Lukas 19 - Hanunuu

Si Hisus ag si Sakiyu

¹ Sinmulud si Hisus sa banwa Hiriku dahil ati siya paglumakaw atabug sa Hirusalim.

² Asan may usa ka lalaki kay ngaran si Sakiyu, takinan manga manunukut buhis. Siya usa ka mayaman.

³ Magtagahilingi kay gustu sa kan Hisus nu hintay ti pagsabihun si Hisus. Dapat unman mahimu dahil sa kadamlan tawu ag siya ababa pag tawu.

⁴ Nag-ambang siya sa kan Hisus, dinmayik sa kayu sikumuru hampay makitan niya si Hisus, dahil siya lumakaw ati pag dalan.

⁵ Pagka nagras-ug si Hisus siyun, nagtangda siya magkun, “Dag abala duy, Sakiyu, pagdugsun yi kawu, dahil taynguna kailangan aku manhapit sa kanmu balay.”

⁶ Madali dinmugsun siya, nagbaya siya, ipinasaka niya si Hisus sa kay balay.

⁷ Pagka nakitan manga tawu si Hisus sinmaka sa kan Sakiyu balay, naglibak sida magkun, “Siya maaw manhapit sa balay makasalanan.”

⁸ Tinmindug si Sakiyu sinmabi sa Panginuun, “Panginuun, kay katunga niku kasiyunan kang ipakaun sa manga pugri. Nu nakasukut aku nagdaya una sa kantapu pag tawu, iuli maan niku durugan upat.”

⁹ Sinabi ni Hisus sa kan Sakiyu, “Nagras-ug taynguna ti karibrihan sa inda pag magtal-anakan. Dahil inda pag tawu linahi diman ni Abraham.

¹⁰ Dahil aku, ti Anak Tawu, nagsitay hampay hanapun ag iribri ti nadura.”

Ti Pahalimbawa sa manga Panawuhun Piniyaran Kuwarta

¹¹ Magpatingi waya ti manga tawu sa kay manga pagsabihun ni Hisus, rargu itinultul niya ti usa ka pahalimbawa, dahil arani yi siya sa Hirusalim ag dahil nahantup manga tawu udyi dugay ipaburayhaw yi kay paghari Diyus.

¹² Nakan ngani sinabi ni Hisus magkun, “May usa ka tawu mataas kay katungkulan, lumakaw yi siya sa arayu pag rugar hampay pakan-an siya karampatan agud siya yi ti humari bag-u siya bumalik.

¹³ Dapat bag-u siya linmakaw, tinawag dapu niya kay sampulu ka panawuhun. Piniyaran niya sida pari-parihu pag halaga, sinabi niya sa kanda, ‘Inigusyu niyu inda pag kuwarta hanggan sa udwaya aku bumalik.’

¹⁴ “Dapat kinagalitan siya niya manga kasimanwa pinausigan siya nida manga diligadu ag pinakihampang magkun, ‘Unman nimi ibug inda pag tawu ti humari sa kanmi.’

¹⁵ Dapat tinanggap diman tunda pag tawu karampatan hampay maghari. Pagka dugay nuli maan siya. Tinawag niya kay manga panawuhun hampay maalaman niya nu pira kay tubu kuwarta kay ipinakaun sa kanda, kanda ininigusyu.

¹⁶ “Nagpakarani dapu sa kanya ti usa magkun, ‘Duy, ti kuwarta kanmu ipinakaun sa kangku nagtubu waya sampulu ka ulit.’

¹⁷ Bag-u sinabi niya sa panawuhun, ‘Mayad duy, mayad kawu pag panawuhun. Kawu maratupad sa diit pag bagay, nakan kawu kang buwatun pangulu sa sampulu ka banwa.’

¹⁸ Bag-u nagpakarani kay ikadwa pag panawuhun magkun, ‘Duy, ti usa ka gatus pisus kanmu ipinakaun sa kangku nagtubu waya lima ka gatus pisus.’

¹⁹ Sinabi hari sa kay panawuhun, ‘Pagpamahala kawu sa lima ka banwa.’

²⁰ “May usa waya ka panawuhun nagpakarani sa kanya magkun, ‘Inda duy kanmu kuwarta, kang sinaput sa kang panyu.

²¹ Magkadala aku sa kanmu, dahil mahigpit kawu pag tawu, kawu mag-apu bukun kanmu. Madi balaw kawu ti nagpamgas, paghanapun di nimu kay tubas.’

²² Sinabi hari sa kanya, ‘Kawu minus pag panawuhun, pihuun yi ngap niku kawu ginan sa kam sinabi. Alam maaw nimu aku mahigpit pag tawu, mag-apu bukun kangku, paghanapun maaw niku kay tubas madi balaw aku ti nagpamgas.

²³ Hayga unman hinulug nimu sa bangku kang kuwarta hampay sa kang pagbalik pagsuktun mana niku hanggan kay tubu.’

