Libitiku 4 - Hanunuu

Ti Handug sa Paglumpiyu Kasalanan

^1-2 Nagsugu waya gid ti Panginuun sa kan Muysis kuntay sabihi ti manga Israilita una si unu ti makalapastangan balaw tikis sa kay sugu, kailangan kaindaay kay buwatun:

³ Nu pangulu manughandug ti nagkasala balaw tikis, ag dahil siyun nadamay ti manga tawu, manhandug siya sa Panginuun turiti baka unman may alangan bilang handug sa paglumpiyu kasalanan.

⁴ Darahun niya ti baka sa atubangan Panginuun ati sa arani Turda Taragbuan. Ikupa niya kay kamang sa ulu baka bag-u di niya iyawun tunda.

⁵ Bum-ul dugu baka ti pangulu manughandug bag-u darahun niya sa sulud Turda.

⁶ Isawsaw niya sa dugu kay ituturu ag iwidwisik makapitu ka ulit sa may atubangan limbun matakipan sa Banal pag Sulud-sulud ati sa atubangan Panginuun.

⁷ Bag-u payidan niya dugu ti manga ga sungay sa suuk harandugan pagsunugan kamangyan ati sa sulud Turda sa atubangan Panginuun. Ti nasawad pag dugu baka ibuhus niya sa sirung harandugan handug pagsunugun. Inda pag harandugan baliwa sa may arani sabian Turda.

⁸ Bag-u bul-un niya ti tanan taba sa sulud bilug baka,

⁹ ti duwa ka batu hanggan ti manga taba, ag ti diit pag bahagi atay.

¹⁰ (Katunda diman ti buwatun sa hayup pag handug para sa mayad pag pakiusa.) Bag-u sunugun inda tanan manughandug sa harandugan handug pagsunugun.

^11-12 Dapat ti nasawad pag bahagi hayup, kay lukub, nayi, ulu, manga lulud, ag ti sa sulud tiyan, hanggan yi kay kinaun, kailangan darahun niya sa luwas kampu bag-u sunugun sa tapung manga kayu, ati sa may malumpiyu pag rugar sa may rayamtan dapug.

¹³ Nu ti buu nasyun Israil makalapastangan sa sugu Panginuun, dapat balaw nida tikis, nagkasala diman sida una unman nida alam tunda.

¹⁴ Nu maalaman nida kuntay nagkasala ngani sida, ti kayamuan manhandug turiti baka bilang handug sa paglumpiyu kasalanan. Daran-un nida inda pag baka atag sa Turda Taragbuan.

¹⁵ Bag-u ikupa manga manugpamahala Israilita kanda manga kamang sa ulu baka bag-u di iyawun inda sa atubangan Panginuun.

¹⁶ Bum-ul dugu ti pangulu manughandug ag darahun niya inda sa sulud Turda.

¹⁷ Isawsaw niya sa dugu kay ituturu ag iwidwisik makapitu ka ulit sa may atubangan limbun matakipan sa Banal pag Sulud-sulud, ati sa atubangan Panginuun.

¹⁸ Bag-u payidan niya dugu ti manga ga sungay sa suuk harandugan ati sa sulud Turda sa atubangan Panginuun. Ti nasawad pag dugu baka ibuhus niya sa sirung harandugan handug pagsunugun. Inda pag harandugan baliwa sa may arani sabian Turda.

^19-21 Ti buwatun niya sa inda pag baka parihu diman sa kay un-an pag binwat sa handug sa paglumpiyu kasalanan. Bul-un niya ti tanan taba baka ag sunugun sa harandugan, bag-u sunugun ti baka ati sa luwas kampu. Sa panab-anan inda pag buwat takinan manughandug, ti manga taga Israil patawadun Panginuun sa kanda manga kasalanan. Imaw inda ti handug sa paglumpiyu kasalanan para sa kadamlan Israil.

²² Nu ti usa ka takinan makalapastangan sa sugu Panginuun niya Diyus, dapat balaw niya tikis, nagkasala diman siya.

²³ Nu maalaman niya kuntay nagkasala ngani siya, manhandug siya lalaki pag kambing unman may alangan.

²⁴ Handug inda para sa paglumpiyu niya kasalanan. Ikupa niya kay kamang sa ulu kambing bag-u iyawun niya tunda ati sa atubangan Panginuun, sa may rugar iriyawan manga hayup bilang handug pagsunugun.

²⁵ Bag-u isawsaw manughandug kay ituturu sa dugu kambing ag ipayid niya sa manga ga sungay sa suuk harandugan handug pagsunugun. Ti nasawad pag dugu ibuhus niya sa sirung harandugan.

²⁶ Sunugun niya ti tanan taba sa harandugan parihu sa binwat niya sa kabag-u sa manga taba hayup pag handug para sa mayad pag pakiusa. Sa panab-anan inda pag buwat manughandug, malukat tunda pag takinan sa kay kasalanan ag patawadun siya Panginuun.

²⁷ Nu usa sa kanyu ti makalapastangan sa sugu Panginuun, dapat balaw niya tikis, nagkasala diman siya.

²⁸ Nu maalaman niya kuntay nagkasala ngani siya, manhandug siya babayi pag kambing unman may alangan para sa nabwat niya salan.

²⁹ Ikupa niya kay kamang sa ulu kambing handug sa kasalanan, bag-u iyawun niya tunda ati sa Turda, sa may iriyawan manga hayup bilang handug pagsunugun.

³⁰ Bag-u isawsaw manughandug kay ituturu sa dugu kambing ag ipayid niya sa manga ga sungay sa suuk harandugan handug pagsunugun. Ti nasawad pag dugu ibuhus niya sa sirung harandugan.

³¹ Bul-un niya ti tanan taba kambing parihu sa binwat niya sa handug para sa mayad pag pakiusa. Sunugun niya ti taba sa harandugan bilang mabanglu pag handug makapasulung gid sa Panginuun. Sa panab-anan inda pag buwat manughandug, malukat ti tawu sa kay kasalanan ag patawadun siya Panginuun.

³² Nu karanidu waydi ti ihandug tawu para sa paglumpiyu kasalanan, kailangan babayi ag unman may alangan.

³³ Ikupa niya kay kamang sa ulu karanidu, bag-u iyawun ati sa Turda, sa may rugar iriyawan manga hayup bilang handug pagsunugun.

³⁴ Bag-u isawsaw manughandug kay ituturu sa dugu ag ipayid niya ti dugu sa manga ga sungay sa suuk harandugan handug pagsunugun. Ti nasawad pag dugu ibuhus niya sa sirung harandugan.

³⁵ Bag-u, bul-un niya ti tanan taba karanidu parihu sa kay binwat sa karanidu handug para sa mayad pag pakiusa. Bag-u sunugun niya ti taba sa harandugan kaibahan ti iba waya pag manga handug sa panab-anan apuy para sa Panginuun. Sa panab-anan inda pag buwat manughandug, malukat ti tawu sa kay kasalanan ag patawadun siya Panginuun.