Lukas 3 - Hanunuu

Kay Pagtudlu ni Huwan Manugtulbaw

^1-2 Katpung ikasampulu may lima ka timpu kay maghari ni Tibiryu, nagbagaw ti Diyus sa kan Huwan kay anak ni Sakaryas ati sa pangawakawaan. Ati katpung si Punsiyu Pilatu ti gubirnadur sa Hudiya, si Hirudis waydi ti pangulu sa Galiliya, ag kay patar-ari si Pilipi ti pangulu Ituriya hanggan Tarakuniti; si Lisanyas waydi ti pangulu sa Abilinya. Ati katpung sida ni Anas ni Kaipas ti manga pangulu manughandug.

³ Bag-u nag-ati si Huwan namalibut baliw-baliw dipay sapa Hurdan. Nanudlu siya sa manga tawu, magkun, “Pag-ampu yi kamu sa kanyu manga kasalanan, ag pagpatulbaw yi kamu, bag-u patawadun yi Diyus kanyu manga kasalanan.”

⁴ Nakan natupad yi ti isinurat sa ribru ni Purupita Isayas magkun, “May magtawag sa pangawakawaan kay sabi, ‘Alistuhan niyu ti dalan Panginuun, tadlunga gid ti dalan kay lakawan.

⁵ Tanan-tanan luung tambakan aban, pakababaun ti kada bantud hanggan bungtud, una liku tul-idun. Ti manga dalan nangunhakunha rumatag aban.

⁶ Makitan tanan tawu ti karibrihan ginan sa Diyus.’”

⁷ Naglinuwang ti kadamlan manga tawu hampay patulbaw sa kan Huwan. Magkun siya sa kanda, “Kamu ga lahi manga ulay. Si unu ti magsabi sa kanyu kuntay makapalagiw kamu sa sintinsiya Diyus aban?

⁸ Kamu pagbuwat yi mayad pag buruwatun, kanyu manga ainampu pag manga kasalanan danga yi pagsublia. Danga yi kamu magsarabihan kuntay kanyu ginurang si Abraham. Dahil pagsabihun niku sa kanyu, inda pag manga batu mahimu buwatun Diyus manga tawu itulus sa kan Abraham linahi.

⁹ Kaati nakahanda yi ti wasay sa puun kayu. Ti kada puun kayu nu unman magburak marinu, pukanun yi lang bag-u iyamut sa apuy.”

¹⁰ Pinaingana siya manga tawu magkun, “Hintay nguna ti dapat nimi buwatun?”

¹¹ Nagsagut si Huwan magkun, “Ti may duwa ka balukas kailangan magpakaun kay usa sa unman may imaw. Hanggan ti may karan-unun katida diman ti buwatun pumakaun sa unman may karan-unun.”

¹² Rinmas-ug ti manga manunukut buhis hampay magpatulbaw waydi. Magkun sida sa kan Huwan, “Maisturu, hintay nguna ti dapat nimi buwatun?”

¹³ Sinabi niya sa kanda, “Danga yi kamu magsukut subra sa bilin gubirnu sa kanyu.”

¹⁴ Pinaingana siya manga sundalu magkun, “Ag kami, hintay ti dapat nimu buwatun?” Magkun si Huwan sa kanda, “Danga magbuul tawu kuwarta sa karagasyun, danga magparhug sa tawu. Pagmasulung kamu sa kanyu suhul kang-ud.”

¹⁵ Magpatigagad ti manga tawu sa pagras-ug Pinili Diyus Manugribri pag Hari. Ti hantup kayamuan tawu si Huwan yi ngani ti Pinili Diyus Manugribri pag Hari.

¹⁶ Dapat sinabi ni Huwan sa kanda tanan magkun, “Ungud ngani kamu kang pag-itulbaw sa danum. Dapat may rumas-ug makamaskihan man sa kangku. Unman may karampatan aku maglubad panhigut niya manga lapak. Itulbaw niya kamu aban sa Ispiritu Banal hanggan sa apuy.

¹⁷ Sa kay yi kamang ti pangayat paruk hampay rayawan niya kay girik-an. Tipunun ti tirigu sa kay balay haramnuan. Dapat ti dayami isawug niya sa unman nagkapsa pag apuy.”

