Lukas 12 - Hanunuu

Danga Magpabalhinguun

¹ Nagtiripun ti mayamu pag linibu tawu, nanarat-an yi dahil sa kayamuan. Magkun si Hisus sa kay manga tuludluan, “Pag-aman kamu sa magpabalhinguun manga Parisiyu, parihu ga pamadaka sa tinapay kay ugali.

² Unman may bagay milihim nu unman mihayag di gid aban. Unman may bagay mitagu nu unman mabulwat di aban.

³ Nakan ngani una hintay kanyu sinabi sa basad madlum madnugan di aban sa marayaw. Ti manga iyinanas niyu sa sulud-sulud itawag aban gin sa maalantaw.”

Ti Dapat Nita Kadalaan

⁴ Magkun si Hisus, “Pagsabihun niku sa kanyu duy sa manga kaibahan niku, danga niyu kadalai ti manga magmatay sa bilug. Nu sida nakamatay yi, udyi sida may mabuwat.

⁵ Dapat kang ipakilala sa kanyu nu sitapu ti kanyu kailangan pagkadalaan. Ti kanyu kadalaan ti Diyus gid. Dahil nu minatay niya ti usa ka tawu, may kapangyarihan siya hampay kay iyamut waya sa impirnu. Tutuu kang pagsabihun sa kanyu kailangan kamu pagkadala gid sa kanya.

⁶ “Unman aw ipagpabili nida ti lima ka maya sa mababang halaga? Dapat una lang usa ka maya balaw malimtan, mag-akitan di Diyus.

⁷ Una paman kanyu buhuk nabilang yi tanan. Nakan ngani danga kamu magkadala. Kamu mahalaga man sa mayamu pag maya.”

Kilalan-un si Kiristu sa Atubangan manga Tawu

⁸ Sinabi ni Hisus magkun, “Dapat pagsabihun niku sa kanyu, una si unu ti maggalang sa kangku sa atubangan manga tawu, kilalan-un diman siya Anak Tawu sa atubangan manga anghil Diyus.

⁹ Dapat ti magtanggi sa kangku sa atubangan manga tawu, itanggi diman waydi siya Anak Tawu sa atubangan manga anghil Diyus.

¹⁰ “Una si unu ti bumagaw laban sa Anak Tawu may patawad di. Dapat ti tawu nu maglapastangan laban sa Ispiritu Banal balaw yi patawadun.

¹¹ Nu kamu darahun sa simbahan manga Hudiyu hampay bistahun una sa atubangan manga Pinunu una sa atubangan manga gubirnadur, danga kamu magkakuri nu kabitay ti isagut ngatay nu hintay kanyu sabihun.

¹² Dahil itudlu Ispiritu Banal sa kanyu sa ati katpung ti dapat niyu sabihun.”

Ti Pahalimbawa sa Tawu Naluku sa Kayamanan

¹³ May usa ka tawu sa kayamuan naghampang sa kan Hisus magkun, “Maisturu, paanyua duy nimu kang patar-ari aku hurayi kanmi ama yaman.”

¹⁴ Dapat sinabi ni Hisus sa kanya, “Duy, si unu nguna ti nagpakaun karampatan sa kangku hampay magpaanyu mag-ayaw-ayaw kanyu ginurang sangkap?”

¹⁵ Bag-u sinabi niya sa kanda, “Pag-ingat gid kamu, pag-aman kamu agud kanyu tagipusuun unman maramuun. Dahil ti tawu balaw kumakit buhi nu sa abunda lang pag kasiyunan.”

¹⁶ Itinultul ni Hisus sa kanda ti usa ka pahalimbawa magkun, “May tawu mayaman daka gid kay tubas.

¹⁷ Inisip niya sa kay sadili, ‘Hintay kang buwatun, dahil unman yi may paulian aku kang inani?’

¹⁸ Bag-u magkun siya, ‘Kainda kang buwatun, dautun yi lang niku kang manga daan balay haramnuan bag-u buwatun niku utru manga daka man sa siti. Ti tanan niku inani isukad maan niku siti hanggan kang manga butang.

¹⁹ Bag-u sumabi sa kang sadili bilug, mayamu yi kang kasiyunan kinarinu sa kang butangan, kang-ud sa mayamu pag timpu. Magpahari aku kang bilug, kumaun, uminum, magbaya waya aku.’