²⁴ “Sinabi hari sa manga manugpatingi magkun, ‘Bul-a niyu ti kuwarta ginan sa kanya ag ipakaun niyu sa may usa ka libu pisus.’

²⁵ Sinabi nida sa kanya, ‘Hayga duy, may usa ka libu pisus yi siya.’

²⁶ Magkun ti hari, ‘Pagsabihun niku sa kanyu, ti may imaw pakan-an waya, dapat ti udyi gid may imaw, bul-an waya una diit wadi sa kanya.

²⁷ Nu bay kang manga kalaban tunda, daran-a niyu sitay tag sa kangku matya sa kang atubangan dahil sa dayu sida aku makahari sa kanda.’ ”

Nagras-ug si Hisus sa Banwa Hirusalim

²⁸ Pagka itinultul ni Hisus inda pag pahalimbawa, nag-una siya nagtukad atag sa Hirusalim.

²⁹ Pagka siya arani yi sa baryu Bitpagi ag sa baryu Bitanya sugkad Bantud Ulibu, sinugu niya kay duwa ka tuludluan

³⁰ magkun, “Pag-ati kamu sa usa waya ka baryu. Nu kamu magsulud yi sa baryu sab, susun makakit kamu anak asnu mahigtan udwaya sinakyan tawu. Lubada niyu tunda, daran-a sitay tag.

³¹ Nu may pumaingana sa kanyu, ‘Hayga duy niyu paglubadun?’ Kaindaay duy kanyu sabihun, ‘Pagkailanganun ay duy Panginuun.’ ”

³² Nakan nag-atag kay manga sinugu ag nakitan nida parihu sa kay sinabi ni Hisus.

³³ Pagka paglubadun waya nida ti anak asnu, pinmaingana sa kanda ti manga apu asnu magkun, “Hayga duy paglubadun niyu ti anak asnu?”

³⁴ Nagsagut sida magkun, “Pagkailanganun ay duy Panginuun.”

³⁵ Bag-u dinara nida ti anak asnu tag sa kan Hisus. Pagka ihinampilu nida kanda manga rutay sa anak asnu, kanda yi ipinasakay si Hisus.

³⁶ Hanggan masakyan waya siya atabug sa Hirusalim sinagmakan rutay manga tawu ti dalan.

³⁷ Pagka arani yi siya sa banwa Hirusalim maglus-ug yi siya sa bantud Ulibu bag-u ti bilug kayamuan tuludluan nag-umpisa magbaya magdayaw sa Diyus ainalsa kanda busis, dahil sa tanan makamaskihan buwat kanda nakitan.

³⁸ Magkun sida, “Mapalad ti Hari magras-ug sa ngaran Panginuun. Kahusayan sa langit. Pagdayawun ti Diyus sa langit.”

³⁹ May manga Parisiyu diman sa kayamuan. Magkun sida sa kan Hisus, “Maisturu, sungyawa yi duy nimu kanmu manga tuludluan.”

⁴⁰ Sinabi ni Hisus sa kanda magkun, “Pagsabihun niku sa kanyu nu map-ut kanda dayaw, batu maan ti pumagrit.”

Linumian ni Hisus ti Banwa Hirusalim

⁴¹ Pagka arani yi si Hisus ag magkaalantaw niya ti banwa Hirusalim, linumian niya ti banwa,

⁴² magkun, “Nu nasalman lang nimu taynguna nu hintay kanmu kailangan hampay may kahusayan. Dapat taynguna unman ngap nakilala nimu.

⁴³ Dahil aban pag manga udas sangputun gid kawu nimu manga kalaban. Kulungun yi kawu, apikihun kawu sa baliw-baliw.

⁴⁴ Wasakun gid nida kawu ag lipulun nida ti manga tawu mag-uli sulud nimu alad batu. Unman nida sawadan una di usa ka batu sa kaparihu babaw batu, dahil unman nimu nakilala kay kaudasan pagka nagluwang ti Diyus hampay kawu mana kay iribri.”

Sinmaka si Hisus sa Balay Diyus

⁴⁵ Bag-u pagka sinmaka si Hisus sa Balay Diyus, tinulak niya sa karagasyun ti manga magbili manga magpabili.

⁴⁶ Sinabi niya sa kanda magkun, “Sinurat sa Banal Kasuratan magkun, ‘Kang balay pag-ingarnan balay dararanginan,’ dapat binwat ngap niyu paratag-an manga mananakaw.”

⁴⁷ Nagtudlu diman gid siya sirang-sirang sa sulud Balay Diyus. Paggayakun siya matyun manga pangulu manughandug, manga manugtudlu Kasuguan hanggan manga takinan nasyun.

⁴⁸ Dapat unman diman may mag-akitan sida paraan dahil lalu mahal kay magpatingi tanan tawu sa kay manga pagsabihun.