Lukas 10 - Hanunuu

Sinugu ni Hisus ti Pitumpulu may Duwa ka Tawu

¹ Bag-u nagpili waya ti Panginuun pitumpulu may duwa ka tawu. Sinugu niya sida tigudwa tigudwa hampay mag-una sa kanya atag sa kada banwa hanggan kada pinuru tawu kay gayak diman atihan.

² Sinabi niya sa kanda, “Mayamu duy pag aranyun, dapat kurang ti manug-ani. Nakan pagdarangin waya kamu sa Panginuun imaw ti may puun aranyun hampay sumugu waya manga manug-ani sa kay aranyun.

³ Paglakaw yi gid kamu, malu pagsuguun niku kamu ga manga anak karanidu tag sa karaw-an masimarun idu.

⁴ Danga kamu magdara sukadan kuwarta ngatay bay-ung, una lapak. Dagkahilig sa harampangan una sa kantapu sa dalan.

⁵ Una naan pag balay kanyu sakahan sabiha dap sa kanda, ‘Pagmay kahusayan ti may apu inda pag balay.’

⁶ Nu ati may magbaya sa kahusayan, nangulian yi sa kanya kanyu kahusayan, dapat nu unman waydi unman matanggap niya ti kahusayan.

⁷ Pagsiyun dapu kamu sa balay tunda, pagkaun pag-inum una hintay kanda ihayin sa kanyu, dahil kailangan suhulan ti manugbuwat. Danga kamu pahalin-halin sa usa ka balay tag sa usa ka balay.

⁸ Nu kamu magsulud sa usa ka banwa nu kanda tanggapun kamu, kan-a niyu una hintay kanda ihayin sa kanyu.

⁹ Paayada niyu ti may manga sakit ati ag kanyu sabihun sa kanda, ‘Nagpakarani yi sa kanyu kay paghari Diyus.’

¹⁰ “Dapat nu kamu magsulud sa usa ka banwa nu unman kamu tanggapun nida, pag-ati kamu sa manga karsada nida pagkun kamu,

¹¹ ‘Alamun niyu inda arani yi kay paghari Diyus sa kanyu. Kami balaw madamay sa kay sintinsiya Diyus aban sa kanyu, nakan una ti galbuk niyu banwa nakahuput sa kanmi raprapa pagpagun yi nimi bilang ga puruyba sa kanyu magdayu sa Diyus.’

¹² Kang pagsabihun sa kanyu nu kaudasan pagsintinsiya Diyus aban lalu waya makuri kay kaparusahan malakawan tawu siyun pag banwa balaw lang ga sa manga taga Suduma.”

Kaawaawa ti manga Unman Nag-ampu sa Kanda Kasalanan

¹³ Sinabi ni Hisus magkun, “Kaawaawa kamu pag manga taga Kurasin, kaawaawa kamu hanggan pag manga taga Bitsayda, dahil nu abi sa banwa Tiru una sa banwa Sidun pag nabuwat ti manga makadululaw kang binwat sitay sa kanyu, dugay yi mana nanrutay rutay daan, nagtukaw sa dapug ti manga taga ati hampay ipakilala kanda nag-ampu nagpatawad yi sa kanda kasalanan.

¹⁴ Dapat kang pagsabihun sa kanyu, nu kaudasan yi sintinsiya aban, lalu waya mabuyat kay sintinsiya Diyus sa kanyu balaw lang ga manga taga Tiru ag Sidun.

¹⁵ Kawu pag banwa Kapirnaum, gustu aw nimu pumaabwat hanggan tugka sa langit? Idugsak baga kawu sa ulian manga namatay.”

¹⁶ Sinabi ni Hisus sa kay manga tuludluan magkun, “Ti magpatingi sa kanyu, magpatingi diman waydi sa kangku. Ti magdayu sa kanyu, magdayu diman waydi sa kangku. Ti magdayu sa kangku, magdayu diman waydi sa nagsugu sa kangku.”

Nuli maan ti Pitumpulu may Duwa ka Tuludluan

¹⁷ Nuli yi maan ti pitumpulu may duwa ka tuludluan. Magbaya gid sida magkun, “Panginuun, una ti manga labang nagpaniwala sa kanmi pagka sinugu nimi sa kanmu ngaran.”

¹⁸ Sinabi ni Hisus sa kanda, “Nakitan niku si Satanas nalagpak ginan sa langit parihu sa kilat.

¹⁹ Malu, inintirga yi niku kang kamaskihan sa kanyu hampay tat-an niyu ti manga ulay hanggan alutatip, hampay manalu kamu sa tanan kamaskihan ni Satanas ag unman may makadisgarasya sa kanyu.

²⁰ Dapat duy danga kamu magbaya dahil ti manga labang magpaniwala sa kanyu. Lalu ngap kamu pagbaya dahil kanyu manga ngaran ilinista yi Diyus sa langit.”

Magbaya si Hisus

²¹ Ati katpung pinakan-an si Hisus lubus pag kabayaan Ispiritu Banal. Kay sinabi, “Magpasalamat aku sa kanmu, Amang, kawu ti Panginuun sa langit hanggan sa daga. Magpasalamat aku dahil unman ipinaalam nimu inda pag manga bagay sa manga madunung ag sa manga mapininsarun, dapat ipinakilala ngapu nimu sa manga tawu ga anak kay tagipusuun. Hu ngani duy Amang, dahil katunda yi kanmu kagustuhan.

