Lukas 18 - Hanunuu

Ti Pahalimbawa sa Babayi Buranday ag sa Huwis

¹ Itinultul ni Hisus sa kay manga tuludluan ti usa ka halimbawa, kay gustu sabihun kailangan sida magdarangin pirmi, danga maglubay kanda naisipan.

² Magkun siya, “Ati sa usa ka banwa may talaghusay unman maggalang sa Diyus, unman diman waydi maggalang sa tawu.

³ Sa ati pag banwa may babayi buranday magpakasabang-sabang sa talaghusay, magpakasabi-sabi, ‘Awati duy nimu aku hampay may matarung aku laban sa kang manga kalaban.’

⁴ “Sa kabag-u nagbugya ti talaghusay, dapat sa kadugayan panahun magkun siya sa kay sadili, ‘Madi aku unman maggalang sa Diyus, unman diman waydi maggalang sa tawu,

⁵ kailangan awatan yi lang niku inda pag babayi buranday hampay may matarung, dahil magkaaburidu yi aku sa kanya, magkauyamut yi aku sa kay magpakasitay.’ ”

⁶ Magkun ti Panginuun, “Malu, nakitan niyu ti binwat talaghusay balaw ngani matadlung?

⁷ Unman aw lugud awatan Diyus kay manga pinili hampay may matarung sida dahil magdangup sida sa kanya sirang yabi?

⁸ Pagsabihun niku sa kanyu, madali gid siya umawat sa kanda hampay may matarung. Dapat nu bumalik aban ti Anak Tawu may mag-akitan aw nguna siya aban manga tawu magsarig sa kanya sitay sa babaw daga?”

Ti Pahalimbawa sa Parisiyu ag sa Manunukut Buhis

⁹ Itinultul diman ni Hisus inda pag halimbawa sa manga magsarig sa kanda sadili kuntay sida matadlung dapat kanda pagpiin-piinun ti manga iba.

¹⁰ Magkun si Hisus, “May duwa ka lalaki nag-ati sa Balay Diyus hampay magdarangin. Parisiyu kay usa, kay usa manunukut buhis.

¹¹ Matindugan ti Parisiyu magdarangin sa kay sadili magkun, ‘Diyus, magpasalamat aku sa kanmu, dahil balaw aku ga iba pag tawu, balaw aku magtakaw, balaw aku maradaya, balaw aku marauragin, balaw diman aku ga tunda pag manunukut buhis.

¹² Kada usa ka sulud duminggu kadwa ginan aku unman maghandum karan-unun. Magpakaun aku ikasampulu tanan niku mag-akitan.’

¹³ “Dapat ti manunukut buhis matindugan sa arayu. Unman siya nagpanghas nagtangda sa langit, tinaptap niya kay dubdub sa kay karukuan, magkun siya, ‘Kaawai duy aku, Diyus, dahil aku usa ka makasalanan.’ ”

¹⁴ Magkun si Hisus, “Pagsabihun niku sa kanyu, nuli yi inda pag lalaki pinakan-an siya kahusayan sa atubangan Diyus, dapat tunda pag Parisiyu unman. Dahil ti kada magpalabaw-labaw ipaababa. Dapat tigpakumbaba, ipaabwat ngap Diyus.”

Pinapaladan ni Hisus ti Dariit pag manga Anak

¹⁵ May manga nagdara sa kanda manga anak dariit tabug sa kan Hisus hampay kup-an. Pagka nakitan niya manga tuludluan, sinungyaw nida tunda pag manga tawu.

¹⁶ Dapat binagawan ni Hisus kay manga tuludluan magkun, “Pabay-ani lang niyu duy ti manga anak magpakarani sa kangku, danga yi sida pag-irangi, dahil ti ga anak imaw ti pagharian Diyus.

¹⁷ Ungud kang pagsabihun sa kanyu, una hintay pag tawu ti unman ga anak kay magpasakup sa kay paghari Diyus, balaw kabilang sa manga tawu pagharian niya.”

Ti Lalaki Mayaman

¹⁸ May usa ka paggurangunun manga Hudiyu ti nagpaingana sa kan Hisus magkun, “Mayad pag Maisturu, hintay nguna kang buwatun hampay matanggap niku ti buhi unman may katapusan?”

¹⁹ Nagsagut si Hisus sa kanya magkun, “Hayga duy aku kanmu pagsabihun mayad? Unman may mayad nu unman ti Diyus lang.

²⁰ Alam yi nimu ti Kasuguan magkun, ‘Danga kawu magpanguragin, danga kawu maglibun sa kanmu kaparihu, danga kawu magtakaw, danga kawu magpudil sa kanmu magkastigus, galanga nimu kanmu ama kanmu ina.’”

