Libitiku 9 - Hanunuu

Nag-umpisa ti manga Manug-asiwa sa Kanda Buruwatun

¹ Sa ikawalu pag sirang, matapus ti pagtalaga, tinawag ni Muysis si Aarun hanggan kay manga anak lalaki, ag ti manga takinan sa Israil.

² Magkun si Muysis sa kan Aarun, “Pagbuul kawu usa ka turiti baka hanggan usa ka lalaki karanidu parihu unman may alangan, bag-u handugan sa Panginuun. Tunda pag baka handug sa paglumpiyu kasalanan, ag ti karanidu handug pagsunugun.

³ Bag-u sabihun nimu sa manga Israilita pagdara sida lalaki kambing bilang handug sa paglumpiyu kasalanan. Pagdara diman sida baka hanggan karanidu parihu usa ka timpu kay idad ag unman may alangan bilang handug pagsunugun.

⁴ Pagdara diman sida usa ka lalaki baka hanggan lalaki pag karanidu bilang handug para sa mayad pag pakiusa. Ihandug nida inda minsan sa handug pasalamat may lakay lana, dahil sa tunda pag sirang ipakakit Panginuun sa kanyu kay kadayawan.”

⁵ Nakan dinara ngani buu nasakupan kanda manga handug sa atubangan Turda Taragbuan, ti tanan pag pag-isugu sa kanda ni Muysis. Nagtipun sida tanan siyun sa atubangan Panginuun.

⁶ Magkun si Muysis sa kanda, “Pagsuguun kamu Panginuun buwata niyu tunda pag paghandug hampay ipakakit niya sa kanyu kay kadayawan.”

⁷ Magkun siya sa kan Aarun, “Pagpakarani kawu sa harandugan bag-u ihandug nimu kanmu manga handug sa paglumpiyu kasalanan, hanggan kanmu handug surunugun agud malukat kawu kaibahan kanmu magtal-anakan ginan sa kanyu manga kasalanan. Angay sa sugu Panginuun, ihandug diman nimu ti manga handug tawu hampay malukat sida sa kanda manga kasalanan.”

⁸ Nakan nagpakarani si Aarun sa harandugan bag-u iniyaw niya ti turiti baka bilang handug sa paglumpiyu kasalanan.

⁹ Ti dugu dinara niya manga anak sa kanya, bag-u kay isinawsaw kay ituturu sa dugu ag kay iwinidwisik sa manga sungay sa may suuk harandugan. Ti nasawad pag dugu inuyang niya sa sangput harandugan.

¹⁰ Sinunug niya sa harandugan ti manga taba, ti manga batu, hanggan ti diit pag bahagi atay, angay sa sugu Panginuun sa kan Muysis.

¹¹ Ti taguban hanggan kay paknul sinunug niya sa luwas kampu.

¹² Bag-u iniyaw diman ni Aarun ti hayup bilang handug pagsunugun. Kay dugu tunda dinara niya manga anak sa kanya bag-u iwinidwisik niya sa sangput harandugan.

¹³ Dinara diman niya manga anak ti manga pinahat pag manga bahagi hayup hanggan kay ulu, ag kay sinunug tunda sa harandugan.

¹⁴ Inugasan niya ti tanan bahagi sa sulud tiyan hanggan kay manga lulud, bag-u kay sinunug inda sa harandugan kaibahan ti manga iba waya pag bahagi bilug hayup.

¹⁵ Pagkatapus dinara niya sa karaw-an ti manga handug para sa manga tawu. Iniyaw niya ti kambing bilang handug sa paglumpiyu kasalanan manga tawu parihu sa kay binwat sa kabag-u pag handug hampay malumpiyu siya.

¹⁶ Bag-u dinara diman niya tag sa karaw-an ti hayup para sa handug pagsunugun, ihinandug niya inda angay sa surundanun sa inda pag handug.

¹⁷ Dinara diman niya sa karaw-an ti handug pasalamat. Nagbuul siya siyun gin usa ka akup bag-u kay sinunug sa harandugan dagdag sa handug pagsunugun kada surip.

¹⁸ Iniyaw ni Aarun ti baka hanggan ti lalaki pag karanidu para sa manga tawu bilang handug sa mayad pag pakiusa. Kay dugu tunda dinara niya manga anak sa kanya, bag-u kay iwinidwisik sa sangput harandugan.

¹⁹ Kay manga taba inda pag manga hayup — ti matabul pag ikug, ti taba sa sulud bilug — hanggan ti manga batu ag ti diit pag bahagi atay

²⁰ itinungbaw manga anak ni Aarun sa dubdub manga hayup. Bag-u sinunug yi ngani ni Aarun ti manga taba sa harandugan.

²¹ Angay sa isinugu ni Muysis, ipinaabwat ni Aarun ti manga dubdub hanggan ti sikun baliwa pag balangbang hayup bilang handug pag-ipaabwat.

²² Pagka natapus kay maghandug ni Aarun, ipinaabwat niya kay manga kamang sa manga tawu ag idinarangin niya sida, bag-u nagdugsun siya ginan sa harandugan.

^23-24 Siyun ginan sinmulud sida ni Muysis ni Aarun sa Turda Tiripnan. Sa kanda pagluwas, idinarangin nida ti manga tawu. Bag-u ipinakakit Panginuun kay kadayawan sa atubangan manga tawu sa panab-anan apuy imaw ti nag-irub sa manga handug sa harandugan. Pagka nakitan tunda manga tawu, nanhuruyawan sida sa kabayaan ag linmuhud sa pagsamba sa Panginuun.