Lukas 11 - Hanunuu

Kay Tudlu ni Hisus tungkul sa Darangin

¹ Pagka dugay nandarangin si Hisus sa usa ka rugar. Pagka nakatapus kay darangin magkun ti usa ka tuludluan sa kanya, “Panginuun, tudlui nimu kami darangin parihu sa kan Huwan nanudlu sa kay manga tuludluan.”

² Magkun siya sa kanda, “Kainda kamu nu magdarangin magkun, ‘Amang, mana dayawun manga tawu kanmu ngaran, mana kawu ti maghari sitay sa babaw daga.

³ Ipakaun nimu sa kanmi ti karan-unun kanmi kailangan sirang-sirang.

⁴ Patawada nimu kanmi manga kasalanan dahil pinmatawad waydi kami sa kada tawu may kasalanan sa kanmi. Danga ipalakaw nimu kami sa mahigpit pagsubuk.’ ”

⁵ Sinabi ni Hisus sa kanda, “Abi nangus kawu may kakilala, umati kawu sa kanya karaw-an yabi sumabi sa kanya, ‘Duy, paudama aku karan-unun,

⁶ dahil rinmas-ug sa kangku kang usa ka kakilala sa arayu ginan, udyi aku may itanyag sa kanya.’

⁷ Sumagut aw lugud siya gin bad balay, ‘Danga masamuk. May talakup yi ti sabian, kaibahan niku kang manga anak sa igyaan. Unman aku makabangun ag makapakaun sa kanmu.’ ”

⁸ Magkun si Hisus, “Pagsabihun niku sa kanyu, una unman siya bumangun magpakaun sa kanmu dahil kay yi waydi kakilala kawu, bumangun yi lang ag pumakaun una hintay kanmu kailangan, dahil pag-aringun nimu siya.

⁹ Kang gid pagsabihun sa kanyu, panhagad kamu hampay kamu pakan-an, panhanap kamu hampay makakit. Pagtaragham kamu ginan sa luwas bag-u bukasan ti sabian.

¹⁰ Dahil ti tawu nu maghagad pakan-an, ti tawu nu maghanap may makitan siya, tigtaragham ginan sa luwas bukasan sa kanya ti sabian.

¹¹ “Kamu pag manga ama, nu maghagad ti anak tinapay, kanyu aw lugud pakan-an batu? Nu abi humagad ti anak isda, ulay aw lugud ti ipakaun, bukun aw isda?

¹² Nu maghagad ti anak itlug, pakan-an aw lugud niyu siya alutatip?

¹³ Madi kamu manga makasalanan, madunung diman kamu magpakaun mayad pag pakaun sa kanyu manga anak. Lalu ipakaun niyu Ama sa langit ti Ispiritu Banal sa tawu nu maghagad sa kanya.”

Si Hisus ag si Biilsibul

¹⁴ Pagka dugay may ipinalwas si Hisus labang magpabuyun ginan sa tawu. Pagka linmuwas ti labang, binmagaw yi ti tawu. Nadulaw gid ti kayamuan tawu.

¹⁵ Dapat magkun ti iba, “Nakan makapalwas tunda pag tawu manga labang, dahil may kapangyarihan siya ginan sa kan Biilsibul sa hari manga labang.”

¹⁶ Pagsulayun manga iba si Hisus, hinanapan siya makadululaw pag manga tanda, nu ngatay siya ginan sa Diyus.

¹⁷ Dapat alam di ni Hisus kanda pag-isipun. Magkun siya sa kanda, “Marangga ti kada kaharian nu udyi magkarausa, nu magpakalabanan wadi sida. Nu ti usa ka magtal-anakan mag-arawayan mabugtas yi ti magmalahalan.

¹⁸ Nu abi labanan ni Satanas kay sadili udyi gid dumugay kay kapangyarihan, mawasak yi. Pagsabihun niyu aku magpalwas manga labang dahil may kabisugan ginan sa kan Biilsibul.

¹⁹ Si unu lugud ti nagpakaun kapangyarihan sa kanyu manga tuludluan hampay makapalwas manga labang. Nakan kanda ngap pagbuwatun imaw ti puruyba kuntay kamu manga salan.

