Lukas 7 - Hanunuu

Pinaayad ni Hisus ti Suruguun Kapitan

¹ Pagka natapus ni Hisus kay tanan paliwanag sa manga tawu magpatingi, nag-atag yi siya sa banwa Kapirnaum.

² May usa ka kapitan manga sundalu taga Ruma, siya may suruguun pagmahalun gid niya ag ti suruguun may sakit, diit wadi siya mamatay.

³ Pagka nadnugan kapitan manga sundalu si Hisus asan yi, pinmasugu siya manga paggurangunun manga Hudiyu tag kan Hisus hampay tabanun nida siya agud paayadun ni Hisus kay suruguun.

⁴ Pagka nagras-ug sida sa kan Hisus, hinampang nida mayad si Hisus magkun, “Awati duy inda pag kapitan, dahil mayad gid siya pag tawu.

⁵ Inda duy pag kapitan magmayad siya sa kanta nasyun, nagpabuwat siya kanta simbahan.”

⁶ Kinmuyug yi si Hisus sa kanda. Pagka balaw yi masyadu arayu siya sa balay, pinmasugu yi maan ti kapitan sa kay manga mahal pag kakilala magkun, “Sabiha niyu, ‘Panginuun, danga yi lang duy kawu magpakibudlay, dahil unman aku may karampatan magpasaka sa kanmu sa kang balay.

⁷ Unman diman waydi may karampatan aku mag-atubang sa kanmu. Dapat bagawa lang nimu bag-u umayad yi kang suruguun.

⁸ Dahil aku usa ka tawu sa sirung makapangyarihan. May manga sundalu waydi sa sirung niku kapangyarihan. Pagka sumabi aku sa usa, “Pag-ati kawu,” umati siya. Magkun aku sa usa, “Abala”, ag pumakarani yi ngani siya. Magkun aku sa kang suruguun, “Buwatun nimu inda,” binwat yi ngani niya.’ ”

⁹ Pagka nadnugan ni Hisus inda, naglingut siya sa kapitan. Napasrangu siya tabug sa kay uryan sa kayamuan tawu magkuyug sa kanya magkun siya, “Pagsabihun niku sa kanyu una sa Israil unman aku may nakitan kainda pagsarig ga kapitan kay kadaka.”

¹⁰ Pagka nuli maan sa balay ti manga sinugu kapitan naras-ugan nida naayadan yi ti suruguun.

Binuhi maan ni Hisus ti Anak Lalaki Buranday

¹¹ Udyi dugay, linmakaw si Hisus tag sa Nain pag banwa. Nagkuyug sa kanya kay manga tuludluan hanggan ti lalu mayamu pag manga tawu.

¹² Pagka arani yi siya sa sanggaan banwa, nasulang niya ti babayi buranday manlubung sa kay usa-usa lang ka anak lalaki namatay. Mayamu ti nagkuyug manuglubung.

¹³ Pagka nakitan siya Panginuun, kinaawan niya ti babayi. Magkun si Hisus, “Danga maglumi duy kawu.”

¹⁴ Nagpakarani si Hisus, kinup-an niya ti saputan bangkay, pinmat-ung ti manga manugyayung. Bag-u sinabi ni Hisus, “Kawu pag kan-akan, kang pagsabihun sa kanmu, pagbangun yi kawu.”

¹⁵ Tinmukaw yi ngani ti namatay, magbagaw yi maan. Bag-u ipinakaun maan siya ni Hisus sa kay ina.

¹⁶ Nadala gid sida tanan. Dinayaw nida ti Diyus magkun, “Nagsitay sa kanta karaw-an ti mamaski pag purupita. Nagsitay ti Diyus hampay iribri niya kay nasyun.”

¹⁷ Nibantug inda pag barita tungkul sa kan Hisus sa bilug daga Hudiya hanggan sa kay manga kalibut pag daga.

