu.

¹⁰ Nu mapuru kanmu wasay ag unman nimu inda pag-asaun, mamurus kawu sa kusug sa paggamit tunda. Palabi gid nu madunung kawu, dahil sa panab-anan inda manalu kawu.

¹¹ Unman may pulus ti kakayahan nimu sa pagpahugup ulay nu kagtun diman niya kawu.

¹² Ti pagbagawun madunung pag tawu makapakaun sa kanya kaayadan, dapat ti manga pagbagawun unman may intindi pag tawu makapadamhak sa kanya.

¹³ Sa kabag-u di waya kalukuhan yi kay manga pagbagawun, sa uryan daut yi gid, ga unman yi siya sa kay sadili.

¹⁴ Ag unman siya mag-apas magbagaw. Unman may nakaalam tungkul sa manga mangyari sa patabgan, nakan unman may makasabi nu hintay ti mangyari nu kita tigbak yi.

¹⁵ Ti unman may intindi magkagasa magtarabahu, nakan mag-isip siya dayi lang mangatag sa banwa agud manarabahu.

¹⁶ Kaawaawa ti usa ka nasyun kay hari anak buut ag kay manga takinan lunsay karan-an ti pagbuwatun.

¹⁷ Dapat mapalad ti nasyun kay hari nianak may kadayawan pag lahi ag kay manga takinan mag-alistu lang karan-an sa hustu pag udas hampay sa ikabisug ag balaw sa ikalangu.

¹⁸ Pagpabay-anan bugyahin kay balay magtiktik tugka sa madaut yi ti buu balay niya.

¹⁹ Ti karan-an hanggan inuman makapakaun kabayaan sa tawu, ag ti kuwarta makapakaun tanan niya pangailangan.

²⁰ Danga nimu pagsaadi ti hari una sa isip lang ngatay ti mayaman una sa lihim lang, dahil barang may manultul inda sa kanda.