Lukas 5 - Hanunuu

Pinili ni Hisus Kay Un-an pag manga Tuludluan

¹ Pagka matindugan si Hisus sa saruy danaw Ginisarit, pagsiutun siya kayamuan tawu, dahil magkaibug gid sida mamatingi Bagaw Diyus.

² May nakitan siya duwa ka duunduun ati sa saruy danaw. Nagdugsun yi ti manga manugdagat ag pag-ugasan yi nida kanda manga sarap.

³ Nagsakay si Hisus sa kan Simun duunduun, bag-u sinabi niya sa kan Simun, “Pakatang-katang duy diit ginan sa saruy.” Tinmukaw si Hisus sa duunduun bag-u nagtudlu siya sa kayamuan tawu.

⁴ Pagka natapus kay tudlu, sinabi niya sa kan Simun, “Pag-ati duy kamu sa lawud, ilagpak yi niyu kanyu manga sarap, hampay makablay kamu.”

⁵ Nagsagut si Simun magkun, “Maisturu, usa ka yabi kanmi pabudlay unman may nablay kami. Dapat dahil sa kanmu bagaw ilagpak niku ti manga sarap.”

⁶ Pagka ilinagpak nida kanda manga sarap, nakablay sida kaduruhan isda, magkagitas yi kanda manga sarap.

⁷ Pinaypayan nida kanda manga kaibahan sa usa ka duunduun hampay awatan sida. Nagpakarani ngani sida, napnu ti duwa ka duunduun nagliing yi sa buyat isda.

⁸ Pagka nakitan ni Simun Pidru ti nangyari, nagluhud siya sa atubangan ni Hisus ag magkun, “Pagpakarayu duy kawu Panginuun sa kangku ginan, dahil makasalanan aku.”

⁹ Siya hanggan kay tanan manga kaibahan naglingut gid dahil masyadu mayamu kanda nablay isda.

¹⁰ Naglingut diman hanggan kay manga anak ni Sibidiyu sida ni Santiyagu ag ni Huwan kay manga kaibahan. Sinabi ni Hisus sa kan Simun, “Danga magkadala kawu, dahil taynguna ginan manugtaban yi kawu sa manga tawu.”

¹¹ Pagka ipinadagsa yi nida kanda manga duunduun sa baybay, tinayakan nida ti tanan-tanan, bag-u nagkuyug ngani sida sa kan Hisus.

Pinaayad ni Hisus ti Usa ka Tawu may Dilikadu pag Sakit sa Lukub

¹² Pagka sa usa ka banwa si Hisus, may nakitan siya usa ka lalaki tupus dilikadu pag sakit sa lukub kay bilug. Pagka nakitan niya si Hisus napadapa siya nagpakihampang sa kanya magkun, “Duy, nu gustu nimu, mapaayad nimu aku sa kang dilikadu pag sakit sa lukub hampay kilalan-un aku malumpiyu.”

¹³ Ikinupa ni Hisus kay kamang sa kanya, magkun, “Gustu ngani niku duy, pagmaayadan yi kawu sa kanmu sakit sa lukub.” Kadaka nabul-an siya sakit sa lukub.

¹⁴ Nagbilin si Hisus sa kanya, “Danga pagsabiha nimu inda una sa kantapu pag tawu. Pag-ati kawu pagpakakit kawu sa manughandug. Bag-u pagdara kawu hayup handug sa Diyus angay sa kay bilin ni Muysis, bilang usa ka puruyba sa manga tawu nag-ayad yi kawu.”

¹⁵ Dapat lalu nilantag ti barita tungkul sa kan Hisus. Nakan lalu nagtipun ti mayamu pag tawu hampay makadnug, ag hampay paayadun niya kanda manga sakit.

¹⁶ Dapat pirmi mag-ati si Hisus sa pangawakawaan hampay magdarangin.

Pinaayad ni Hisus ti Tawu Lunu

¹⁷ Pagka dugay nagtudlu maan si Hisus. May manga matukawan ati manga Parisiyu hanggan manga manugtudlu Kasuguan, nagluwang sida ginan sa kada banwa sa Galiliya hanggan Hudiya ag hanggan ginan sa Hirusalim. Ti kapangyarihan Panginuun lubus sa kan Hisus hampay paayadun ti may manga sakit.

¹⁸ May manga tawu nagdara ti usa ka lalaki lunu sa duyan. Pinilit mana nida ipasaka siya sa balay, ibugtang mana sa atubangan ni Hisus.

¹⁹ Sa unman may nakitan sida lakawan dahil sa kayamuan tawu, bag-u sida nagdayik sa atup linukaban nida diit bag-u itinuntun nida ti lunu sa basad duyan, bag-u pinadna siya sa karaw-an manga tawu sa atubangan ni Hisus.

