Libitiku 23 - Hanunuu

Ti manga Bukudtangi pag Sirang Pagsamba

¹ Sinugu Panginuun si Muysis

² sabiha sa manga Israilita ti manga surundanun tungkul sa manga bukudtangi pag sirang, nu naan magtiripun sida sa pagsamba sa Panginuun.

Ti Sirang Pamahari

³ May unum kamu ka sirang sa pagtarabahu, dapat sa ikapitu pag sirang pagpahari kamu dahil imaw tunda ti Sirang Pamahari. Danga kamu magtarabahu sa inda pag sirang bagkus pagtiripun kamu hampay mansamba, dahil sa tunda pag sirang dayawun niyu ti Panginuun.

Ti Pista Pag-alaala sa Karibrihan ag ti Pista Tinapay Unman may Pamadaka

⁴ Ti Pista Pag-alaala sa Karibrihan hanggan ti Pista Tinapay Unman may Pamadaka pinakamahalaga diman pag manga sirang agud magtiripun ti manga Israilita sa pagsamba sa Panginuun.

⁵ Ti Pista Pag-alaala sa Karibrihan pag-idaus kada ika-14 pag sirang sa un-an pag bulan.

⁶ Ag sa ika-15 pag sirang sa tunda diman pag bulan, umumpisa waydi ti Pista Tinapay Unman may Pamadaka. Pitu ka sirang inda pag pista, ag sa tunda pag manga sirang kanyu kan-un pag tinapay unman diman may pamadaka.

⁷ Sa un-an pag sirang sa inda pag pista, danga kamu magtarabahu bagkus pagtiripun kamu ag pagsamba sa Panginuun.

⁸ Sa sulud pitu ka sirang paghandug kamu sa Panginuun handug pagsunugun. Ag sa ikapitu pag sirang danga maan kamu magtarabahu bagkus pagtiripun kamu hampay magsamba sa Panginuun.

Ti Pista Tig-arani

^9-11 Nu ati yi kamu sa daga pag-ipakaun Panginuun sa kanyu, darahun niyu sa kanya ti un-an binugkus niyu pag manga inani uhay. Daran-un niyu inda sa manughandug sa sunud pag sirang pagkatapus Sirang Pamahari, ag ipaabwat inda manughandug sa atubangan Panginuun hampay tanggapun kamu Panginuun sa panab-anan siyun.

¹² Sa tunda diman pag sirang, paghandug kamu sa Panginuun karanidu usa ka timpu kay idad unman may alangan bilang handug pagsunugun.

¹³ Kaibahan siti, paghandug diman kamu upat ka kilu marinu pag kalasi arina may lakay lana bilang handug pasalamat sa Panginuun, bag-u usa ka litru intus bilang handug irinmun. Handug inda sa panab-anan apuy, kay hungaw tunda makapasulung gid sa Panginuun.

¹⁴ Nu unman waya kamu nakahandug inda, balaw gid kamu kailangan magkaun una hintay pag kalasi karan-unun ginan sa kanyu un-an pag ani, latuy man inda aw ngatay sinanglay una tinama tinapay. Kailangan niyu sundun inda pag surundanun tugka sa sunud pag manga sinulput tawu, una naan kamu pag mangulian.

^15-17 Makalawuy ti pitu ka duminggu ginan sa sirang naghandug kamu binugkus manga uhay, pagtiripun kamu bag-u paghandug maan Buluntad pag Handug ginan sa tunda pag manga bag-u niyu inani uhay. Tunda sa ika-50 pag sirang, imaw ti sirang pagkatapus ikapitu pag Sirang Pamahari. Duwa ka tinapay ti ipakaun niyu, ti kada usa binwat ginan sa upat ka kilu arina marinu kay kalasi, may pamadaka. Ipakaun niyu inda bilang handug pag-ipaabwat ginan sa manga un-an niyu patubas.

¹⁸ Durugi niyu inda pitu ka ibun karanidu lalaki tigus-a ka timpu, usa ka turiti baka, bag-u duwa ka gurangun karanidu lalaki, ti kada usa sa kanda danga may alangan. Ipakaun niyu tunda bilang handug pagsunugun kaibahan sa handug pasalamat hanggan sa handug irinmun. Kay hungaw tunda pag handug sa panab-anan apuy makapasulung gid sa Panginuun.

¹⁹ Bag-u paghandug diman kamu usa ka lalaki kambing bilang handug panlumpiyu kasalanan, bag-u duwa ka karanidu tigus-a ka timpu bilang handug para sa mayad pag pakiusa.

²⁰ Ipaabwat manughandug sa atubangan Panginuun ti duwa ka karanidu hanggan ti handug ginan sa un-an patubas. Banal inda pag manga handug tabug sa Panginuun dahil kabahagi inda manga manughandug.

²¹ Sa tunda diman pag sirang danga kamu magtarabahu bagkus pagtiripun kamu hampay mansamba sa Panginuun. Inda pag surundanun kailangan tupadun niyu tugka sa sunud pag manga sinulput tawu, una naan kamu pag mangulian.