²⁰ Dapat kay sabi Diyus sa kanya, ‘Kawu pag tawu ga ud may namuangan. Sab yabi bul-un yi niku kam buhi. Kanmu itinigana hamnu kantapu yi nguna aban tida?’ ”

²¹ Magkun si Hisus, “Katunda ngani ti mangyari sa tawu nu magpakatipun kayamanan sa kay lang sadili bag-u nu sa kay magbantay Diyus ga pugri lang pag tawu.”

Sarigan Nita ti Diyus

²² Sinabi ni Hisus sa kay manga tuludluan magkun, “Nakan ngani magkun aku sa kanyu, danga kamu magkaaburidu sa kanyu pangabuhi nu hintay kanyu kan-un, una sa kanyu bilug nu hintay kanyu irutay.

²³ Dahil ti buhi balaw lang ga sa karan-unun, ti bilug balaw lang ga rutay kay kahalaga.

²⁴ Isipa niyu ti manga uwak. Unman sida magpamgas, unman mag-ilamun, unman may muug, una balay haramnuan. Dapat sida pag-alagaan Diyus. Kamu lalu mahalaga man sa manuk.

²⁵ Una magpakaaburidu ti tawu unman makapadugay kay buhi una lang usa ka udas.

²⁶ Una diit lang pag bagay nu dayu mabuwat niyu, hayga lugud aburidu kamu sa manga iba bagay?

²⁷ Isipa niyu nu kabitay ti ilamnun magbusang sa padang, unman sida magkabudlay, unman diman magtahi kanda rutay. Dapat kang pagsabihun sa kanyu, una paman si Sulumun unman makasulung magilang-gilang parihu sa busang ilamnun madi masyadu marinu kay manga rutay.

²⁸ Ti kugun pinasulungan Diyus ga rutay malatuy. Nu kainda ay buhi sa bantud, aldaw bay ipagba yi sa sapyaan. Unman aw lalu gid pihu kamu pakan-an niya rutay. Hayga lugud diit lang kanyu pagsarig sa Diyus?

²⁹ Danga magkaaburidu kanyu naisipan sa kanyu paghanap karan-unun hanggan kanyu danum.

³⁰ Dahil tunda pag manga bagay pagkaaburiduhan manga tawu unman magpasakup sa Diyus. Magkaalaman kabay niyu Ama kamu may kailangan tunda pag manga bagay.

³¹ Una una sa tanan, unaha niyu kanyu sadili ipasakup lubus sa kay paghari Diyus, bag-u kanyu pangangailangan ipakaun niya sa kanyu.”

Ti Kayamanan sa Langit

³² Sinabi ni Hisus magkun, “Danga kamu magkadala una kamu ga balaw mayamu, dahil kay ibug ngapu niyu Ama iintirga sa kanyu ti kaharian.

³³ Ipabili niyu kanyu manga kasiyunan bag-u pagpakaun sa manga pugri kay kabilyanan. Pag-alistu kamu kanyu sukluban balaw magkadaut, tipunun niyu kanyu kayamanan sa langit. Ati unman mabawas ti kayamanan, una mananakaw, una tipakung dayu gumaraw.

³⁴ Dahil nu naan kanyu kayamanan, ati diman waydi kanyu isip.”

Alistu ti manga Panawuhun sa Pagras-ug Nida Amu

³⁵ Magkun si Hisus, “Paghawuda kanyu rutay sa unman masambur sa magtarabahu, pagmasnag kanyu manga sulu.

³⁶ Parihu sa manga tawu mag-alagad sa kanda amu mag-uli ginan sa karan-an sa pamasaruhan. Nu rumas-ug siya tumaragham lang, rargu bukasan nida ti sabian.

³⁷ Mapalad ti manga panawuhun naras-ugan nida amu, nu maimatahan di sida mag-alagad. Ungud duy kang pagsabihun sa kanyu, humawud ngap kanda amu kay rutay sa unman masambur bag-u pagtabanun niya sida sa lamak, siya yi ti manugbasiyu.

³⁸ Mapalad tunda pag manga panawuhun nu sida ras-ugan nida amu maimatahan di mag-alagad una karaw-an yabi, una tag magkasurip.

³⁹ “Dapat isipun niyu inda, nu abi naalaman lang may puun balay nu kapira pag rumas-ug ti mananakaw, balaw mana pabay-anan niya ipatakaw kay butang sa balay.

⁴⁰ Nakan ngani kailangan pirmi kamu alistu dahil rumas-ug ti Anak Tawu nu katpung udyi kanyu pag-isipun.”

⁴¹ Sinabi ni Pidru magkun, “Panginuun, ti kanmu binagaw pahalimbawa ngatay sa kanmi lang ngatay sa tanan tawu?”

