Malakyas 3 - Hanunuu

¹ Pagpatingi kamu sa pagsabihun Panginuun Makamaskihan, “Ipadara niku kang manugbarita hampay ialistu kang lakawan. Bag-u ti Panginuun kanyu pag-alagdun kadaka rumas-ug sa kay Balay. Rumas-ug kanyu pagpatigagadun pag manugbarita imaw ti mamatigayun sa kang kasunduan.”

^2-3 Dapat si unu lugud ti umagwanta sa sirang niya pagras-ug? Si unu lugud ti umagwanta nu manpakakit yi siya? Dahil parihu siya sa apuy magtunaw sa baul ngatay parihu sa sabun magpalagti. Lumpiyuhun niya ti manga manughandug manga lahi ni Libi parihu sa magtunaw pilak ag gintu, hampay bumaliw matadlung kanda buhi sa kanda maghandug sa Panginuun.

⁴ Nakan makabaya yi ti Panginuun sa manga handug nasakupan Huda ag Hirusalim, parihu sa kabag-u.

⁵ Magkun ti Panginuun Makamaskihan sa manga Israilita, “Rumas-ug aku hampay parusahan kamu. Kumastigus rargu aku sa manga manugsalumangka, sa manga magpanguragin, sa manga magkastigus sa pudil, sa manga maglugi sa mag-upa sa kanda manga manugtarabahu, sa manga mag-api sa buranday babayi ag sa manga ilu, hanggan sa manga magbaliwala sa karampatan manga balaw Israilita mag-ulian kaibahan niyu. Buwatun niku inda sa kanyu sa manga unman magsunud sa kangku.”

Ti Pagpakaun Ikasampulu

⁶ Magkun waya ti Panginuun Makamaskihan, “Aku, ti Panginuun, unman magkauman. Nakan kamu ti manga linahi ni Hakub balaw tanan maruris.

⁷ Parihu kamu sa kanyu manga ginurang; unman kamu nagsunud ag nagtupad sa kang manga surundanun. Kainda, pagbalik kamu sa kangku, sa Panginuun Makamaskihan, ag bumalik aku sa kanyu. Dapat magpaingana waya kamu, ‘Kabitay kami makabalik sa kanmu?’

⁸ Mamaingana waydi aku sa kanyu, mahimu aw lugud ti tawu manakaw sa kangku? Unman mahimu! Dapat kamu, pagtakawan niyu aku. Ag kainda magpaingana waya kamu, ‘Kabitay nimi kawu tinakawan?’ Pagtakawan niyu aku dahil unman kamu mag-ayaw kanyu manga ikasampulu ag manga handug.

⁹ Imaw tunda nu hayga pagsaadan niku kanyu buu nasyun.

¹⁰ Kainda, subuki niyu aku, ti Panginuun Makamaskihan. Daran-a ti buu ikasampulu niyu atag sa balay haramnuan hampay may karan-unun sa kang Balay. Nu tupadun niyu inda, padaran-an niku kamu uran hanggan pakan-an niku kamu mayamu pag papalad.

¹¹ Balaw niku pahintulutan kan-un manga iyay kanyu manga pananum. Hanggan kanyu manga ubas balaw marabak.

¹² Ingarnan kamu mapalad sa tanan pag nasyun, dahil mayad kanyu daga. Aku, ti Panginuun Makamaskihan, ti magbagaw inda.”

¹³ Magkun waya sa kanda ti Panginuun, “Marasakit kanyu pinamagaw tungkul sa kangku. Dapat magpaingana waya kamu, ‘Unu lugud ti pagsabihun nimi tungkul sa kanmu?’

¹⁴ Magkun kamu, ‘Unman may kabuluhan ti magsirbi sa Diyus. Unu lugud kanta matanggap nu tupadun nita kay manga pag-ipabuwat sa kanta? Ag unu kanta matanggap nu manlakaw kita may karukuan sa pagpakakit sa Panginuun Makamaskihan kuntay mag-ampu kita sa kanta manga kasalanan?

¹⁵ Masabi waya ngani nita mapalad ti mayabang pag manga tawu. Sa kay tutuu, sida ti manga magbuwat daut mag-unlad. Una pagsubukan nida ti Diyus unman diman sida pagparusahan.’ ”

¹⁶ Bag-u ti manga maggalang sa Panginuun nanharampangan. Namatingi sa kanda ti Panginuun ag nasaydan niya kanda paghampangan. Isinurat kanda manga ngaran sa ribru ati sa atubangan Panginuun, hampay maalaala niya sida maggalang maaw ag mag-alaala pirmi sa kanya.

¹⁷ Magkun ti Panginuun Makamaskihan tungkul sa manga tawu maggalang sa kanya, “Baliwun niku sida pinakatuhay pag nasakupan sa sirang niku pag parusa. Balaw niku sida parusahan parihu sa pagbuwatun usa ka ama unman magparusa sa kay anak magsunud sa kanya.

¹⁸ Ag makitan maan manga tawu ti pinagkaiba matadlung ag daut, ti pinagkaiba magsunud sa kangku ag ti balaw magsunud.”