²⁰ Dapat nu ginan sa Diyus kang kapangyarihan hampay magpalwas manga labang, ibug sabihun rinmas-ug yi ngap sa kanyu ti paghari Diyus.

²¹ “Nu ti mabisug pag tawu armadu magbantay sa kay balay, unman may makagaraw kay manga butang.

²² Dapat nu labanan siya lalu mabisug pag tawu, talu siya, bag-u bul-un sa kanya ti armas kay pagsarigan hanggan kay naagaw pag manga butang paghuray-hurayun.

²³ Ti unman pabliwa sa kangku, kalaban niku. Ti unman umawat sa kangku sa kang magpatipun, imaw ti magwatak.”

Kay Pagbalik Labang

²⁴ Magkun si Hisus, “Pagka linmuwas ginan sa usa ka tawu ti labang, maglakaw siya sa manga tigangan daga, maghanap kay paraharyan. Nu ud may makitan, mag-isip siya sa kay sadili magkun, mag-uli yi maan aku sa balay kang inighitan.

²⁵ Sa kay pagras-ug niya nakitan niya pinarisan marayaw yi ti balay.

²⁶ Nakan mag-ati siya manaban pitu waya maan ka labang daut man sa kanya. Magsulud sida mangulian ati. Nakan ngani makuri man masyadu balaw lang ga kaybi kay uryan pag kahamtangan tunda pag tawu kay inapuan.”

Ti Tutuu pag Papalad Diyus

²⁷ Magbagaw waya si Hisus, may usa ka babayi ati sa kayamuan tawu nagbagaw daka magkun sa kanya, “Pinapaladan Diyus ti babayi nag-anak sa kanmu ag nagpasusu sa kanmu.”

²⁸ Dapat sinabi ni Hisus, “Lalu waya papaladan Diyus ti manga tawu nu magpatingi sa kay bagaw bag-u kanda pagtupadun.”

Paghanapun manga Tawu ti Makadululaw pag Tanda

²⁹ Pagka nag-amat nagyamu ti tawu nagpakarani sa kanya, magkun si Hisus, “Daut gid ti manga tawu kainda, maghanap sida tanda, dapat unman pakakitan tanda purya lang sa nangyari ati katpung sa kan Purupita Hunas.

³⁰ Dahil nu kabitay si Hunas kaybi usa ka tanda sa manga tawu taga Ninibi, katunda diman ti Anak Tawu aban usa ka tanda sa manga linahi taynguna.

³¹ Sa kaudasan pagsintinsiya Diyus, ti Rayna ginan sa salatan baliwa kumastigus laban sa kanyu, dahil ginan waya siya sa arayu pag rugar hampay patingihan kay kadunungan ni Sulumun. Taynguna atay ti mas higit waya sa kan Sulumun, dapat unman kamu magpatingi sa kanya.

³² Pagka kaudasan sintinsiya aban kumastigus ti manga taga Ninibi laban sa kanyu. Dahil pagka sida nakadnug kan Hunas ibinarita, ti manga taga Ninibi nag-ampu nagpatawad sa kanda manga kasalanan. Dapat balaw di ga kan Hunas ti nagsitay kainda sa kanyu.”

Kanmu Mata ti Pinagkasulu sa Kanmu Bilug

³³ Sinabi ni Hisus magkun, “Unman may magsulu kay duag bag-u itagu sa unman mag-akitan, una abi sa sirung salupan, nu unman isalingat ngap sa sag-angan hampay ti manga magsaka maghiling marayaw.

³⁴ Kanmu mata ti pinagkasulu sa kanmu bilug. Nu malinaw kanmu pamantay lubus marayaw ti buu nimu bilug. Dapat nu madulum kanmu pamantay, lubus madulum ti buu nimu bilug.

³⁵ Nakan ngani pag-aman kawu barang kanmu pagsarigan pag karayawan tunda ngap madlum.

³⁶ Nakan nu lubus marayaw ti buu nimu bilug ag udyi may patakip lunsay yi marayaw gid, parihu kawu ga sa atubangan sulu magkarayawan.”

