Lukas 20 - Hanunuu

Ti Karampatan ni Hisus

¹ Nanudlu maan si Hisus ag ipinaliwanag niya ti Mayad pag Barita sa manga tawu sa sulud Balay Diyus. Bag-u nagpakarani ti manga pangulu manughandug, ti manga manugtudlu Kasuguan hanggan ti manga paggurangunun manga Hudiyu,

² ag nagpaingana sida sa kanya, “Sabiha nimu sa kanmi, hintay kanmu karampatan nakan pagbuwatun nimu inda pag manga bagay? Hintay ti may pakaun inda pag karampatan sa kanmu?”

³ Nagsagut si Hisus sa kanda, “May ipaingana waydi aku sa kanyu. Taynguna sabihun niyu sa kangku,

⁴ hintay ti may pakaun karampatan sa kan Huwan hampay magtulbaw, ngatay Diyus, ngatay tawu?”

⁵ Nanharampangan dapu sida-sida lang magkun, “Nu kanta sabihun, Diyus ti may pakaun, kumumun siya, hayga unman kamu naniwala sa kanya?

⁶ Dapat nu sabihun nita tawu ti may pakaun, barang bintukun kita batu manga tawu. Dahil magpaniwala gid sida si Huwan purupita.”

⁷ Nakan sinmagut sida, “Unman duy nimi alam.”

⁸ Magkun si Hisus sa kanda, “Balaw diman sabihun niku sa kanyu nu naan ginan kang karampatan hampay magbuwat inda pag manga bagay.”

Ti Pahalimbawa sa Ubasan ag sa Manugtarabahu

⁹ Bag-u itinultul ni Hisus inda pag pahalimbawa sa manga tawu magkun, “May tawu nagtanum ubas sa kay ubasan bag-u iinintirga niya sa manga manugtarabahu bag-u napaiba rugar, nadugay ati.

¹⁰ Pagka udas tigpuruti sinugu niya kay usa ka panawuhun tabug sa manga manugtarabahu hampay padarahan nida kay kahuray burak ubas. Dapat binakul siya manga manugtarabahu ipinauli ud may dara.

¹¹ Sinugu maan niya kay usa ka panawuhun. Binakul maan nida minuransa waya bag-u ipinauli ud may dara.

¹² Pinmakatlu maan sinmugu siya. Biniyagan nida bag-u tinulak.

¹³ Sinabi may puun ubasan, ‘Hintay nguna kang buwatun inda? Kang suguun ti pagmahalun niku pag anak, pihu galangun nida siya.’

¹⁴ Dapat pagka nakitan siya manga manugtarabahu, nanharampangan sida magkun, ‘Inda aban ti mumana ubasan, kanta yi matyun hampay kanta yi apuun kay ama pamana.’

¹⁵ Kanda tinulak tabug sa luwas ubasan bag-u kanda yi ngani minatay.” “Hintay nguna ti buwatun may apu ubasan sa kanda?

¹⁶ Atihan niya hampay matyun tunda pag manga manugtarabahu bag-u iintirga maan sa manga iba kay ubasan.” Pagka nakadnug ti manga manugpatingi sa kan Hisus tultulanun sinabi nida magkun, “Danga maniring mana sa ati pag tultulanun.”

¹⁷ Dapat binmantay si Hisus sa kanda ag namaingana, “Hintay nguna kay sabi sa Kasuratan magkun, ‘Ti batu dinayu manga manugbuwat balay, binwat ngap mahalaga pag kalap.’

¹⁸ Una si unu nu malagpak tag sa babaw batu inda marunut gid ag una waydi hintay ti madugsakan, mapisi.”

Tungkul sa Pagbayad Buhis

¹⁹ Ti manga manugtudlu Kasuguan hanggan ti manga pangulu manughandug naghanap paraan hampay madakup si Hisus ati katpung, dahil nasalman nida sida ti pinatamaan sa kay pahalimbawa niya. Dapat nadala sida sa manga tawu.

²⁰ Nakan nag-alagad waya sida. Sinugu nida manga tawu kanda inupahan hampay mamabalhinguun pag paingana sa kan Hisus hampay pasalanun siya sa kay bagaw bag-u ipabahala nida siya sa kapangyarihan gubirnadur.

²¹ Ipinaingana nida sa kanya, “Maisturu, alam nimi kanmu bagaw hanggan tudlu tama gid ag unman kawu may pag-apihun. Pag-itudlu nimu ti katutuuhanan hampay pagtupadun manga tawu ti kagustuhan Diyus.

²² Angay aw nguna sa Kasuguan Diyus nu bumuhis ti tawu sa Pangulu Hari aw ngatay unman?”

²³ Dapat alam di ni Hisus kanda magpabalhinguun nakan nagsabi siya sa kanda,

²⁴ “Anti duy kam dinaryu, manhimalad aku. Kantapu pag uyahun ti mapalatan sa inda pag kuwarta? Kantapu pag ngaran ti nakasurat?” Magkun sida, “Sa Pangulu Hari duy inda.”