²² Ipinabahala niku Ama sa kangku ti tanan manga bagay. Unman may nakakilala sa Anak nu unman ti Ama lang. Unman waydi may nakakilala sa Ama nu unman ti Anak lang, hanggan una hintay ti piliun Anak hampay ipakilala sa kanya ti Ama.”

²³ Nagpasrangu si Hisus naghampang sa kay lang manga tuludluan magkun, “Pinapaladan kamu Diyus dahil kanyu mag-akitan kay makamaskihan buwat niya.

²⁴ Dahil kang gid pagsabihun sa kanyu, mayamu pag manga purupita hanggan manga hari ti naggagad sa kanyu mag-akitan mata dapat sida udyi nakakit, kanda mana gustu sida makadnug dapat udyi sida nakadnug.”

Itinultul ni Hisus ti Usa ka Tawu Taga Samarya Maawaun

²⁵ Bag-u nagpakarani ti usa ka manugtudlu Kasuguan, kay pagsubukan niya si Hisus magkun, “Maisturu, hintay kang buwatun hampay makatanggap aku buhi unman may katapusan?”

²⁶ Magkun si Hisus sa kanya, “Hintay ti isinurat sa Kasuguan, kabitay lugud pag nabasa nimu asan?”

²⁷ Sinmagut siya magkun, “Ilubus nimu kanmu tagipusuun, kanmu karadwa, kanmu kabisugan hanggan kanmu pag-iisip sa kanmu pagmahal sa kanmu Panginuun Diyus. Mahala nimu kanmu kaparihu tawu ga kanmu diman pagmahal sa kanmu sadili.”

²⁸ Magkun si Hisus sa kanya, “Tama duy kanmu sagut. Tupada yi ngani nimu tunda hampay may buhi kawu unman may katapusan.”

²⁹ Balaw may gustu ti manugtudlu Kasuguan mahantup kuntay salan kay paingana nakan magkun siya sa kan Hisus, “Si unu nguna kang kaparihu tawu?”

³⁰ Sinmagut maan si Hisus magkun, “May usa ka tawu maglus-ug ginan sa Hirusalim tag sa Hiriku. Pagka sa dalan pinuutan siya manga tulisan. Kanda inagaw kay manga dara bag-u sinaktan, kanda magtayak magkamatay yi.

³¹ Nakalakaw diman siyun lakaw pag dalan ti usa ka manughandug. Pagka nakitan niya tunda pag tawu, nag-ibay siya.

³² Hanggan ti usa ka Libita nakalakaw waydi ati pag dalan. Pagka nakaduaw siya siyun pag tawu, naparargu siya kay lakaw.

³³ “Dapat may tawu taga Samarya nalakaw ati pag dalan. Nakitan niya ati ti tawu mabugtangan, ag naawa gid siya.

³⁴ Nagpakarani siya, binuhusan niya lana hanggan intus kay manga biyag bag-u kay tinalapisan. Bag-u kay ipinasakay sa kay sadili hayup. Dinara niya siya tag sa balay dayunan. Pagka ati siya inalagaan niya mayad.

³⁵ Pagka surip naghakwat ti taga Samarya kay kuwarta, ipinakaun sa may puun balay dayunan magkun, ‘Alagai duy nimu inda pag may sakit. Inda pag kuwarta nu kurang waya kanmu igastus, dugangan niku aban sa kang pagbalik maan sitay.’ ”

³⁶ Magkun si Hisus, “Kanmu isip hintay sa kanda tulu ti nakapag-alaala sa kay kaparihu tawu pinuutan manga tulisan sa dalan?”

³⁷ Magkun ti manugtudlu Kasuguan, “Tunda yi ngani ti nagkaawa nangawat sa tawu sinaktan.” Magkun si Hisus sa kanya, “Ta, katunda yi ngani buwata nimu.”

Si Hisus Nansabang sa Kanda ni Marta ni Marya

³⁸ Sa kanda naglakaw, rinmas-ug si Hisus sa usa ka baryu. May babayi siyun pag baryu, kay ngaran si Marta. Ipinasaka niya si Hisus sa kay balay.

³⁹ Kan Marta ari si Marya, ag si Marya matukawan sa arani Panginuun magpatingi sa kay bagaw.

⁴⁰ Magkaaburidu yi gid si Marta sa kay mag-alistu manga karan-unun dahil mayamu kay buruwatun. Dinmulud siya sa kan Hisus magkun, “Panginuun hayga aku usa lang ti mag-asikasu, pagpabay-anan lang aku ni Marya. Kabitay nguna tida sa kanmu? Sabihi ngani nimu aku awati.”

⁴¹ Sinabi Panginuun magkun, “Marta duy, hayga magkakuri kawu, magkaaburidu gid kawu sa mayamu pag irisipun nimu?

⁴² Usa lang ka bagay gid ti mahalaga, kan Marya pinili ti mayad gid, balaw mab-ul ginan sa kanya.”