Pat-ama Laban sa manga Parisiyu hanggan Manugtudlu Kasuguan

³⁷ Pagka nag-apas si Hisus kay paliwanag, tinaban siya usa ka Parisiyu manyabas yi sida. Nakan nagsaka siya tinmukaw sa puun lamak.

³⁸ Pagka nakitan Parisiyu unman nangugas kamang si Hisus bag-u magkaun, nadulaw siya.

³⁹ Sinabi Panginuun sa kanya, “Kamu pag manga Parisiyu kanyu pag-ugasan ti habig lang taya manga ungut. Dapat sa kanyu sulud bilug maramuun kamu ag lunsay kadautan.

⁴⁰ Ga ud may namuangan baga kamu. Unman aw Diyus ti nagbuwat kay bilug hanggan sa sulud bilug?

⁴¹ Kailangan ipakaun niyu sa manga pugri kay sukad niyu manga taya bag-u udyi may daut sa kanyu surundanun.

⁴² “Dapat anung kaawaawa kamu pag manga Parisiyu, dahil kamu magpakaun ikasampulu manga pamanglu sa upi hanggan tanan manga urupiun, dapat kanyu kinalimtan ngap ti katadlungan hanggan ti pagmahal sa Diyus. Kailangan kanyu tupadun ti katadlungan hanggan ti pagmahal sa Diyus, dapat danga waydi paglimti ti manga ikasampulu, pagpakaun di.

⁴³ “Anung kaawaawa kamu pag manga Parisiyu. Dahil kanyu pagkaibgan ti manga marinu gid pag tukawan sa sulud simbahan ag kanyu diman gustu kamu paggalangun manga tawu sa palingki.

⁴⁴ Anung kaawaawa kamu, dahil kamu parihu sa manga lubung unman may tanda. Pagtat-an manga tawu unman nida alam lubung maaw.”

⁴⁵ Ti usa ka manugtudlu Kasuguan nagsabi sa kan Hisus magkun, “Maisturu, sa kanmu sinabi kis-ab duy kami hanggan nahaplitan.”

⁴⁶ Magkun si Hisus, “Anung kaawaawa kamu diman pag manga manugtudlu Kasuguan, dahil ipagpapas-an niyu sa manga tawu ti manga mabuyat pag dararan-un udyi maraug. Dapat una kanyu ituturu unman niyu pag-iantabay sa manga mabuyat dararan-un.

⁴⁷ Kaawaawa kamu dahil kamu tigparinu sa manga lubung purupita minatay niyu manga ginurang.

⁴⁸ Siti pag mag-akitan kamu magpaangay diman waydi sa binwat daut niyu manga ginurang. Dahil kanda minatay ti manga purupita ati kaybi bag-u kamu tigbuwat parinu sa kanda manga lubung.

⁴⁹ Nakan ngani magkun ti Diyus angay sa sadili kadunungan, ‘Sumugu aku manga purupita, manga manugtudlu sa kanda. Ti iba kanda matyun, kay iba unu-unuhun.’

⁵⁰ Nakan mitama gid sa inda pag manga tinubu tawu ti kaparusahan tungkul sa tanan purupita minatay ginan waya sa kabag-u pagkalalang kalibutan,

⁵¹ ginan sa pagkamatay ni Abil hanggan waya sa pagkamatay ni Sakaryas. Minatay si Sakaryas karaw-an sugkadan Balay Diyus arani sa surunugan handug tag sa Diyus. Ungud duy kang sinabi sa kanyu mitama gid tunda sa inda pag manga tinubu tawu.

⁵² “Kaawaawa kamu, ti manugtudlu sa Kasuguan, dahil inirangan niyu ti susi ti magbukas sa kadunungan, kamu dayu magsulud, kanyu pag-amparahun waya ti manga magkaibug magsulud.”

⁵³ Naglakaw si Hisus siyun gin pag balay. Ati ginan ti manga manugtudlu Kasuguan hanggan manga Parisiyu magkadaut yi masyadu mag-away sa kanya. Mayamu kanda manga paingana sa kanya.

⁵⁴ Kanda yi mana pagpasalanun sa kay magsagut.