Kan Huwan Manugtulbaw Sinugu kay Tuludluan tabug sa kan Hisus

¹⁸ Kan Huwan manga tuludluan nagbarita sa kanya tungkul sa tanan manga pagbuwatun ni Hisus. Pinab-ul ni Huwan ti duwa ka tuludluan niya,

¹⁹ bag-u kay sinugu sida atag sa Panginuun magkun, “Sabiha niyu sa kan Hisus, ‘Kawu aw ngani ti pagsabihun manga purupita kuntay sumitay, aw ngatay mag-alagad waya kami sa iba?’ ”

²⁰ Pagka nagras-ug yi sa kan Hisus ti manga sinugu ni Huwan sinabi nida, “Si Huwan Manugtulbaw ti nagsugu sa kanmi tag sa kanmu hampay kami mamaingana sa kanmu nu kawu aw ngani ti pagsabihun manga purupita kuntay sumitay, aw ngatay mag-alagad waya kami sa iba?”

²¹ Ati katpung nagpaayad si Hisus sa mayamu may makuri pag sakit, sa manga pinakurian labang. Pinaayad diman niya hanggan ti kayamuan manga buta.

²² Nagsagut si Hisus sa manga sinugu ni Huwan magkun, “Pag-uli yi kamu, sabiha niyu sa kan Huwan kanyu nakitan ag nadnugan. Maghiling yi ti manga buta, maglakaw yi ti manga pilay, naayadan yi ti may manga dilikadu pag sakit sa lukub, magdungug yi ti manga bungul, nabuhi maan ti manga namatay, pag-iadal sa manga pugri ti Mayad pag Barita.”

²³ Magkun si Hisus, “Papaladan Diyus ti tawu nu unman mag-alinlangan siya sa kangku.”

²⁴ Pagka nuli yi kay manga sinugu ni Huwan, nag-umpisa magbagaw si Hisus sa kayamuan tawu tungkul sa kan Huwan magkun, “Kanyu nag-ati sa pangawakawaan tag sa kan Huwan hintay kanyu hinanap? Usa ka bahi aynu aw pagtandugun durus?

²⁵ Kanyu nag-ati hintay ngani kanyu hinanap? Nanduaw lang aw kamu sa tawu marinu kay rutay? Ti manga may rutay marinu, kay kahamtangan masyadu aduk gid, ati kabay sida pag mag-uli sa balay manga hari.

²⁶ Kanyu ngani nag-ati hintay kanyu hinanap? Purupita aw? Hu ngani duy. Dapat kang pagsabihun sa kanyu, balaw lang purupita siya.

²⁷ Dahil may nisurat sa Banal Kasuratan tungkul sa kanya magkun, ‘Inda yi kang sinugu ipinauna sa kanmu, ialistu niya kanmu lakawan.’”

²⁸ Magkun si Hisus, “Kang pagsabihun sa kanyu, si Huwan lalu mahalaga man sa tanan tawu nianak sa babaw daga. Dapat ay ti pinakamababa pag tawu nu pagharian siya Diyus lalu man mahalaga sa kan Huwan.”

²⁹ Ti kayamuan tawu una manga manunukut buhis namatingi gid sa kan Hisus adal. Tinupad waydi nida ti kagustuhan Diyus pagka sida napatulbaw sa kan Huwan.

³⁰ Dapat ti manga Parisiyu hanggan ti manga manugtudlu Kasuguan nagpalamada lang sa turunu Diyus, unman napatulbaw sa kan Huwan.

³¹ Magkun si Hisus, “Naan pag ipaparihu niku ti manga tawu taynguna, kabitay pag misunu sa kanda?

³² Sida ga manga anak matukawan sa palingkihan, magtarawagan magkun, ‘Nagpalawta kami sa kanyu, dapat unman kamu nagtaruk. Nag-ambahan yi kami pabilin, dapat unman kamu nanlumi.’