¹⁸ Mayamu waya kan Huwan manga paanyu sa manga tawu, itinudlu niya sa kanda ti Mayad pag Barita.

¹⁹ Tinamyaw diman ni Huwan si Hirudis ti Gubirnadur Galiliya, dahil inagaw niya kay patar-ari asawa, si Hirudyas, ag dahil sa tanan kay binwat daut ni Hirudis.

²⁰ Dinagdagan waya ngap kay kasalanan, pagka ipinaslud niya si Huwan sa pirisuhan.

Pagka Itinulbaw si Hisus

²¹ Katpung itinulbaw ti tanan tawu, hanggan si Hisus napatulbaw diman. Pagka magdarangin waya si Hisus, nabukasan ti langit.

²² Nagpakababa sa kanya ti Ispiritu Banal ga histuda kalampati. Bag-u may magbagaw ginan sa langit magkun, “Kawu kang pagmahalun pag Anak, kawu lubus kang pagbayaun.”

Ti Gimpuunan Lahi ni Hisu-Kiristu

²³ Pagka tatlumpulu ka timpu kay idad ni Hisus, nag-umpisa yi siya magtudlu. Paghantupun manga tawu si Hisus kay anak ni Husi. Si Husi anak ni Ili.

²⁴ Si Ili anak ni Matat. Si Matat anak ni Libi. Si Libi anak ni Milki. Si Milki anak ni Hanay. Si Hanay anak ni Husi.

²⁵ Si Husi anak ni Matatyas. Si Matatyas anak ni Amus. Si Amus anak ni Nahum. Si Nahum anak ni Isli. Si Isli anak ni Nagay.

²⁶ Si Nagay anak ni Maat. Si Maat anak ni Matatyas. Si Matatyas anak ni Simiin. Si Simiin anak ni Husik. Si Husik anak ni Huda.

²⁷ Si Huda anak ni Huanan. Si Huanan anak ni Risa. Si Risa anak ni Surubabil. Si Surubabil anak ni Salatyil. Si Saltiyil anak ni Niri.

²⁸ Si Niri anak ni Milki. Si Milki anak ni Adi. Si Adi anak ni Kusam. Si Kusam anak ni Ilmadam. Si Ilmadam anak ni Ir.

²⁹ Si Ir anak ni Huswi. Si Huswi anak ni Iliyisir. Si Iliyisir anak ni Hurim. Si Hurim anak ni Matat. Si Matat anak ni Libi.

³⁰ Si Libi anak ni Simyun. Si Simyun anak ni Huda. Si Huda anak ni Husi. Si Husi anak ni Hunam. Si Hunam anak ni Ilyakim.

³¹ Si Ilyakim anak ni Miliya. Si Miliya anak ni Mina. Si Mina anak ni Matata. Si Matata anak ni Natan. Si Natan anak ni Dabid.

³² Si Dabid anak ni Isai. Si Isai anak ni Ubid. Si Ubid anak ni Buus. Si Buus anak ni Salmun. Si Salmun anak ni Nashun.

³³ Si Nashun anak ni Aminadab. Si Aminadab anak ni Admin. Si Admin anak ni Arni. Si Arni anak ni Hisrun. Si Hisrun anak ni Paris. Si Paris anak ni Huda.

³⁴ Si Huda anak ni Hakub. Si Hakub anak ni Isaak. Si Isaak anak ni Abraham. Si Abraham anak ni Tira. Si Tira anak ni Nahur.

³⁵ Si Nahur anak ni Siruk. Si Siruk anak ni Ragaw. Si Ragaw anak ni Pilig. Si Pilig anak ni Ibir. Si Ibir anak ni Sala.

³⁶ Si Sala anak ni Kainan. Si Kainan anak ni Arpaksad. Si Arpaksad anak ni Sim. Si Sim anak ni Nuwi. Si Nuwi anak ni Lamik.

³⁷ Si Lamik anak ni Matusalim. Si Matusalim anak ni Inuk. Si Inuk anak ni Harid. Si Harid anak ni Mahalalil. Si Mahalalil anak ni Kainan.

³⁸ Si Kainan anak ni Inus. Si Inus anak ni Sit. Si Sit anak ni Adam. Si Adam anak Diyus.