Libitiku 26 - Hanunuu

Ti Papalad sa Pagkamatinupadun

¹ Danga kamu magbuwat manga diyus-diyusan parihu sa manga tawu-tawu, aramirawan pag batu, ngatay manga aramirawun pag batu, dahil aku kanyu Panginuun kanyu Diyus.

² Sunda niyu kang manga pag-isugu sa kanyu sa manga Sirang Pamahari ag galanga niyu ti rugar sarambahan niyu sa kangku. Aku ti Panginuun.

³ Nu sundun niyu kang manga surundanun ag manga sugu,

⁴ padaran-an niku kamu uran sa tama pag panahun hampay ti daga makapatubas bag-u ti manga kayu mamururak.

⁵ Bumaliw maabunda gid mayad kanyu manga patubas una ngani kanyu maggiuk manga uhay diritsu di tugka sa tigpuruti manga ubas, bag-u kanyu magputi ubas diritsu di tugka sa kanyu magpamgas. Nakan pagustu kamu sa kanyu karan-unun ag mabuhi kamu may kahusayan sa kanyu rugar.

⁶ Ipadara niku ti kahusayan sa kanyu rugar, nakan makaturug kamu balaw may pagkadalaan. Tabugun niku ti maisug pag manga hayup gin sa kanyu rugar, ag unman may manga kalaban man-gira sa kanyu.

⁷ Kamu ti gumira sa kanyu manga kalaban ag matyun niyu sida.

⁸ Ti 5 sa kanyu manalu sa 100 bag-u ti 100 sa kanyu makapanalu sa 10,000.

⁹ Ipakakit niku kang kaayadan sa kanyu bag-u payamuun niku kanyu manga lahi agud matupad niku kang kasunduan sa kanyu.

¹⁰ Dahil umabunda gid kanyu manga patubas, kanyu kan-un imaw waya ti nakalawuy niyu pag manga patubas tugka sa maabutan waya tunda ag matulsan manga bag-u maan pag patubas.

¹¹ Mangulian aku kaibahan niyu ag dayu niku kamu pabay-anan.

¹² Mangulian aku sa kanyu hampay aku pumirmaminti bumaliw Diyus niyu ag kamu pumirmaminti bumaliw nasakupan niku.

¹³ Aku ti Panginuun kanyu Diyus, ti nagpalwas sa kanyu gin sa Ihiptu hampay balaw yi kamu bumaliw manga suruguun manga taga Ihiptu. Pinalpasan yi niku kamu, nakan balaw yi kamu may dapat ikay-a waya.

Ti Parusa sa Unman Matinupadun

^14-15 Dapat nu unman kamu mamatingi sa kangku ag balaw sumunud sa tanan niku manga sugu, manga surundanun hanggan manga pag-ipatupad, ag dahil siyun linabag niyu ti kasunduan niku sa kanyu,

¹⁶ indaay kang buwatun sa kanyu: Makulbaan kamu sa dala dahil padaran-an niku kamu makamatay pag manga sakit hanggan init bilug imaw ti dumaut sa kanyu manga mata hanggan manga bilug. Tumanum kamu, dapat balaw niyu inda makinabangan dahil girahun kamu niyu manga kalaban bag-u kan-un nida kanyu manga patubas.

¹⁷ Pabay-anan niku kamu hampay matalu kamu niyu manga kalaban ag sida ti mandumara sa kanyu. Dahil sa dala mamalalagiwan kamu una ud may maglagas sa kanyu.

¹⁸ Ag nu dayu waya gid kamu mamatingi sa kangku, parusahan niku kamu pitu ka ulit.

¹⁹ Duraun niku ti pag-ipadayaw-dayaw niyu pag kapangyarihan. Balaw gid niku pauranun, nakan man-ganit gid kanyu manga daga.

²⁰ Bumaliw unman may pulus kanyu magpangabudlay, dahil kanyu manga daga udyi magtubas hanggan kanyu manga puun kayu balaw magburak.

²¹ Nu parargu waya gid kamu maglabag ag balaw mamatingi sa kangku, dugangan waya gid maan niku pitu ka bisis kanyu parusa.

²² Padaran-an niku kamu manga maisug pag manga hayup bag-u matyun nida kanyu manga anak hanggan manga hayup, ag dahil siyun pira wadi ti masawad sa kanyu ga udyi may maglakaw sa kanyu manga dalan.

²³ Nu unman waya gid kamu magbati sa kangku bagkus parargu di ngap kamu maglabag sa kangku,

²⁴ aku yi gid mismu ti lumaban sa kanyu bag-u parusahan niku kamu pitu waya gid ka bisis.

