Libitiku 22 - Hanunuu

Ti manga Handug sa Diyus

¹ Sinugu Panginuun si Muysis

² kuntay sabiha inda sa kan Aarun hanggan sa kay manga anak lalaki: Danga niyu pagpakay-aha kang banal pag ngaran, nakan galanga niyu ti manga handug isanagda manga Israilita sa kangku. Aku ti Panginuun.

³ Nu may imaw sa kanyu ngatay sa kanyu manga linahi sa sunud pag manga sinulput tawu ti pumakarani sa handug tabug sa kangku bag-u mauring siya, balaw yi gid siya makasirbi bilang manughandug. Aku ti Panginuun.

^4-7 Unman may una si unu sa kanyu ti mahimu makakaun handug nu may imaw siya dilikadu pag sakit sa lukub, ngatay may amumutul dahil sa kay sakit, ngatay naigpilan niya ti bagay mayagting dahil nid-ut inda sa namatay, ngatay linuwangan siya kinatawu, aw ngatay nakaigpil siya sa hayup ngatay sa tawu pagkilalan-un mauring. Mahimu lang siya makakaun manga handug nu siya nakaparigus yi, dapat umalagad siya tugka sa misalup ti init bag-u di makakaun siya sa manga handug imaw kay karan-unun bilang manughandug.

⁸ Balaw kamu mahimu makakaun una hintay pag taguban hayup namatay aw ngatay minatay manga iba hayup, dahil nu buwatun niyu inda kilalan-un gid kamu mauring. Aku ti Panginuun.

⁹ Danga niyu pagbul-i halaga kang manga pag-ipatupad sa kanyu. Kailangan gid tupadun niyu inda hampay balaw kamu magkasala ag mamatay. Aku ti Panginuun, ti nagtalaga sa kanyu para sa kangku.

¹⁰ Kamu lang manga manughandug hanggan kanyu magtal-anakan ti makakaun sa bahagi niyu pag handug. Unman mahimu kumaun siti kanyu nanabang hanggan kanyu sinuhulan pag manugtarabahu.

¹¹ Dapat mahimu di kumaun kanyu binili pag panawuhun ngatay iinanak yi ngap sa kanyu balay.

¹² Balaw diman makakaun inda ti anak babayi usa ka manughandug Balay Diyus nu nakaasawa siya balaw manughandug.

¹³ Dapat nu naburanday siya aw ngatay nanarayakan sida tag kay asawa unman sida may anak, bag-u mag-ulian maan siya ati sa kay ama, makakaun di siya sa karan-unun pagtanggapun niya ama bilang manughandug. Tandai gid niyu kamu lang manga manughandug hanggan kanyu magtal-anakan ti makakaun sa una hintay pag manga kabahagi niyu pag handug.

¹⁴ Dapat nu ti usa ka tawu abi balaw kaibahan niyu magtal-anakan nakakaun tunda balaw niya tikis, kailangan gid ulian niya tunda sa kanyu bag-u dugangan waya niya 20 ka pursintu tunda kay halaga.

¹⁵ Kamu pag manga manughandug, pahalgai niyu ti manga handug manga Israilita tabug sa kangku,

¹⁶ agud sa kanyu magkaun inda balaw kamu magkasala ag balaw kamu may saragtun. Aku ti Panginuun, ti nagtalaga sa kanyu para sa kangku.

Ti manga Surundanun tungkul sa Pagpili Hayup Panagda

¹⁷ Sinugu Panginuun si Muysis

¹⁸ kuntay sabiha inda sa kan Aarun hanggan sa kay manga anak lalaki, sa tanan manga kaparihu nida manga Israilita, hanggan sa manga day-uhan mag-ulian kaibahan nida: Nu handug pagsunugun kanyu ipakaun bilang handug sa pagtupad sa usa ka taratu ngatay buluntad pag handug,

¹⁹ kailangan lalaki pag baka ngatay pag karanidu, una kambing unman may alangan hampay tanggapun niku.

²⁰ Danga kamu maghandug may alangan dahil balaw gid niku tunda tanggapun.

²¹ Nu ti handug para sa mayad pag pakiusa kanyu ipakaun sa kangku bilang handug sa pagtupad sa usa ka taratu ngatay buluntad pag handug, kailangan baka ngatay karanidu, una diman kambing unman may alangan hampay tanggapun niku.

²² Danga kamu maghandug sa kangku hayup buta, nabarian, nabiyagan, ngatay may sakit sa lukub. Danga gid niyu tunda paghandugan sa kangku bilang handug sa panab-anan apuy.

²³ Dapat mahimu kamu maghandug baka ngatay karanidu una diman kambing nagkipis kay usa ka bahagi bilug bilang buluntad pag handug, dapat balaw niyu inda mahimu ipakaun bilang handug sa pagtupad taratu.

²⁴ Danga kamu maghandug sa kangku linus-anan pag hayup aw ngatay may alangan kay bugas. Danga gid niyu inda pagbuwata sa kanyu rugar.

²⁵ Ag danga diman kamu magbili katunda pag kalasi manga hayup ginan sa manga taga iba rugar hampay ihandug sa kangku, dahil balaw niku tunda tanggapun.

^26-27 Ti ibun baka, karanidu, ngatay kambing kailangan gukud sa kay ina sa sulud pitu ka sirang. Dapat ginan sa ikawalu pag sirang mahimu yi inda ihandug sa kangku bilang handug pagsunugun.

²⁸ Danga niyu ihandug sa usa lang ka sirang dungan sa kay anak ti ina baka ngatay karanidu ngatay kambing.

²⁹ Nu manhandug kamu handug sa pagpasalamat sa kangku, sunda niyu kaayad kay paraan paghandug tunda agud tanggapun niku.

³⁰ Ag kailangan kan-un niyu inda sa tunda katpung diman pag sirang naghandug ag danga gid niyu pagsawadi tugka aldaw surip. Aku ti Panginuun.

³¹ Tupada niyu kang manga sugu. Aku ti Panginuun.

³² Danga niyu pagpakay-aha ti banal niku pag ngaran, ag kilalan-un niyu aku banal. Aku ti Panginuun ti nagtalaga sa kanyu para sa kangku,

³³ ag aku ti nagpalwas sa kanyu sa Ihiptu agud aku kanyu Diyus. Hu ngani, aku ti Panginuun.