Libitiku 24 - Hanunuu

Ti manga Ilaw ag Tinapay sa Sulud Turda Taragbuan

^1-4 Sinugu Panginuun si Muysis kuntay ipatupad niya inda sa manga Israilita: Daran-i niyu lunsay pag lana ginan sa binayu ulibu ti manga sulu sa luwas sulud-sulud, nu naan pag maulian ti Kaban Kasunduan ati sa Turda Taragbuan, hampay balaw may apas kay magduag siti sa atubangan Panginuun. Sul-an inda ni Aarun kada maghugut marukirum ag parargu inda kay duag tugka sa surip. Pihuun gid niya magduag ti manga sulu sa palaulian lunsay gintu. Inda pag surundanun kailangan tupadun niyu tugka sa sunud pag manga sinulput tawu.

Ti manga Pag-ihandug pag manga Tinapay sa Atubangan Diyus

⁵ Pagbuwat kamu 12 ka bilug tinapay, ti kada usa binwat ginan sa upat ka kilu arina marinu pag kalasi.

⁶ Ipauli niyu tunda sa lamisa lunsay gintu ati sa atubangan Panginuun. Tungbawan niyu inda sa tinigudwa ka tungbaw hampay ti kada tungbaw may unum ka tinapay.

⁷ Paulii niyu lunsay pag kamangyan sa saruy kada tinungbaw. Ti kamangyan imaw kay pinagka handug sa pag-alaala sa Panginuun. Sunugun inda bilang handug sa panab-anan apuy sa halip ti manga tinapay.

⁸ Kailangan pirmi gid magpauli tinapay sa atubangan Panginuun sa kada Sirang Pamahari. Katungkulan niyu inda manga Israilita tugka aban.

⁹ Inda pag manga tinapay para sa kan Aarun hanggan sa kay manga magtal-anakan. Kan-un nida inda sa banal pag rugar ati sa Turda, dahil banal gid inda pag bahagi handug para sa Panginuun sa panab-anan apuy. Ag para gid inda sa kanda hanggan aban.

Ti Parusa sa manga Magpuya sa Diyus ag Magpanakit sa Kaparihu

^10-11 Kaybi, may usa ka tawu kay ama taga Ihiptu bag-u kay ina Israilita. (Kay ngaran niya ina si Silumit, kay anak ni Dibri ginan sa lahi ni Dan.) Nangaway inda pag tawu sa usa ka Israilita ati sa kampu, bag-u pinuyaan niya ti ngaran Panginuun. Nakan dinara nida siya tag sa kan Muysis,

¹² bag-u pinirisu nida siya tugka sa maalaman nida nu hintay ti nabubut-un Panginuun sa tunda pag tawu.

¹³ Taynguna, magsabi ti Panginuun sa kan Muysis,

¹⁴ “Daran-a niyu atag sa luwas kampu tunda pag tawu magpuya sa kangku. Ti tanan manga nakaalam sa kay kasalanan tungbawan kanda kamang sa kay ulu hampay pumatutuu kuntay may saragtun siya, bag-u bintukun siya buu nasakupan Israil.

^15-16 Ag sabihi nimu ti manga Israilita kuntay una si unu sa kanda hanggan sa manga balaw Israilita ti mag-ulian kaibahan nida nu magsaad sa kangku aw ngatay magpuya sa kang ngaran may saragtun gid siya. Kailangan bintukun siya buu nasakupan Israil tugka sa mamatay.

¹⁷ “Una si unu ti makamatay tawu, kailangan matyun diman.

¹⁸ Ag ti tawu makamatay sa hayup iba kailangan ilisan niya inda, dahil may buhi diman waydi inda pag hayup, nakan kailangan buhi waydi kay iilis.

^19-20 Nu pinahamakan usa ka tawu kay kaparihu, kailangan pinsalaun diman waydi siya parihu diman sa kay binwat: Nu binari niya ti but-ul iba, bariun diman waydi kay but-ul, nu nanluwat siya mata manga iba, luwatun diman waydi kanya pag mata, hanggan nu rinungab niya ti ngipun manga iba, rungabun diman waydi kanya pag ngipun.

²¹ Una si unu ti makamatay hayup kailangan ilisan niya tunda, dapat ti makamatay tawu kailangan gid matyun diman.

²² Inda pag manga sugu para sa kanyu tanan, tumanduk man kamu pag manga Israilita ngatay manga balaw Israilita. Aku ti Panginuun kanyu Diyus.”

²³ Igu nasabi inda ni Muysis sa manga Israilita, dinara nida ti tawu nagpuya sa Diyus tabug sa luwas kampu ag binintuk, angay sa sugu Panginuun sa kan Muysis.