²⁵ Ipagira niku kamu sa kanyu manga kalaban bilang parusa sa kanyu maglabag sa kanta kasunduan. Una waya patagu kamu sa kanyu manga banwa padaran-an di niku kamu manga kakurian, ag dahil siti mapilitan kamu sumuku sa kanyu kalaban.

²⁶ Kurangun kanyu karan-unun, nakan usa lang wadi ka dapugan ti gamitun sampulu ka babayi sa pagtama tinapay, bag-u tunga-tungaun wadi nida inda sa kanyu. Tutuu may pagkan-un di kamu dapat udyi kamu magkabsug.

²⁷ Nu dayu waya gid kamu maniwala sa kangku bagkus pumadayun di gid kamu sa maglabag sa kangku,

²⁸ sa kang pangagalit labanan niku kamu bag-u parusahan pitu waya gid ka bisis.

²⁹ Palun-usan niku kamu bag-u mapilitan kamu kumaun kanyu sadili manga anak.

³⁰ Gubaun niku kanyu manga simbahan sa abwat pag manga rugar hanggan ti manga harandugan surunugan kamangyan. Ag iyamut niku kanyu manga bangkay sa babaw niyu tigbak pag manga diyus-diyusan, bag-u dayuun niku kamu.

³¹ Gubaun niku kanyu manga banwa hanggan manga simbahan, ag balaw aku makabaya sa hungaw niyu manga handug.

³² Gubaun niku kanyu rugar, ag ti sumakup siti pag manga kalaban niyu madulaw gid sa kay pagkaguba.

³³ Padaran-an niku kamu gira imaw ti gumuba sa kanyu manga banwa. Kalatun niku kamu tabug sa iba pag manga nasyun, bag-u bumaliw mapanglaw kanyu daga.

^34-35 Habang bihag kamu sa rugar niyu manga kalaban ag unman yi may mag-uli sa kanyu daga, makapahari yi inda. Dahil katpung mag-uli waya kamu sa kanyu daga unman gid niyu tunda ipinahari una timpu katpung pamahari daga. Dapat kainda makapahari yi gid tunda habang unman yi may mag-uli.

^36-37 Kamu pag manga nagkarasawad buhi sa labanan bag-u dinara niyu manga kalaban sa kanda rugar, padalaun gid niku. Una sa karanas lang labung kayu pag-uypun durus magpalagiw kamu bilang ga paglagsun kamu agud matyun una unman may maglagas sa kanyu. Ag habang magpalalagiwan kamu mandurunggaban kamu bag-u magkaraplid. Nakan dayu gid kamu lumaban sa kanyu manga kalaban.

³⁸ Magkaramatay lang kamu sa rugar niyu manga kalaban.

³⁹ Ag ti masawad sa kanyu amat-amat mamatay dahil sa kanyu manga kasalanan hanggan sa manga kasalanan niyu manga ginurang.

^40-41 Dahil sa kanyu magpudil ag maglabag sa kangku pinarusahan niku kamu ag ipinabihag sa rugar niyu manga kalaban. Dapat nu iampu niyu kanyu manga kasalanan hanggan niyu manga ginurang ag apasan yi niyu kanyu magpaganit, ag tanggapun niyu ti parusa dahil sa kanyu manga kasalanan,

⁴² tupadun niku kang kasunduan sa kanyu manga ginurang sa kanda ni Abraham, ni Isaak, ag ni Hakub bag-u ibalik niku kamu sa kanyu daga.

⁴³ Dapat kailangan gid paighitun dap niku kamu gin sa kanyu daga bilang kabaydanan niyu sa kanyu manga kasalanan, dahil sa kanyu paglabag sa kang manga sugu hanggan manga surundanun. Ag makapahari ti daga habang udwaya kamu.

⁴⁴ Dapat una pagparusahan niku kamu, balaw niku kamu pabay-anan sa rugar niyu manga kalaban; dayu niku kamu papasun tugka sa udyi may masawad sa kanyu. Dahil balaw mahimu duraun niku kang kasunduan sa kanyu, dahil aku ti Panginuun kanyu Diyus.

⁴⁵ Tupadun niku sa kanyu kang kasunduan sa kanyu manga ginurang ti ipinalwas niku gin sa Ihiptu hampay ipakakit kang kapangyarihan sa manga nasyun. Binwat niku inda sa kanyu manga ginurang hampay bumaliw aku kanda Diyus. Aku ti Panginuun.

⁴⁶ Imaw tunda ti tuhay-tuhay pag manga sugu hanggan manga surundanun ti ipinakaun Panginuun sa manga Israilita ati sa Bantud Sinai sa panab-anan ni Muysis.