Libitiku 3 - Hanunuu

Handug para sa Mayad pag Pakiusa

¹ Nu may manhandug baka bilang handug para sa mayad pag pakiusa, kailangan kay ihandug sa atubangan Panginuun unman may alangan, lalaki man ngatay babayi.

² Ikupa niya kay kamang sa ulu baka, ag iyawun niya tunda ati sa arani sabian Turda Taragbuan. Kay dugu tunda iwidwisik manga manughandug lahi ni Aarun ati sa sangput harandugan.

³ Ginan sa tunda pag handug, bul-un manughandug ti ihandug niya sa Panginuun bilang handug sa panab-anan apuy. Bag-u bul-un niya ti tanan taba sa basad bilug,

⁴ ti duwa ka batu ag kay taba, hanggan ti diit pag bahagi atay.

⁵ Bag-u sunugun tunda manga manughandug lahi ni Aarun sa harandugan kaibahan sa handug pagsunugun. Kay hungaw tunda pag handug sa panab-anan apuy makapasulung gid sa Panginuun.

⁶ Nu karanidu ngatay kambing kay ihandug para sa mayad pag pakiusa sa Panginuun, kailangan unman may alangan, lalaki man ngatay babayi.

⁷ Nu karanidu kay ihandug sa atubangan Panginuun,

⁸ ikupa niya kay kamang sa ulu karanidu bag-u iyawun inda ati sa atubangan Turda Taragbuan. Kay dugu inda iwidwisik manga manughandug lahi ni Aarun ati sa may sangput harandugan.

⁹ Ginan sa inda pag handug, bum-ul ti manughandug kay ihandug sa Panginuun bilang handug sa panab-anan apuy. Kay bul-un ti manga taba, ti matabul pag ikug ag kailangan suup kay pag pulud, hanggan ti tanan taba sa sulud bilug,

¹⁰ ti duwa ka batu ag kay taba, hanggan yi ti diit pag bahagi atay.

¹¹ Inda tanan sunugun manughandug sa harandugan bilang handug karan-unun. Inda handug sa panab-anan apuy para sa Panginuun.

¹² Nu kambing kay ihandug sa atubangan Panginuun,

¹³ ikupa niya kay kamang sa ulu kambing bag-u iyawun inda sa may atubangan Turda Taragbuan. Kay dugu iwidwisik manga manughandug lahi ni Aarun ati sa sangput harandugan.

¹⁴ Bag-u ginan sa tunda pag handug, bum-ul ti manughandug kay ihandug sa Panginuun bilang handug sa panab-anan apuy. Bul-un niya ti tanan taba sa sulud bilug,

¹⁵ ti duwa ka batu ag kay taba, hanggan yi ti diit pag bahagi atay.

¹⁶ Inda tanan sunugun manughandug sa harandugan bilang handug karan-unun. Kay hungaw tunda pag handug sa panab-anan apuy makapasulung gid sa Panginuun. Para sa Panginuun ti tanan pag taba.

¹⁷ Danga kamu magkaun taba ngatay dugu. Inda pag surundanun kailangan sundun niyu hanggan niyu sunud pag manga sinulput tawu, una naan kamu pag mangulian.