⁴² Sinmagut ti Panginuun magkun, “Ti panawuhun nu matinupadun ag mapininsaran imaw ti pagpiyaran niya amu hampay pakan-an niya karan-unun kay kaparihu manga panawuhun may bahaw may yabas may yapun.

⁴³ Masulung tunda pag panawuhun pagka naras-ugan siya magtupad sa kay buruwatun sa kay pagbalik niya amu.

⁴⁴ Kang pagsabihun sa kanyu, iintirga niya amu sa kanya ti tanan kasiyunan.

⁴⁵ Dapat nu alangan tunda pag panawuhun umisip siya sa kay sadili, dugay waya bag-u bumalik kang amu. Bag-u binakul yi niya ti manga panawuhun lalaki hanggan babayi bag-u nanginum may sumsuman siya.

⁴⁶ Bumalik kay amu tag sa tunda pag panawuhun sa sirang unman pag-isipun niya kuntay rumas-ug kay amu ati katpung ag sa udas unman niya naalaman. Bag-u barian yi siya sa parusa niya amu, iminsan lang siya sa unman manga masurundun.

⁴⁷ Dahil ati pag panawuhun nakaalam sa kay amu daan bilin, dapat ay unman nag-alistu, unman diman naniwala sa kay bilin, nakan duru yi pagkabakul sa kanya.

⁴⁸ Dapat ti unman nakaalam sa kay amu daan bilin, bag-u bumuwat siya daut kailangan siya bakulun, dapat balaw masyadu waydi kay bakul sa kanya. Nu mayamu ti ipinakaun sa usa ka tawu mayamu diman ti paghanapun sa kanya. Nu mas lalu mayamu ti inintirga sa kanya, lalu diman ngap ti paghanapun sa kanya.”

Naduwa ti manga Tawu dahil sa kan Hisus

⁴⁹ Magkun si Hisus, “Nagsitay aku hampay magdara apuy sitay tag sa daga, kang gustu lumabdab yi mana.

⁵⁰ May paglakawan waya aku aban usa ka tulbaw. May kabuyatan gid aku sa kang tagipusuun hanggan sa udwaya matupad kang tulbaw.

⁵¹ Kanyu aw lugud pag-isipun aku nagsitay hampay magpakaun kahusayan sa babaw daga? Kang gid pagsabihun sa kanyu, bukun kahusayan, unman ngap, udyi magkarausa ti manga tawu.

⁵² Dahil taynguna ginan halimbawa sa usa ka magtal-anakan sida lima ka tawu udyi magkarausa, tulu lumaban sa duwa ag duwa lumaban waydi sa tulu.

⁵³ Udyi sida magkarausa, ti ama lumaban sa anak lalaki, ti anak lalaki lumaban waydi sa kay ama. Ti ina lumaban sa kay anak babayi, ti anak babayi lumaban waydi sa kay ina. Ti manugang babayi lumaban sa kay umagad babayi, ti umagad babayi lumaban waydi sa kay rinas-ugan babayi.”

Intindiha ti manga Bagay Mag-akitan

⁵⁴ Sinabi diman ni Hisus sa manga kayamuan magkun, “Nu makitan niyu ti rurum magtunggur sa abagatnan sumabi yi kamu, ‘Magkauran yi,’ ag dumayun ngap.

⁵⁵ Nu makitan niyu ti durus maghuyup ginan sa salatan, sumabi kamu, ‘Magbadbaray yi aban ti init,’ ag dumayun ngap.

⁵⁶ Manga magpabalhinguun lang kamu. Madunung kamu magkilala sa manga histuda langit ag daga. Bati unman kamu nakaisip kay halaga kainda pag kaudasan.”

Paghanap Kawu Paraan sa Unman Madara tag sa Huwis

⁵⁷ Sinabi ni Hisus magkun, “Hayga unman kamu madunung magpili sa kanyu sadili buruwatun sa daut sa mayad?

⁵⁸ Halimbawa nu may magdimanda laban sa kanmu sa atubangan husgadu, paghurusayan dapu kamu mintaras may rugar waya hanggan sa udwaya nakaaput sa husgadu. Barang karudkudun kawu nimu kalaban atag sa talaghusay, ipabahala kawu talaghusay atag sa pulis, bag-u pirisuhun kawu pulis.

⁵⁹ Kang gid pagsabihun sa kanmu, unman gid kawu makalpas hanggan sa unman waya matabwan mabayadan nimu kam utang.”