Libitiku 6 - Hanunuu

¹ Inda ti pagsabihun Panginuun sa kan Muysis

² tungkul sa maglabag sa kagustuhan Panginuun sa panab-anan pandaya sa kay kaparihu tungkul sa kay manga kasiyunan ipinahamnu aw ngatay iinintirga sa kanya, una abi sa pagtakaw sa tunda pag manga kasiyunan hanggan sa magpanguwarta,

³ ngatay magpamudil tungkul sa bagay nadura kuntay balaw kunu siya nakakit, ngatay magpanumpa sa kapudilan unman niya nabwat ti nabanggit pag manga kasalanan.

⁴ Nu mapatutuuhanan kuntay nagkasala siya, kailangan iuli niya ti tinakaw, ngatay ti bin-ul lakaw sa pandaya, ti manga bagay iinintirga ag ipinahamnu sa kanya, una ti manga nadura pag bagay bag-u nakitan di niya,

⁵ ngatay una hintay pag manga bagay angay sa kay magpanumpa unman sa kanya, dapat ti tutuu asan di. Kailangan iuli niya inda sa kay apu balaw gid may kurang, bag-u kailangan durugan niya 20 pursintu kay halaga. Iayaw niya inda sa kay apu sa sirang manhandug siya bayad sa kay kasalanan.

⁶ Mandara siya sa manughandug usa ka lalaki karanidu unman may alangan, ag ihandug niya sa Panginuun bilang bayad sa kay kasalanan. Mahimu diman bayadan niya pilak katumbas halaga lalaki karanidu angay sa kilu pilak sa kiluhan paggamitun manga manughandug.

⁷ Sa panab-anan inda pag buwat manughandug sa atubangan Panginuun, malukat ti tawu ginan sa kay kasalanan, ag patawadun siya Panginuun sa una hintay pag nabwat niya kasalanan.

Dugang pag manga Surundanun tungkul sa Handug Surunugun

^8-9 Sinugu Panginuun si Muysis hampay tultulan si Aarun hanggan kay manga anak lalaki tungkul sa inda pag manga surundanun sa handug surunugun: Inda pag handug kailangan tayakan lang sa harandugan tugka sa surip, ag kailangan parargu kay maglabdab ti apuy sa harandugan.

¹⁰ Isulung manughandug kay panluwas pag rutay linu, hanggan kay salwal linu, bag-u bul-un niya ti dapug sa inda pag handug ag ipauli sa saruy harandugan.

¹¹ Bag-u ilisan niya kay rutay ag darahun niya ti dapug sa luwas kampu, sa rugar pagkilalan-un malumpiyu.

¹² Kailangan parargu kay maglabdab ti apuy sa harandugan; danga gid inda magkapsa. Kada surip pag pagbahan inda manughandug, bag-u ipauli niya kaayad sa apuy ti handug surunugun. Ipaamut diman niya ti manga taba handug para sa mayad pag pakiusa.

¹³ Kailangan parargu di gid kay maglabdab ti apuy sa harandugan; danga gid inda magkapsa.

Dugang pag manga Surundanun tungkul sa Handug Pasalamat sa Panginuun

¹⁴ Inda ti manga surundanun sa handug pasalamat sa Panginuun: Ti manga manughandug lahi ni Aarun imaw ti dumara inda atabug sa atubangan Panginuun ati sa harandugan.

¹⁵ Bawasan manughandug usa ka akup inda pag handug arina may lana, bag-u kay darahun tunda sa harandugan hanggan ti manga kamangyan may lakay arina. Sunugun niya inda bilang pag-alaala sa Panginuun. Kay hungaw tunda pag handug makapasulung gid sa Panginuun.

^16-17 Ti nasawad pag arina tamaun ag kan-un ni Aarun kaibahan kay manga lahi. Dapat tamaun nida inda unman may pamadaka, ag kan-un nida ati sa may sabian Turda Taragbuan, usa ka banal pag rugar. Ipinakaun tunda Panginuun sa kanda bilang bahagi manga handug sa panab-anan apuy. Banal gid ti handug pasalamat sa Panginuun, ga handug sa paglumpiyu ag panlukat sa kasalanan.

¹⁸ Ti tanan lalaki lahi ni Aarun hanggan ti sunud niya pag manga sinulput tawu, mahimu di kumaun inda pag bahagi handug, dahil kanda inda pag bahagi sa handug para sa Panginuun sa panab-anan apuy. Ti maghiyaput tunda pag manga handug kailangan banal.

¹⁹ Inda ti sinabi Panginuun sa kan Muysis

²⁰ tungkul sa handug para sa Panginuun, ihandug ni Aarun sa sirang piliun siya bilang pangulu manughandug, ag katida diman ti buwatun niya linahi ti umilis sa kanya. Manhandug siya duwa ka kilu marinu pag kalasi arina. Inda handug pasalamat kailangan buwatun tugka aban. Kay katunga inda ihandug sa surip ag kay katunga sa malambung.

²¹ Inda pag arina kamasun kaayad sa lana bag-u tamaun sa kawali. Ag nu tama yi, pika-pikahun inda ag ihandug sa Panginuun bilang handug pasalamat. Kay hungaw inda pag handug makapasulung gid sa Panginuun.

²² Kailangan sunugun inda tanan, dahil handug inda para sa Panginuun, ag kailangan tupadun nida hanggan aban. Kailangan buwatun inda lahi ni Aarun imaw ti umilis sa kanya bilang pangulu manughandug.

²³ Ti tanan handug pakaun manughandug bilang pasalamat sa Panginuun kailangan tabuhun gid sunugun; danga gid pagkan-a.

Dugang pag manga Surundanun tungkul sa Handug Paglumpiyu Kasalanan

²⁴ Sinugu maan Panginuun si Muysis

²⁵ sabihi si Aarun hanggan kay manga anak lalaki tungkul sa inda pag manga surundanun: Ti handug sa paglumpiyu kasalanan kailangan ati pag-iyawun sa atubangan Panginuun sa rugar iriyawan handug surunugun. Banal gid ti handug sa paglumpiyu kasalanan.

²⁶ Ti manhandug pag manughandug kailangan sa may sabian Turda Taragbuan pag kumaun, usa ka banal pag rugar.

²⁷ Ti maghiyaput sa tunda pag handug kailangan banal. Ti matarupsikan dugu pag rutay kailangan pipian sa banal pag rugar ati sa Turda.

²⁸ Kailangan basagun ti anglit pinabukalan sa tunda pag handug, dapat nu kardiru ti pinabukalan kailangan kuskusan inda pag kardiru ag ugasan danum.

²⁹ Mahimu kumaun tunda pag handug ti tanan lalaki sa magtal-anakan manga manughandug. Banal gid tunda pag handug.

³⁰ Dapat nu ti dugu handug dinara sa Banal pag Sulud-sulud, ati sa sulud Turda agud ilukat sa kasalanan usa ka tawu, danga gid tunda pagkan-a pag handug, kailangan sunugun lang gid tunda.