Libitiku 21 - Hanunuu

Ti manga Surundanun tungkul sa manga Manug-asiwa Balay Diyus

¹ Sinugu Panginuun si Muysis hampay sabihun inda sa manga manughandug lahi ni Aarun: Danga pag-uringi kanyu sadili sa panab-anan pagpakarani ngatay pag-igpil sa bangkay tawu,

² purya lang nu ti namatay kanyu suud manga katawuhan halimbawa kanyu ina, ama, anak, patar-ari lalaki,

³ aw ngatay patar-ari babayi udwaya may asawa ag pagsakpun waya niyu.

⁴ Danga diman niyu pag-uringi kanyu sadili sa panab-anan magpakiusa sa paglubung sa katawuhan niyu asawa.

⁵ Nu manruku kamu sa namatay, danga niyu pagkurida kanyu buhuk aw ngatay puldan kanyu bungut, aw ngatay biyagan kanyu bilug.

⁶ Kailangan italaga niyu kanyu sadili para sa kangku, sa kanyu Diyus, ag danga niyu pagpakay-aha kang ngaran. Buwata niyu inda dahil kamu ti manughandug manga handug sa panab-anan apuy, imaw kang karan-unun.

⁷ Kailangan danga kamu mag-asawa sa babayi mayagting magpabili kay bilug, aw ngatay sa babayi nagbulag sa kay asawa, dahil itinalaga niku kamu para sa kangku.

⁸ Kailangan kilalan-un kamu banal niyu kaparihu Israilita dahil kamu ti naghandug manga handug para sa kangku. Hu, kailangan gid ngap kamu kilalan-un nida banal dahil aku, ti Panginuun, banal gid, ag pagbuwatun niku banal kang manga nasakupan.

⁹ Nu kamu may anak babayi magpakay-a sa kanyu dahil sa magpabili siya kay bilug, dahil siyun pagkilalan-un siya mayagting, kailangan sunugun siya.

¹⁰ Nu ti pangulu manughandug manruku sa namatay, kailangan balaw niya barugaun kay buhuk ag danga niya paggisia kay rutay.

¹¹ Kailangan balaw niya mayagtingan kay sadili sa panab-anan pagpakarani sa namatay, una waya kay ama inda aw ngatay kay ina.

¹² Ag dahil sa itinalaga siya sa kangku tag bilang pangulu manughandug Balay Diyus sa panab-anan paghaplas lana ulibu sa kanya, balaw siya mahimu mighit ginan sa Turda Taragbuan agud makiusa sa paglubung, dahil nu buwatun niya inda mayagtingan ti Turda. Aku ti Panginuun.

^13-14 Ti asawan-un pangulu manughandug kailangan tugnaw pag daraga ag kaparihu niya Israilita. Danga siya mag-asawa sa buranday, una sa babayi tinayakan niya asawa, una sa babayi mayagting magpabili kay bilug.

¹⁵ Sa siyun pag paraan balaw kilalan-un mayagting kay manga anak. Aku ti Panginuun ti nagtalaga sa kanya para sa kangku.

¹⁶ Sinugu Panginuun si Muysis

¹⁷ sabiha inda sa kan Aarun: Unman may una si unu sa kanmu manga lahi tugka sa sunud pag manga sinulput tawu ti makahandug agud kang karan-unun, nu may alangan kay bilug.

¹⁸ Balaw mahimu pumakarani sa harandugan ti buta, ti lunu, ti may daut kay uyahun, ti balaw mayad kay usa ka bahagi niya bilug,

¹⁹ ti may bari kay lulud hanggan kamang,

²⁰ ti buktut, ti pandak, ti may sakit sa mata hanggan sa lukub, aw ngatay baug.

^21-23 Nakan nu ti usa nimu ka katawuhan may alangan, unman siya mahimu maghandug sa kangku manga pakaun sa panab-anan apuy, imaw kang karan-unun. Dayu diman siya mahimu magsulud sa Banal pag Sulud-sulud una pumakarani sa harandugan dahil mayagtingan kang Turda. Dapat mahimu siya makakaun karan-unun para lang sa manga manughandug sa banal pag pakaun hanggan sa pinakabanal pag handug. Aku ti Panginuun imaw ti nagpili sa kanyu para sa kangku.

²⁴ Sinabi inda tanan ni Muysis sa kan Aarun hanggan sa kay manga anak lalaki, ag sa tanan Israilita.