Lukas 2 - Hanunuu

Sa kay Kapanganakan ni Hisus

¹ Sa ati katpung nagras-ug kay bilin ni Pangulu Hari Agustu magkun, kailangan sinsuhun ti tanan tawu sa kay kaharian.

² (Inda ti kabag-u pag sinsu natupad katpung gubirnadur sa daga Sirya si Kirinyu.)

³ Nakan nag-atag maan ti tanan manga tawu sa linahi nida pag banwa hampay magpalista.

⁴ Hanggan si Husi linmakaw ginan sa banwa Nasarit sa daga Galiliya atag sa kay naglusadan ni Dabid, sa banwa Bitlihim, sakup daga Hudiya. Dahil si Husi minamat ni Dabid.

⁵ Nag-ati ngani si Husi hanggan si Marya kay aguman babayi, hampay magpalista diman. Si Marya kainda magbuduy.

⁶ Pagka ati sida sa Bitlihim, magpanamdam si Marya arani yi manganak.

⁷ Ag kay inanak kay akaan anak lalaki bag-u kay pinulhut sa kumut ag ibinugtang sa labangan hayup. Ati sida sa balay hayup, dahil udyi gid may madayunan sida sa kanda rinas-ugan pag balay.

Ti manga Manug-alaga Karanidu ag ti manga Anghil

⁸ May manga manug-alaga karanidu sa pasturan arani banwa Bitlihim. Magbantay sida sa yabi sa kanda manada hayup.

⁹ Kadaka linmuwang ti usa ka anghil Panginuun tag sa kanda arani ag rinmayaw ti kadayawan Panginuun sa kanda palibut. Masyadu gid nadala sida.

¹⁰ Dapat magkun ti anghil sa kanda, “Kamu duy, danga magkadala, dahil malu, may dara aku sa kanyu tabug usa ka mayad gid pag barita may daka pag kabayaan sa tanan tawu.

¹¹ Dahil inanak yi taynguna sa Banwa ni Dabid ti Manugribri niyu, imaw ti Kiristu, ti Pinili Diyus Manugribri pag Hari, ti Panginuun.

¹² Inda yi ngani ti puruyba hampay makilala niyu siya: sab makitan yi niyu ti usa ka lapsag mapulhutan sa kumut, ibinugtang sa labangan hayup.”

¹³ Kadaka linmuwang atag sa anghil kay manga kaibahan kadamlan ginan sa langit, manga magdayaw sa Diyus, magkun,

¹⁴ “Dayawun nita ti Diyus sa langit. Sa babaw daga may kahusayan yi sa manga tawu kay pagbayaun Diyus.”

¹⁵ Pagka nuli maan ti manga anghil tabug sa langit, ti manga manug-alaga karanidu nagharampangan magkun, “Atag yi lugud kita sa Bitlihim kainda, kanta duawan ti nangyari ati kay ipinaalam Panginuun sa kanta.”

¹⁶ Dinmali inmatag sida, nakitan ngani nida sida ni Marya, ni Husi bag-u siyun diman hanggan ti lapsag maigyaan sa labangan hayup.

¹⁷ Pagka nakitan nida itinultul nida ti manga sinabi anghil sa kanda tungkul sa lapsag inda.

¹⁸ Ti tanan nakadnug inda nadulaw sa itinultul manga manug-alaga karanidu.

¹⁹ Dapat itinuduk ni Marya sa kay tagipusuun ti tanan-tanan sinabi nida, kay pagpakaisip-isipun sa kay sadili.

²⁰ Nuli maan ti manga manug-alaga karanidu. Pagdayawun nida lubus ti Diyus dahil sa tanan bagay kanda nadnugan ag nakitan angay gid sa kay sinabi anghil sa kanda.

Pinaingarnan si Hisus

²¹ Pagka nakalawuy usa ka duminggu tinuri yi nida ti anak, iningarnan nida si Hisus, imaw diman pag ngaran ti ipinaalam anghil sa kan Marya kay udwaya magbuduy.

Binaba si Hisus tag sa Balay Diyus

²² Pagka nakalawuy ti manga sirang, nagras-ug ti sirang manhandug si Marya si Husi angay sa Kasuguan ni Muysis hampay ipakilala sida malumpiyu yi. Nakan nag-ati sida sa Hirusalim, ag binaba nida si Hisus hampay ipaatubang siya sa Panginuun.

²³ Angay sa isinurat sa Kasuguan Panginuun magkun, “Kada panganay lalaki pagsabihun Panginuun, kangku di.”

²⁴ Nakan nag-ati ngani sida sa Hirusalim hampay kanda ihandug sa Panginuun ti angay sa isinurat sa Kasuguan Panginuun magkun, duwa ka bilug kurkuru ngatay duwa ka bilug kalampati.

²⁵ May usa ka lalaki sa Hirusalim kay ngaran si Simyun. Matadlung gid siya pag tawu, marasarig sa Diyus, magpatigagad yi gid sa karibrihan manga taga Israil. Nangulian sa kanya ti Ispiritu Banal.

²⁶ Pinaalman siya Ispiritu Banal magkun, unman makitan niya kay kamatayun hanggan sa udwaya nakitan niya ti Pinili Diyus Manugribri pag Hari.