²⁰ Pagka nakitan ni Hisus kanda pagsarig, sinabi niya sa lunu magkun, “Pinatawad yi duy kanmu manga kasalanan.”

²¹ Dapat ti manga manugtudlu Kasuguan hanggan ti manga Parisiyu nanharampangan yi magkun, “Hintay nguna inda pag tawu, hayga palabi-labihun siya sa Diyus? Unman may makapatawad sa kasalanan nu unman ti Diyus lang.”

²² Alam di ni Hisus kanda pagkutubun, nakan sinabi niya sa kanda, “Hayga lugud kamu maglingut sa kangku kanyu naisipan?

²³ Hintay nguna ti lalu malpus sabihun ngatay, ‘Ipinatawad yi kanmu manga kasalanan’, aw ngatay ‘Pagtindug kawu paglakaw yi.’

²⁴ Ipakakit niku sa kanyu ti puruyba hampay maalaman niyu ti Anak Tawu may kamaskihan sitay sa babaw daga makapatawad sa tawu may kasalanan.” Bag-u sinabi niya sa tawu lunu magkun, “Pagsabihun niku sa kanmu, pagtindug yi duy kawu, daran-a kanmu igyaan, pag-uli yi kawu sa kanmu balay.”

²⁵ Kadaka tinmindug ti lunu sa kanda magbantay, dinara yi ngani kay amak. Nuli siya sa kay balay magdayaw sa Diyus.

²⁶ Nadulaw gid masyadu ti manga tawu. Nadala sida, nagdayaw gid sa Diyus magkun, “Taynguna nakitan gid nimi ti makadululaw pag manga buwat.”

Kay Tinawagan ni Hisus si Libi

²⁷ Pagka dugay nagluwas si Hisus sa balay, nakitan niya si Libi pag manunukut buhis matukawan sa suruktan buhis. Sinabi ni Hisus sa kanya magkun, “Pagkuyug duy kawu sa kangku.”

²⁸ Tinmindug si Libi tinayakan niya ti tanan niya buruwatun bag-u kinmuyug ngani sa kan Hisus.

²⁹ Binulwatan siya ni Libi daka pagka karan-an sa kay balay. Mayamu pag manga manunukut buhis ag manga iba waya tawu nagkaminsan sa karan-an.

³⁰ Ti manga Parisiyu hanggan manga manugtudlu Kasuguan nagsungyaw sa kay manga tuludluan ni Hisus magkun, “Hayga duy kamu magkaun mag-inum minsan sa manga manunukut buhis hanggan sa manga makasalanan?”

³¹ Dapat si Hisus ngap ti sinmagut magkun, “Unman may kailangan sa manugbulung ti balaw may manga sakit, ti may manga sakit lang ti may kailangan.

³² Unman aku nagsitay hampay magtaban sa manga matadlung tabug sa pag-ampu sa kasalanan. Nakan aku nagsitay hampay manaban sa manga makasalanan tabug sa pag-ampu sa kanda manga magbuwat daut.”

Tungkul sa Unman Maghandum sa Karan-unun

³³ Sinabi nida sa kan Hisus, “Ti manga tuludluan ni Huwan malagat unman maghandum karan-unun kanda magdarangin sa Diyus. Katunda diman ti manga tuludluan manga Parisiyu. Bati kanmu manga tuludluan magkaun diman mag-inum.”

³⁴ Nagsagut si Hisus, “Mahimu aw nguna unman maghandum karan-unun ti manga binan-awan sa pamasaruhan nu kaibahan waya nida ti lalaki ipinasaru?

³⁵ Dapat aban bul-un siya ginan sa kanda. Nu udyi siya sa kanda bag-u di sida unman humandum karan-unun.”

³⁶ Itinultul ni Hisus inda pag pahalimbawa magkun, “Unman may maggitas bag-u lambung ilupun sa daan, dahil nu tida kay buwatun, dinaut niya kay bag-u lambung. Ti bag-u panlupun dayu diman umangay sa daan.

³⁷ Unman may magsukad bag-u intus ubas sa daan pag manga paknul pag sukadan. Nu abi katunda ti buwatun, mabusni bag-u intus ti daan paknul. Mauyang ti intus ubas ag madaut yi lang ti manga sukadan.

³⁸ Nu bag-u intus ubas kailangan sa bag-u waydi pag sukadan.

³⁹ Unman waydi may tawu nu nakainum siya hinamnu pag intus, magkasulung waya sa kay bag-u. Kumumun siya, ‘Mahal waya ti hinamnu.’ ”