Manugtudlu 1 - Hanunuu

Unman may Pulus ti Tanan

¹ Imaw inda ti manga pagsabihun usa ka manugtudlu kay anak ni Dabid ag hari Hirusalim:

² Unman may pulus! Unman gid may pulus ti tanan!

³ Hintay lugud ti mab-ul tawu sa kay magpakabudlay sitay sa kalibutan?

⁴ Maglawuy ti usa ka sinulput ag umilis maan ti usa ka sinulput, dapat ti kalibutan imaw diman.

⁵ Magbutlak ti init, bag-u mag-isalup; magpabalik-balik lang inda sa kay gininanan.

⁶ Mag-uyup ti durus sa salatan bag-u atag sa kanaway; magpalibut-libut lang inda ag magpabalik-balik.

⁷ Ti tanan pag sapa magbulus atag sa dagat, dapat unman inda magkapnu, bag-u magbalik ti danum sa kay gininanan ag magbulus maan inda sa dagat.

⁸ Tunda tanan pag bagay makaburudlay — dayi mitultul pag budlay. Unman magkasawaan kanta mata sa bantay hanggan kanta tuli sa kapatingi.

⁹ Ti manga nangyari kaybi, magpangyari maan taynguna. Ti manga binwat kaybi, pagbuwatun maan taynguna. Unman gid may bag-u manga magpangyari sa kalibutan.

¹⁰ May bagay aw lugud masabi nimu bag-u? Dapat asan yi inda kaybi di waya, una unman waya kita nianak.

¹¹ Unman pag-alalahanun manga tawu ti manga nakalawuy; katunda diman ti aratubangun, balaw diman inda alalahanun manga tawu sa uryan.

Ti Kadunungan Tawu Unman may Pulus

¹² Aku pag usa ka manugtudlu naghari sa Israil, ag sa Hirusalim aku pag nangulian.

¹³ Sa kang kadunungan, inadalan gid niku mayad ti tanan manga magpangyari sitay sa kalibutan. Usa inda ka makaburudlay pag buruwatun ti ipinakaun Diyus irisipun tawu.

¹⁴ Nakitan niku ti tanan manga pagbuwatun tawu sitay sa kalibutan, ag inda tanan unman may pulus; ga parihu lang sa maglagas aku durus.

¹⁵ Ti liku unman nimu matul-id, ag balaw nimu mabilang ti unman.

¹⁶ Magkumun aku sa kang sadili, “Mas madunung aku kaysa tanan naghari sa Hirusalim un-an man sa kangku. Mayamu kang kinaalman.”

¹⁷ Inadalan gid niku mayad ti pagkaiba kadunungan ag kalukuhan, dapat naisip niku inda unman diman may pulus; ga parihu lang sa maglagas aku durus.

¹⁸ Dahil pagka magdugang kang naalaman, magdugang diman kang karukuan.