²⁷ Nag-ati si Simyun sa Balay Diyus dahil sa udyuk Ispiritu. Nagsaka sida ni Marya ni Husi sa Balay Diyus may sabibi kanda anak lapsag si Hisus, hampay kanda tupadun ti pagsabihun sa Kasuguan Diyus tungkul sa manga panganay.

²⁸ Bin-ul ni Simyun ti lapsag ginan sa kay ina, sinalapnay niya, bag-u nagdayaw siya sa Diyus magkun,

²⁹ “Taynguna bay, Panginuun, natupad yi ngani nimu kam taratu. Una bul-un yi nimu kang buhi. Aku inda kanmu suruguun, may kahusayan yi sa kang naisipan.

³⁰ Dahil nakitan yi niku manga mata kanmu karibrihan,

³¹ kanmu inalistu sa atubangan manga tawu,

³² usa ka sulu hampay marayawan ti manga balaw Hudiyu, ag hampay ipakilala ti kadayawan nimu nasyun Israil.”

³³ Kay ina kay ama naglingut sa tanan pagsabihun ni Simyun tungkul sa kanda anak.

³⁴ Nandarangin si Simyun sa kanda hampay sida papaladan Diyus, bag-u sinabi niya sa kay ina sa kan Marya, magkun, “Inda pag anak ihinanda Diyus sa ikadamhak ag sa ikaribri mayamu tawu taga Israil. Madi siya ti tanda ginan sa Diyus, labanan di ngap siya aban,

³⁵ hampay mipakilala ti pag-iisip mayamu tawu. Duy Marya, kanmu karukuan aban ga utak matarum magbiyag sa kanmu tagipusuun.”

³⁶ Siyun diman ti usa ka purupita si Ana, kay anak babayi ni Panwil, kay lahi ni Asir. Siya masyadu yi gid gurangun. Pitu lang ka timpu kanda nag-amut mag-asawa namatay yi kay lalaki.

³⁷ Walumpulu may upat ka timpu siya buranday yi. Siyun yi gid sa Balay Diyus kay ulian. Pirmi gid magsamba sirang yabi, udyi maghandum karan-unun sa kay magdarangin.

³⁸ Pagka ati katpung sa Balay Diyus sida ni Marya ni Husi, pinmakarani si Ana, nagpasalamat siya sa Diyus, bag-u nagtultul siya tungkul sa lapsag sa tanan tawu magpatigagad sa karibrihan Hirusalim.

Nuli maan Sida tag sa Nasarit

³⁹ Pagka natupad yi nida ni Marya ni Husi ti tanan bagay angay sa Kasuguan Panginuun, nuli sida tag sa Galiliya, sa kanda ulian sa banwa Nasarit.

⁴⁰ Pagka nagdaka ti anak, nagmabisug, napnu kadunungan kay tagipusuun, nangulian yi gid sa kanya ti kaayadan Diyus.

Si Hisus sa Balay Diyus

⁴¹ Timpu timpu mag-ati kay manga gurang ni Hisus sa banwa Hirusalim sa Kapistahan sa Pag-alaala sa Karibrihan.

⁴² Pagka may sampulu yi may duwa ka timpu kay idad ni Hisus, nagtukad maan sida tag sa Hirusalim, ga kanda diman ugali tag sa Kapistahan.

⁴³ Pagka nakalawuy yi ti Kapistahan, nuli yi sida. Unman nida alam maaw ti anak, si Hisus, napatayak sa Hirusalim.

⁴⁴ Kanda hantup barang nagkuyug siya sa kay manga kaibahan, nakan naglakaw yi sida, usa gid ka sirang kanda lakaw bag-u kanda hinanap ti anak sa kanda manga katawuhan hanggan kakilala.

⁴⁵ Pagka unman nakitan nida, nagbalik maan sida sa Hirusalim hampay hanapun siya kaayad.

⁴⁶ Sa ikatlu pag sirang, bag-u di kanda nakitan si Hisus sa Balay Diyus, matukawan sa karaw-an manga manugtudlu Kasuguan. Magpatingi siya sa kanda, magpaingana waya.

⁴⁷ Ti tanan nakadnug sa kanya masyadu gid naglingut sa kay manga sagut dahil matinudukun gid siya.

⁴⁸ Pagka siya nakitan nida ni Marya ni Husi naglingut gid sida sa kanya. Bag-u sinabi niya ina magkun, “Kawu duy pag anak, hayga binwat nimu sa kanmi ti katida? Kami kanmu ina kanmu ama maruku yi, dugay kawu nakitan nimi.”

⁴⁹ Magkun si Hisus sa kanda, “Hayga duy aku kanyu paghanapun? Unman aw niyu alam aku atay may buruwatun sa balay niku Ama?”

⁵⁰ Unman naintindihan nida kan Hisus binagaw sa kanda.

⁵¹ Nagkuyug si Hisus sa kay manga gurang tag sa Nasarit. Napasakup siya sa kay manga gurang. Inda tanan pag nangyari itinuduk niya ina sa kay tagipusuun.

⁵² Magdaka kay bilug ni Hisus, hanggan kay kadunungan magdaka waydi. Lalu siya pagbayaun Diyus hanggan manga tawu.