Libitiku 5 - Hanunuu

¹ Nu ti usa ka tawu ipinatawag sa talaghusay hampay kumastigus sa manga nakitan niya nangyari ngatay naalaman, bag-u nantanggi siya, may saragtun siya.

² Nu may nakaigpil una hintay pag bagay pagkilalan-un mauring, parihu sa namatay mayagting pag hayup, nagkasala siya ag mayagting yi waydi hanggan siya, una balaw niya alam kuntay nakaigpil maaw siya.

³ Nu nakaigpil siya mayagting pag manga butang tawu, una unman niya alam kuntay nauringan siya, nagkasala diman siya nu maalaman niya.

⁴ Nu ti usa ka tawu kadaka nagtaratu balaw dap niya inisip, mayad man ngatay daut kay itinaratu, nagkasala siya nu maalaman niya kay binwat.

⁵ Nu alam tawu nagkasala siya sa tunda pag manga bagay, kailangan ipahayag niya inda.

⁶ Bilang bayad sa nabwat niya kasalanan, manhandug siya sa Panginuun usa ka babayi karanidu ngatay kambing bilang handug sa paglumpiyu kasalanan. Ihandug inda manughandug agud malukat ti tawu sa kay kasalanan.

⁷ Dapat nu unman siya may kakayahan manhandug karanidu ngatay kambing, manhandug lang siya duwa ka kalampati ngatay duwa ka kurkuru bilang bayad niya sa kay kasalanan: kay usa, handug sa paglumpiyu kasalanan ag kay usa handug pagsunugun.

⁸ Darahun niya inda sa manughandug bag-u ihandug manughandug para sa paglumpiyu kasalanan. Lubagun inda manughandug kay liug, dapat balaw niya puldun.

⁹ Bag-u iwidwisik niya ti iba ka dugu sa saruy harandugan, ag ti nasawad pag dugu ibuhus niya sa sirung harandugan. Inda ti handug sa paglumpiyu kasalanan.

¹⁰ Sumagda diman ti manughandug usa waya ka handug surunugun, angay waydi sa patigayun nu kabitay inda ihandug. Katida ngani ti pagbuwatun manughandug hampay malukat ti tawu ginan sa kay kasalanan ag patawadun siya Panginuun.

¹¹ Dapat nu unman siya may kakayahan manhandug duwa ka kalampati ngatay duwa ka kurkuru, manhandug yi lang siya duwa ka kilu marinu pag arina. Kailangan balaw niya lakayan lana hanggan kamangyan dahil handug tunda sa paglumpiyu kasalanan, balaw handug pasalamat.

¹² Darahun niya tunda sa manughandug ag bawasan manughandug usa ka akup bilang pag-alaala sa Panginuun. Ti binawas sunugun niya sa harandugan kaibahan sa iba waya pag manga handug sa Panginuun sa panab-anan apuy. Inda ti handug sa paglumpiyu kasalanan.

¹³ Sa panab-anan inda pag buwat manughandug, malukat ti tawu ginan sa kay manga kasalanan ag patawadun siya Panginuun. Ti nasawad pag handug arina para yi waydi sa manughandug, parihu sa pagbuwatun sa handug pasalamat.

Ti Handug Bayad sa Kasalanan

¹⁴ Ipinakaun waya gid Panginuun inda pag manga sugu sa kan Muysis:

¹⁵ Nu ti usa ka tawu naglabag sa Panginuun dahil unman niya ipinakaun ti bagay para sa Panginuun, una balaw niya tikis, kailangan manhandug siya lalaki karanidu unman may alangan bilang bayad sa kay kasalanan. Mahimu diman bayadan niya pilak angay sa halaga lalaki karanidu angay sa kilu pilak sa kiluhan paggamitun manga manughandug. Imaw inda ti handug bayad sa kasalanan.

¹⁶ Kailangan bayadan niya ti unman niya naipakaun sa Panginuun, bag-u dugangan waya niya 20 pursintu kay halaga inda. Bag-u iayaw niya inda tanan sa manughandug, imaw ti manhandug karanidu hampay malukat kay kasalanan ag patawadun siya Panginuun.

¹⁷ Nu ti usa ka tawu nakalabag sa sugu Panginuun balaw niya alam, nagkasala diman siya ag may saragtun sa Panginuun.

^18-19 Nu alam yi niya nagkasala siya, kailangan mandara siya atag sa manughandug usa ka karanidu lalaki unman may alangan, ihandug niya inda bilang bayad sa kay kasalanan. Mahimu diman bayadan niya pilak katumbas halaga lalaki karanidu angay sa kilu pilak sa kiluhan paggamitun manga manughandug. Sa panab-anan inda pag buwat manughandug, malukat ti tawu ginan sa kay kasalanan balaw tikis ag patawadun siya Panginuun.