²⁵ Bag-u sinabi ni Hisus sa kanda magkun, “Nakan ipakaun lang sa Pangulu Hari ti para sa kanya. Dapat ay ipakaun niyu sa Diyus ti para sa Diyus.”

²⁶ Dayu siya mapasalan nida sa kay bagaw sa atubangan manga tawu. Naglingut gid sida sa kay sagut, udyi sida nag-ingay.

Tungkul sa Pagkabuhi Uman

²⁷ May manga Sadusiyu nagpakarani sa kan Hisus. Kanda paniwala basta namatay yi ti tawu balaw yi mabuhi uman. Sinabi nida sa kanya magkun,

²⁸ “Maisturu, nagsurat si Muysis bilin sa kanta magkun, ‘Ti magtar-ari lalaki nu ti usa namatay natayak kay asawa babayi dapat unman may anak, kay patar-ari kailangan mag-asawa sa buranday hampay nu may anak sida imaw ti makamana sa kay pinagkagurang kayamanan.’

²⁹ Kaybi may pitu ka magtar-ari lalaki. Nangasawa ti usa. Pagka dugay namatay siya unman may anak.

³⁰ Nag-asawa maan sa buranday ti ikadwa, pagka dugay namatay waydi.

³¹ Katunda diman ti nangyari sa ikatlu hanggan sa ikapitu kada usa nag-asawa sa babayi, namatay sida ud nagkaanak.

³² Pagka dugay namatay diman ti babayi.

³³ Nu sa pagkabuhi uman aban, kantapu asawa ti babayi? Kabay inasawa niya tunda pag pitu ka lalaki.”

³⁴ Sinabi ni Hisus sa kanda, “Ti manga lalaki ag ti manga babayi sitay sa babaw daga mangasawa ngani.

³⁵ Dapat tunda pag manga tawu ti pinakan-an Diyus karampatan hampay makalakaw sa pagkabuhi uman ginan sa kamatayan ag makaaput sa bag-u buhi, sida udyi umasawa udyi paasawan-un.

³⁶ Parihu yi sida sa manga anghil. Udyi mahimu sida mamatay, manga anak sida Diyus, dahil sida binuhi yi uman ginan sa kamatayan.

³⁷ Dapat sa tultulanun tungkul sa kayu minaktan apuy ipinakilala diman ni Muysis pagbuhiun uman ti manga namatay. Iningarnan niya ti Panginuun kuntay siya ti Diyus ni Abraham, Diyus ni Isaak ag Diyus ni Hakub.

³⁸ Ti Diyus balaw Diyus manga namatay nu unman Diyus ngap manga tawu may buhi, dahil sa kanya pag magkabuhi ti tanan tawu.”

³⁹ Nagsabi ti iba manga manugtudlu Kasuguan magkun, “Maisturu, mayad duy kanmu pag magkasabi.”

⁴⁰ Ag unman yi ngani nagpanghas sida magpaingana waya sa kanya.

Kay Paingana ni Hisus tungkul sa kay Linahi ni Dabid

⁴¹ Bag-u nagpaingana si Hisus sa kanda magkun, “Kabitay masabi nida linahi ni Dabid ti Pinili Diyus Manugribri pag Hari?

⁴² Dahil si Dabid diman ti may sabi sa ribru Manga Kanta magkun, ‘Sinabi Panginuun sa kang Panginuun, Pagtukaw kawu sitay baliwa sa kang sikun, Pagpaminsan sa kang karampatan

⁴³ Hanggan sa udwaya mabuwat niku kanmu manga kalaban ga tarat-an lang nimu manga lulud.’

⁴⁴ Si Dabid yi waydi ti nag-ingaran sa kay Pinili Diyus Manugribri pag Hari magkun Panginuun. Nu katida kabitay pag masabi ti Pinili Diyus Manugribri pag Hari kay linahi lang ni Dabid?”

Pat-ama Laban sa manga Manugtudlu Kasuguan

⁴⁵ Nagpatingi sa kan Hisus ti tanan manga tawu bag-u sinabi niya sa kay manga tuludluan,

⁴⁶ “Pag-aman kamu sa manga manugtudlu Kasuguan. Magkaibug sida mamasyar sadsad kay rutay, masulungun sida paggalangun, magpabaya-baya sa manga luwas balay. Nu sa simbahanan manga Hudiyu kanda gustu tumukaw sa tukawan iinalistu sa may kangaranan. Nu may karan-an kanda gustu makatukaw sa marinu pag tukawan.

⁴⁷ Dapat pagtabuhun nida ti kasiyunan manga buranday bag-u magpadayaw-dayaw diman sa kanda magdarangin araba. Lalu waya mabuyat aban pag parusa sa kanda.”