³³ Dahil si Huwan Manugtulbaw nagsitay, unman maghandum karan-unun, unman diman mag-inum siya maisug pag irinmun. Dapat pagbangdanan niyu inapuan siya labang.

³⁴ Aku diman, ti Anak Tawu, nagsitay magkaun di mag-inum, dapat kanyu pagbangdanan mahugud sa karan-an palalangu, mag-ampud siya sa manga manunukut buhis, sa manga makasalanan.

³⁵ Dapat ti kadunungan Diyus pagpatutuuhanan tanan manga magpasakup sa kanya.”

Si Hisus Nanabang sa Balay ni Parisiyu Simun

³⁶ Bin-ul si Hisus usa ka Parisiyu hampay mangaun. Nag-ati ngani si Hisus sa balay Parisiyu ag nagpakarani sa lamak.

³⁷ Ati sa banwa may babayi makasalanan. Pagka naalaman niya si Hisus ati sa balay Parisiyu, nag-ati diman siya may dara pamanglu isinukad sa garapa. Alabasturu pag batu ti binwat garapa.

³⁸ Tinmindug ti babayi sa aday-an ni Hisus, arani sa kay lulud, maglumi siya. Natiktikan niya luwa kay lulud ni Hisus, bag-u pinayid niya buhuk. Inarkan niya kay lulud ni Hisus ag pinayidan waya pamanglu.

³⁹ Siyun diman ti Parisiyu ti nagbuul sa kan Hisus. Pagka nakitan niya ti binwat babayi, inisip niya, “Nu tutuu purupita inda pag tawu, alam gid mana niya nu si unu ag nu hintay pag kalasi babayi siya tigpayid sa kay lulud, dahil makasalanan pag babayi siya.”

⁴⁰ Sinmabi si Hisus magkun, “Simun, may isabi aku sa kanmu.” Magkun si Simun, “Sabiha yi nimu duy, Maisturu.”

⁴¹ Sinabi ni Hisus, “May usa ka nagpautang duwa ti nangutang sa kanya. Kay usa nag-utang lima ka gatus pisus, kay usa bay limampulu ka pisus.

⁴² Pagka udyi makabayad sida, parihu pinatawad yi lang niya sida. Taynguna, hintay sa kanda duwa ti lalu magmahal sa kanya?”

⁴³ Sinmagut si Simun magkun, “Sa kang isip duy, ti may utang daka.” Sinabi ni Hisus sa kan Simun, “Tama duy kanmu sinabi.”

⁴⁴ Nag-aliwliw si Hisus sa babayi bag-u sinabi niya sa kan Simun magkun, “Mag-akitan aw nimu inda pag babayi? Nagsaka aku sa kanmu balay, unman tinigan-an nimu aku danum para maiugas kang lulud. Bati ti babayi binasa niya luwa kang lulud, bag-u pinunas niya buhuk.

⁴⁵ Unman inarkan nimu aku. Inda bay pag babayi ginan sa kang nagsaka ud nag-apas kay aruk sa kang lulud.

⁴⁶ Unman pinayidan nimu hanggan kang ulu lana. Dapat pinayidan ngapu niya pamanglu kang lulud.

⁴⁷ Kang pagsabihun duy sa kanmu, pinatawad yi kay manga kasalanan una mayamu, nakan daka gid ngani kay pagmahal. Dapat nu diit lang ti pinatawad, diit waydi kay pagmahal.”

⁴⁸ Bag-u sinabi ni Hisus sa babayi, “Pinatawad yi duy kanmu manga kasalanan.”

⁴⁹ Kay manga kaibahan sa karan-an nag-isip-isip yi sa kanda sadili, “Hintay inda pag tawu hayga makapatawad diman siya manga kasalanan?”

⁵⁰ Sinabi ni Hisus sa babayi, “Ribri yi kawu dahil sa kanmu pagsarig. Danga yi magkaaburidu, pag-uli yi kawu.”