Lukas 4 - Hanunuu

Pagtuksuhun mana si Hisus

¹ Pagka itinulbaw si Hisus, lubus sa kanya ti Ispiritu Banal, bag-u linmakaw siya ginan sa sapa Hurdan. Bag-u giniyahan siya Ispiritu tabug sa pangawakawaan.

² Sa sulud upatpulu ka sirang pagtuksuhun siya diyablu. Sa sulud upatpulu ka sirang unman siya may kinaun una hintay pag karan-unun, nakan linun-us siya.

³ Bag-u sinabi diyablu sa kan Hisus, “Nu kawu ungud ti Anak Diyus, bagawi tunda pag batu, hampay bumaliw tinapay.”

⁴ Sinabi ni Hisus, “Nakasurat sa Banal Kasuratan magkun, ‘Balaw lang sa karan-unun pag mabuhi ti tawu.’”

⁵ Bag-u dinara diyablu si Hisus sa abwat pag rugar ag pinausdung siya nakitan niya sa ngalay-ngalay lang ti tanan-tanan kaharian sa babaw daga.

⁶ Bag-u sinabi diyablu sa kanya, “Ipakaun niku sa kanmu ti tanan kapangyarihan tunda hanggan kay kadayawan, dahil ipinakaun tunda sa kangku. Kang maan ipakaun una sa kantapu kang magustuhan.

⁷ Nakan ngani nu kawu sumamba sa kangku, sa kanmu yi tabug tanan-tanan tunda.”

⁸ Sinabi ni Hisus, “Nakasurat sa Banal Kasuratan magkun, ‘Sambahun nimu ti Diyus, imaw kanmu Panginuun, siya lang ti dapat nimu sirbihan.’”

⁹ Bag-u dinara diyablu si Hisus tabug sa Hirusalim ipinauli sa babaw bubung Balay Diyus. Magkun ti diyablu sa kanya, “Nu kawu ti Anak Diyus, palagpak kawu ginan sa tungud atag sa sirung.

¹⁰ Dahil nakasurat sa Banal Kasuratan magkun, ‘Bilinan Diyus kay manga anghil tungkul sa kanmu agud kawu kanda alagaan.’

¹¹ May sabi waya inda magkun, ‘Sambutun kawu nida kamang barang madayaan kawu sa batu.’”

¹² Sinabi maan ni Hisus magkun, “Nagsabi diman ti Diyus, ‘Danga pagsubuki nimu ti Diyus, imaw kanmu Panginuun.’”

¹³ Pagka natapus diyablu tanan-tanan tuksu, kay tinayakan dapu si Hisus hanggan sa taning pag udas.

Nag-umpisa si Hisus Kay Buruwatun sa Galiliya

¹⁴ Binmalik maan si Hisus sa Galiliya lubus sakup sa kapangyarihan Ispiritu. Nibantug siya sa tanan rugar.

¹⁵ Nagtudlu siya sa manga tawu sa simbahan manga Hudiyu, ag pagdayawun siya nida tanan.

Unman Tinanggap si Hisus manga Taga Nasarit

¹⁶ Nag-ati diman si Hisus sa Nasarit sa kay kinadak-anan pag banwa. Ga kay diman ugali nu sa Sirang Pamahari, sinmaka siya sa simbahan manga Hudiyu. Nagtindug siya hampay mamasa Banal Kasuratan.

¹⁷ Itinunghul sa kanya ti ribru ni Purupita Isayas. Pagka binuklad niya ti ribru, hinanap niya ti bagaw ginan sa Banal Kasuratan magkun,

¹⁸ “Ti Ispiritu Panginuun nangulian sa kangku, dahil pinili niya aku hampay magtudlu Mayad pag Barita sa manga pugri. Sinugu niya aku hampay ibarita sa manga sa pirisuhan sida makaribri, hanggan sa manga buta sida humiling, ag hampay iribri ti manga naapi.

¹⁹ Hampay ipahayag kuntay inda yi ti kaudasan kay magparibri Panginuun sa kay nasyun.”

²⁰ Bag-u linulun ni Hisus ti ribru balunbun, kay maan inuli sa manug-asikasu, bag-u siya tinmukaw hampay mamaliwanag. Ti tanan tawu sa basad simbahan manga Hudiyu maggagad yi sa kay paliwanag.

²¹ Bag-u nagtultul siya sa kanda magkun, “Taynguna sa kanyu magpatingi natupad yi inda pag Kasuratan.”

²² Sida tanan nagdayaw gid sa kanya, naglingut dahil marinu gid kay binagaw. Magkun sida, “Bukun aw lugud inda kan Husi lang pag anak?”

