Libitiku 2 - Hanunuu

Handug Pasalamat sa Panginuun

¹ Nu may manhandug handug pasalamat sa Panginuun, gamitun niya ti marinu pag kalasi arina ag paulian niya inda lana ulibu hanggan kamangyan.

² Darahun niya tunda sa manga manughandug lahi ni Aarun. Bag-u bul-an manughandug usa ka akup ti mininsan arina hanggan lana, ag sunugun niya inda sa harandugan kaibahan ti tanan kamangyan inamut sa arina. Sunugun niya tunda bilang pag-alaala sa Panginuun. Kay hungaw tunda pag handug sa panab-anan apuy makapasulung gid sa Panginuun.

³ Ti nasawad pag arina para yi sa kanda ni Aarun hanggan sa kay manga lahi, banal gid inda dahil bahagi inda handug sa panab-anan apuy para sa Panginuun.

⁴ Nu may manhandug tinapay tinama sa pugun bilang handug pasalamat, kailangan buwat inda ginan sa marinu pag kalasi arina ag balaw pinaulian pamadaka. Mahimu yi ihandug ti madamul pag tinapay may lakay lana ngatay ti manipis pag tinapay pinayidan lana.

⁵ Nu ti ihandug pag tinapay tinama sa sartin, kailangan buwat inda ginan sa marinu pag kalasi arina may lakay lana, dapat balaw may lakay pamadaka.

⁶ Pika-pikahun tunda ag paulian lana. Handug tunda bilang pasalamat.

⁷ Nu ti ihandug pag tinapay tinama sa sartin, kailangan binwat diman tunda ginan sa marinu pag kalasi arina may lakay lana.

⁸ Daraha inda pag kalasi handug sa manughandug hampay ihandug sa Panginuun ati sa harandugan.

⁹ Bawasan tunda manughandug, ag ti binawas sunugun niya sa harandugan bilang pag-alaala sa Panginuun. Kay hungaw tunda pag handug sa panab-anan apuy makapasulung gid sa Panginuun.

¹⁰ Ti nasawad sa tunda pag handug para yi sa kan Aarun hanggan sa kay manga lahi, banal gid tunda dahil bahagi tunda handug sa panab-anan apuy ihinandug para sa Panginuun.

¹¹ Ti tanan handug pasalamat sa Panginuun kailangan unman may pamadaka, dahil balaw dapat kamu magsunug may pamadaka ngatay daykut sa kanyu maghandug sa panab-anan apuy para sa Panginuun.

¹² Mahimu niyu ihandug ti may pamadaka ngatay daykut bilang handug ginan sa un-an niyu bahagi inani, dapat danga niyu inda pagsunuga sa harandugan.

¹³ Asini niyu ti tanan handug pasalamat, dahil ti asin tanda niyu unman may katapusan pag kasunduan sa Diyus. Asini ti tanan niyu handug.

¹⁴ Nu manhandug kamu ginan sa kanyu un-an ani bilang pasalamat sa Panginuun, paghandug kamu ginaling pag manga butir sinanglay.

¹⁵ Paulian niyu tunda lana hanggan kamangyan. