Lukas 14 - Hanunuu

Pinaayad ni Hisus ti Tawu Magkarabaga kay Kamang ag Lulud

¹ Pagka sa Sirang Pamahari binan-awan si Hisus usa ka pinunu manga Parisiyu hampay mangaun. Pagka sinmaka siya sa balay kanda tiniidan.

² May nagluwang tag sa kan Hisus usa ka lalaki magkarabaga kay kamang hanggan kay lulud.

³ Nagpaingana si Hisus sa manga manugtudlu Kasuguan hanggan sa manga Parisiyu magkun, “Angay aw sa Kasuguan aw ngatay unman nu magpaayad sa may manga sakit nu Sirang Pamahari?”

⁴ Dapat sida udyi ngap inmingay. Nakan hiniyaptan ni Hisus ti may sakit ag pinaayad niya. Bag-u sinabi ni Hisus sa kanya, “Ta duy, pag-uli yi kawu.”

⁵ Bag-u sinabi ni Hisus sa kanda, “Si unu nguna sa kanyu ti balaw mamawi sa kay anak lalaki una sa kay tudu baka nu abi nalagpak sa kali sa Sirang Pamahari?”

⁶ Udyi nakasagut sida.

Mayad nu Matinanggapun ag Mapinakumbabaun

⁷ May tinaban waya iba tunda pag Parisiyu tag sa kay balay hampay mangaun. Pagka nakitan ni Hisus kanda pagpiliun ti manga mayad pag tukawan, itinultul niya sa kanda ti usa ka pahalimbawa magkun,

⁸ “Nu ban-awun kawu una hintay pag tawu atag sa pamasaruhan, danga kamu magtukaw sa mayad pag tukawan, barang may binan-awan waya siya lalu man mataas sa kanmu.

⁹ Dumulud ti apu may pamasaruhan tag sa kanmu hanggan tag sa kanya bag-u sumabi siya sa kanmu magkun, ‘Pagtindug duy kawu hampay siya maan ti tumukaw sitay.’ Bag-u mangay-a yi lang kawu, miuli kawu sa basta basta pag tukawan.

¹⁰ Nu kawu ban-awun tag sa karan-an, pag-ati yi kawu pagtukaw sa basta basta pag tukawan hampay nu rumas-ug sab ti nagban-aw sa kanmu, sumabi siya sa kanmu magkun, ‘Sitay duy kawu sa mayad pag tukawan.’ Nu katida may kadayawan yi kawu sa atubangan tanan manga kasaru nimu sa karan-an.

¹¹ Dahil ti kada magpalabaw-labaw ipaababa ag ti mapinakumbabaun ipaabwat.”

¹² Sinabi diman ni Hisus sa nagban-aw sa kanya pag Parisiyu magkun, “Nu kawu mag-alistu yabas ngatay yapun, danga ban-awun nimu tag sa karan-an kanmu manga kakilala, una kanmu manga patar-ari, una kanmu manga katawuhan, una kanmu kamalay manga mayaman. Barang kawu maan ti ban-awun nida ag balusan kawu karan-an.

¹³ Dapat nu maghanda kawu karan-an, ban-awun nimu ti manga pugri, ti manga may pungkul, ti manga pilay hanggan ti manga buta.

¹⁴ Kawu papaladan gid Diyus dahil unman sida may kang-ud ibalus sa kanmu. Balusan kawu aban Diyus sa katpung pagkabuhi uman manga magpasakup sa kanya.”

Ti Pahalimbawa sa Daka pag Karan-an

¹⁵ Pagka nadnugan inda usa ka kasaru ni Hisus sa karan-an, magkun siya sa kan Hisus, “Masulung ti manga kumaun sa karan-an sa kaharian Diyus.”

¹⁶ Bag-u sinabi ni Hisus sa kanya magkun, “May usa ka tawu naghanda daka pagka karan-an. Mayamu kay binan-awan.

¹⁷ Pagka katpung yi manyapun sinugu niya kay panawuhun hampay ban-awan ti manga pinaalaman magkun, ‘Kamu pagluwang yi, dahil manhayin yi.’

¹⁸ Dapat sida tanan bilang ga nagkaraminsan kanda naisipan naningyanan. Ti usa nagsabi sa panawuhun magkun, ‘May binili aku daga, kailangan aku umatag kang duawan. Patawada lang, unman aku makaasan.’

¹⁹ Magkun maan ti usa ka tawu, ‘May binili aku sampulu ka tudu baka, atabug dapu aku hampay samitan iaradu. Una aku balaw asan, bukun may daut.’

²⁰ Magkun ti usa, ‘Bag-u waya aku nangasawa, nakan ngani balaw aku makaasan tag.’

²¹ Nuli maan ti panawuhun itinultul sa kay amu kanda manga singyanan. Bag-u nagalit gid ti may puun balay, magkun sa kay panawuhun, ‘Pag-ati kawu kadali sa manga karsada hanggan sa manga dalan dariit sa banwa, tabana nimu sitay tag ti manga pugri, ti manga may pungkul, ti manga buta hanggan ti manga pilay.’

²² Pagka nuli maan ti panawuhun magkun siya, ‘Duy, binwat yi niku kanmu sinabi, dapat may imaw waya rugar.’

²³ Magkun kay amu sa kay panawuhun, ‘Pag-atag kawu sa manga dalan hanggan sa manga sugkadan balay, pilita gid ti manga tawu pagsaka gid sida hampay mapnu kang balay.

²⁴ Dahil pagsabihun niku sa kanyu, ti tanan tawu kang pinaalaman sa kabag-u unman nagluwang, unman makasamit kang karan-an.’ ”

Isipa dapu bag-u Magsunud sa kan Hisus

²⁵ Kinmuyug sa kan Hisus ti lalu mayamu pag tawu. Bag-u napasrangu siya atag sa kay manga kaibahan magkun,

²⁶ “Una si unu pag tawu ti pumakarani sa kangku dayu mahimu kang tuludluan nu ipalabi niya kay ina hanggan kay ama, kay asawa, kay manga anak hanggan kay manga patar-ari, una kay sadili.

²⁷ Nu ti tawu unman magpas-an kay sadili pag kurus ag kumuyug sa kangku, balaw mahimu tuludluan niku.

²⁸ “Nu ti usa sa kanyu may gustu magbuwat balay daka, tumukaw dapu siya isipun niya ngatay kumang-ud kay panggastus hanggan tugka sa mamhan kay balay.

²⁹ Barang nu inalistu niya ti patakinan tulduk bag-u unman mamhan ti balay, ti tanan nakakit maglibak yi sa kanya,

³⁰ magkun, ‘Nag-umpisa nagbuwat siya balay dapat unman nakakamhan siya, kurang yi sa gastus.’

³¹ Una hintay pag hari nu sumulang dumugma sa gira sa kaparihu hari, tumukaw dap bag-u kay karkulahun ngatay makaatubang siya may sampulu ka libu sundalu sa kalaban niya nu umaput may duwapulu ka libu.

³² Nu unman siya pumanghas, pumasugu siya atag sa kalaban nu arayu waya hampay magkarasunduan lang sida.

³³ Katunda diman una si unu sa kanyu balaw mahimu kang tuludluan nu pagpahalgaan waya niya ti tanan sa kay buhi.”

Nu Tumab-ang ti Asin

³⁴ Magkun si Hisus, “Mayad ti asin, dapat nu tumuhay kay lasa, unman yi may ipapait,

³⁵ udyi may gana una sa daga una sa rayamtan yagting bulul-an abunu, nakan iyamut yi lang. Ti may tuli kailangan pagpatingi.”