²² Nu mag-ani kamu, danga niyu pag tabuha ti sa saruy niyu tanman, ag danga yi niyu pagbaliki kay nasawad hampay siputun waya. Pabay-ani yi lang niyu tunda sa manga pugri ag sa manga balaw Israilita mag-ulian kaibahan niyu. Aku ti Panginuun kanyu Diyus.

Ti Pista sa Pagpatunug manga Budyung

^23-24 Sa un-an pag sirang sa ikapitu pag bulan, pagpahari kamu bilang pag-alaala sa Panginuun. Nu madnugan niyu ti tunug manga budyung, pagtiripun kamu hampay mansamba sa kanya.

²⁵ Danga kamu magtarabahu sa tunda pag sirang bagkus paghandug kamu handug sa panab-anan apuy tabug sa Panginuun.

Ti Sirang Paglukat

^26-28 Ti ikasampulu pag sirang sa ikapitu pag bulan imaw ti Sirang Paglukat. Danga kamu magtarabahu sa tunda pag sirang bagkus pagtiripun kamu hampay mansamba sa Panginuun, balaw kamu manhandum karan-unun, ag paghandug kamu sa kanya manga handug pagsunugun. Dahil sa tunda pag sirang buwatun ti buruwatun tungkul sa paglukat ginan sa kanyu manga kasalanan sa atubangan Panginuun kanyu Diyus.

²⁹ Ti unman maghandum karan-unun sa tunda pag sirang danga yi pagkilalan-a nasakupan niyu.

³⁰ Matyun Panginuun una si unu ti manarabahu sa tunda pag sirang.

^31-32 Nakan pagpahari kamu ag danga maghandum karan-unun umpisa sa pag-isalup init sa ikasiyam pag sirang sa tunda pag bulan tugka sa sunud pag-isalup init. Inda pag surundanun kailangan tupadun niyu tugka sa sunud pag manga sinulput tawu, una naan kamu pag mangulian.

Ti Pista sa Pagbuwat manga Payag

^33-34 Sinugu Panginuun si Muysis sabihi ti manga Israilita: Sa ika-15 pag sirang sa ikapitu pag bulan umumpisa ti Pista sa Pagbuwat manga Payag, buwata niyu inda sa sulud pitu ka sirang.

³⁵ Sa un-an pag sirang danga kamu magtarabahu bagkus pagtiripun kamu hampay mansamba sa Panginuun.

³⁶ Sa sulud pitu ka sirang paghandug kamu sa Panginuun manga handug sa panab-anan apuy. Ag sa ikawalu pag sirang balaw diman kamu mantarabahu bagkus pagtiripun maan kamu pagsamba sa Panginuun, bag-u paghandug kamu sa kanya. Katapusan tunda pag sirang niyu tiripun.

³⁷ Imaw tunda ti itinagka pag manga panahun hampay maniripun kamu sa pagsamba sa Panginuun hanggan sa paghandug manga handug sa panab-anan apuy. Kailangan dumara kamu manga handug pagsunugun, handug pasalamat, handug para sa mayad pagpakiusa, ag manga handug irinmun, ti pagkailanganun ihandug niyu sa manga udas paghandug.

³⁸ Idaus niyu inda pag manga itinagka sirang bukud waya sa Sirang Pamahari kanyu pagbuwatun kada duminggu. Ag inda pag manga handug kailangan niyu ihandug dugang sa kanyu manga pasalamat, kanyu manga handug sa pagtupad sa manga taratu, ag kanyu handug buluntad para sa Panginuun.

³⁹ Nu tungkul sa Pista sa Pagbuwat manga Payag, idaus niyu inda pag-alaala sa Panginuun umpisa sa ika-15 pag sirang sa ikapitu pag bulan, pagkatapus tig-arani. Idaus niyu inda sa sulud pitu ka sirang; danga kamu magtarabahu sa un-an pag sirang hanggan sa ikawalu pag sirang.

⁴⁰ Sa un-an pag sirang, pagbuul kamu pinakamayad pag manga burak manga kayu, manga paklang palma, manga maraybung pag sanga kayu, una manga dariit kayu sa laad, bag-u pagmasulung kamu sa atubangan Panginuun kanyu Diyus sa sulud pitu ka sirang.

^41-43 Idaus niyu ti pista sa ikapitu pag bulan kada timpu sa pag-alaala sa Panginuun. Sa sulud pitu ka sirang, tanan kamu ti manga tumanduk pag manga Israilita pag-uli sa manga payag hampay maalaman niyu manga linahi kuntay ipinauli Panginuun niyu Diyus kanyu manga ginurang sa manga payag katpung ipinalwas niya sida gin sa Ihiptu. Inda pag surundanun kailangan tupadun niyu tugka sa sunud pag manga sinulput tawu.

⁴⁴ Inda ngani ti tungkul sa manga itinagka pag manga panahun sa pagsamba sa Panginuun, ti ipinadakit ni Muysis sa manga Israilita.