²³ Magkun siya sa kanda, “Pihu gid sumabi kamu sa kangku inda pag pahalimbawa, ‘Manugbulung, bulunga duy nimu kanmu sadili bilug.’ Sumabi waydi kamu sa kangku, ‘Una hintay kanmi nadnugan kanmu binwat ati sa Kapirnaum, buwata diman nimu sitay sa kanmu sadili banwa.’ ”

²⁴ Magkun si Hisus, “Ungud duy kang pagsabihun sa kanyu, unman may purupita pagbayaun sa kay nagkalusadan pag daga.

²⁵ Dapat tutuu kang pagkumnun sa kanyu, sa kay di waya purupita si Ilyas nangulian sa Israil, katpung unman inmuran sulud tulu ka timpu may tunga, mayamu diman ti manga babayi buranday katpung masyadu ti lun-us sa buu nasyun.

²⁶ Balaw sinugu Diyus si Ilyas una sa kantapu sa manga buranday sa Israil nu unman ati waya ngap tag sa usa ka babayi buranday balaw Hudiyu sa banwa Saripta sa daga Sidun.

²⁷ Pagka purupita si Ilisyu mayamu pag tawu may dilikadu pag sakit sa lukub sa Israil. Dapat sa kanda tanan unman gid may pinaayad. Ti taga Sirya bay si Naaman ti pinaayad.”

²⁸ Pagka nadnugan nida inda pag bagaw, lubus yi gid nangisug ti tanan tawu sa simbahan manga Hudiyu.

²⁹ Tinmindug sida ginuyud lang nida si Hisus tag sa luwas banwa. Dinara siya tag sa babaw bungtud nagkabugtangan nida banwa hampay ipabalintuk siya tag sa yangpas.

³⁰ Dapat linmakaw maan siya sa kanda panungaan nighit yi ati ginan.

Kay Nagpalwas ni Hisus sa manga Labang

³¹ Pagka nagras-ug si Hisus ati sa banwa Kapirnaum sakup sa Galiliya, tinudluan niya ti manga tawu sa Sirang Pamahari.

³² Nadulaw sida sa kay tudlu dahil may kamaskihan kay bagaw.

³³ Ati sa simbahan manga Hudiyu may usa ka lalaki inapuan labang. Nagringgit siya magkun,

³⁴ “Hintay kanmu pakialam sa kanmi, Hisus taga Nasarit. Nakan aw kawu nagsitay hampay kami kanmu wasakun? Nakilala kawu niku, kawu yi gid ti Banal pag sugu ginan sa Diyus.”

³⁵ Bag-u sinabi ni Hisus sa kanya magkun, “Danga mag-ingay, pagluwas yi kawu sa kanya ginan!” Ilinusgu waya ti inapuan labang sa atubangan kadamlan tawu bag-u nagluwas yi ti labang, dapat unman naunu ti tawu.

³⁶ Nadulaw sida tanan-tanan. Nanharampangan sida magkun, “Hintay nguna pag tudlu inda? Dahil may karampatan siya hanggan kamaskihan hampay magpalwas sa manga labang, ag magsunud ngani sida.”

³⁷ Nibantug yi ti barita tungkul sa kan Hisus sa tanan rugar una arani una arayu.

Pinaayad ni Hisus ti Mayamu Tawu

³⁸ Nighit si Hisus ati ginan sa simbahan manga Hudiyu, bag-u sinmaka siya sa kan Simun balay. Pagramigan masyadu kay manugang babayi ni Simun. Pinaduaw nida sa kan Hisus.

³⁹ Dinulud ni Hisus ti babayi, sinungyaw niya ti ramig, rargu nahumpawan yi siya ramig. Pagka nahumpawan yi kay ramig, nagbangun siya, rargu nangapuy kanda karan-unun.

⁴⁰ Pagka nisalup yi ti init, dinara nida sa kan Hisus ti tanan may pagdungugun tuhay-tuhay pag sakit. Tinalapud sida kinup-an niya kamang pinaayad sida tanan.

⁴¹ Nanlinuwas diman ti manga labang sa mayamu tawu, nanringgit magkun, “Kawu ti Anak Diyus!” Dapat sinabihan maan niya ti manga labang danga yi mag-ingay, dahil alam nida siya ti Pinili Diyus Manugribri pag Hari.

Nagtudlu si Hisus sa Simbahan manga Hudiyu

⁴² Pagka surip yi maan, nagluwas si Hisus nag-ati siya sa pangawakawaan. Pagka ati siya sa pangawakawaan paghanapun siya manga kadamlan tawu, nag-usig sa kanya, pilit nida tinawidan mana siya danga pagtayaki sida.

⁴³ Dapat ay sinabi niya sa kanda, “Kailangan diman iadal niku sa manga iba banwa ti Mayad pag Barita tungkul sa paghari Diyus, dahil imaw ti isinugu Ama sa kangku.”

⁴⁴ Nakan nagtudlu diman siya sa manga tawu sa simbahan manga Hudiyu sa daga Hudiya.