²¹ Bag-u nagsabi tunda pag tawu magkun, “Ginan di waya sa kang diit tinupad niku tunda tanan.”

²² Pagka nadnugan ni Hisus inda, sinabi niya sa lalaki magkun, “Usa waya ka bagay ti kurang sa kanmu. Pabilyan nimu ti tanan nimu kasiyunan. Nu nipabili yi ayaw-ayawa kay kabilyanan sa manga pugri hampay makatanggap kawu kayamanan sa langit. Bag-u pagsitay maan kawu pagkuyug yi sa kangku.”

²³ Dapat magkabayung ti lalaki sa kay sinabi ni Hisus dahil masyadu gid siya mayaman.

²⁴ Nagbantay si Hisus sa kanya bag-u sinabi niya, “Makuri masyadu ti mayaman magpasakup sa kay paghari Diyus.

²⁵ Malpus waya ti kamilyu sumuyuk sa sulat dayum kaysa miminsan ti usa ka mayaman sa kaharian Diyus.”

²⁶ Ti manga nakadnug sa kay sinabi ni Hisus, namaingana sa kanya magkun, “Nu katunda duy si unu nguna ti makaribri?”

²⁷ Dapat nagsagut si Hisus magkun, “Ti unman mabuwat manga tawu mabuwat di Diyus.”

²⁸ Sinabi ni Pidru, “Malu duy kami inda, tinayakan yi nimi kanmi manga ulian bag-u nagkuyug ngani kami sa kanmu.”

²⁹ Sinabi ni Hisus sa kanda, “Ungud duy kang pagsabihun sa kanyu, una hintay pag tawu nu magtayak sa kay ulian, sa kay asawa, sa kay manga patar-ari, sa kay gurang, sa kay manga anak, dahil sa kay magpasakup sa kay paghari Diyus,

³⁰ mas lalu mayamu waya ti ipakaun maan sa kanya sitay sa babaw daga, ag aban buhi unman may katapusan.”

Pinat-ama maan ni Hisus Kay Kamatayan ag Kay Pagkabuhi Uman

³¹ Pagka ipinablag ni Hisus kay sampulu may duwa ka tuludluan, sinabi niya sa kanda magkun, “Pagpatingi duy kamu, kita sa dalan yi tag babaw tag sa banwa Hirusalim. Nu ati yi kita tupadun gid ti tanan isinurat manga purupita tungkul sa Anak Tawu.

³² Dahil ipabahala siya sa manga balaw Hudiyu, surugun, pauyaun, bug-anan siya,

³³ ag hampakun nida siya bag-u matyun. Dapat sa ikatlu pag sirang mabuhi siya uman.”

³⁴ Dapat unman naintindihan niya tuludluan tunda. Unman may kalinawan sida sa kay sinabi ni Hisus, unman nida alam nu hintay kay pagturunuhun.

Pinaayad ni Hisus ti Lalaki Buta

³⁵ Pagka arani yi sida ni Hisus sa banwa Hiriku, may lalaki buta matukawan sa saruy dalan maghagad kuwarta.

³⁶ Pagka nadnugan niya ti kadamlan tawu maglawuy, nagpaingana siya magkun, “Hintay nguna tunda?”

³⁷ Sinabi nida sa kanya, “Maglawuy yi duy si Hisus taga Nasarit.”

³⁸ Bag-u nanawag ti buta magkun, “Hisus, kawu linahi ni Dabid, kaawai duy nimu aku.”

³⁹ Sinabihan siya manga tawu manga nag-una sa kan Hisus magkun, “Danga mag-ingay.” Dapat lalu waya gid ngapu nanawag siya magkun, “Kawu duy linahi ni Dabid, kaawai nimu aku.”

⁴⁰ Nagpat-ung si Hisus, bag-u nagsugu siya daraha tabug sa kanya ti buta. Pagka nagpakarani ti buta sa kanya, nagpaingana si Hisus magkun,

⁴¹ “Hintay duy kanmu gustu kang buwatun sa kanmu?” Nagsagut siya, “Kang gustu duy, Panginuun, sa makakit gid kang mata.”

⁴² Sinabi ni Hisus sa kanya, “Makakit yi kawu, pinaayad kawu dahil kawu nagsarig sa kangku.”

⁴³ Susun maghiling yi siya, nagkuyug sa kan Hisus, pagdayawun niya ti Diyus. Pagka nakitan manga tawu ti buta maghiling yi, nagdayaw sida tanan sa Diyus.