Malakyas 1 - Hanunuu

¹ Inda ti bagaw Panginuun para sa manga taga Israil sa panab-anan ni Malakyas.

Pagmahalun Panginuun ti manga Israilita

² Magkun ti Panginuun, “Pagmahalun niku kamu. Dapat magpaingana waya kamu, ‘Kabitay nimu kami kamahal?’ Isipa niyu una magtar-ari sida ni Isaw ni Hakub, pagmahalun niku si Hakub

³ dapat si Isaw unman. Dinaut niku kay manga kabantudan, nakan nagbaliw lang inda ulian manga simarun idu.

⁴ “Nu sumabi ti manga Idumita, ‘Una dinaut kanmi rugar ipatindug di maan nimi inda.’ Aku, ti Panginuun Makamaskihan, magkun: Una ipatindug waya maan nida kanda rugar, dautun di gid niku inda. Ingarnan sida ‘daut pag nasyun’ ag ‘manga nasakupan pirmi pagkagalitan Panginuun.’

⁵ Makitan gid niyu kanda kadamhakan ag sumabi kamu, ‘Makamaskihan ti Panginuun una sa luwas Israil.’ ”

Tinamyaw Panginuun ti manga Manug-asiwa

⁶ Magkun sa manga manughandug ti Panginuun Makamaskihan, “Pag-igalang anak kay ama ag pag-igalang suruguun kay amu. Dapat bati aku kanyu ama ag amu unman niyu pag-igalang? Paglabagun waya niyu aku, bag-u magkun kamu, ‘Kabitay nimi kawu pag linabag?’

⁷ Linabag niyu aku sa panab-anan pagsagda mayagting pag handug sa kang harandugan. Dapat magpaingana waya kamu, ‘Kabitay nagbaliw mayagting kanmi handug?’ Inuringan niyu kanyu manga handug sa panab-anan pagsabi unman may pulus kang harandugan.

⁸ Nakan ngani maghandug kamu sa kangku manga hayup buta, pilay, ngatay may sakit. Balaw tida mayad! Subuki lang niyu ayawi kanyu gubirnadur katida pag kalasi manga hayup. Pihu gid balaw siya makabaya sa kanyu ag balaw niya kamu pakakitan kaayadan.” Inda ti pagsabihun Panginuun Makamaskihan.

⁹ Magkun si Malakyas, “Taynguna, kamu pag manga manughandug, hagadun niyu sa Diyus kaawai niya kita. Dapat sa katida pag manga kalasi handug kanyu pag-isagda sa kanya, pihu gid balaw niya kamu bayaun. Imaw inda ti pagsabihun Panginuun Makamaskihan.”

¹⁰ Magkun ti Panginuun Makamaskihan, “Mana may usa sa kanyu sa manga manughandug ti tumalakup sa manga sabian niku Balay, hampay balaw yi kamu magpamakut unman may pulus pag apuy sa kang harandugan. Balaw niku tanggapun kanyu manga handug, dahil balaw aku magbaya sa kanyu.

¹¹ Sa kay tutuu, pagdayawun manga nasyun kang ngaran, ginan sa butlakan tugka sa isalpan. Una naan pag rugar magtuub ti manga tawu kamangyan ag maghandug malumpiyu pag manga handug sa kangku.

¹² Dapat kamu, pagpakay-ahun niyu kang ngaran magkumun kamu mauring kang harandugan ag unman may pulus ti manga pag-isagda ati.

¹³ Magkun waya kamu magsuku yi kamu sa kanyu maghandug sa kangku, ag pag-ipasipala niyu kang harandugan. Nakan maaw pagsagdahan niyu aku manga hayup may garis, pilay ngatay may sakit. Kanyu aw isip tanggapun niku tunda?

¹⁴ Saadan niku ti magdaya, madi may taratu manhandug kay mayad pag hayup dapat kay ihinandug sa kangku balaw mayad. Saadan niku siya dahil aku ti makamaskihan pag hari ag paggalangun aku manga nasyun. Aku, ti Panginuun Makamaskihan, ti magbagaw inda.”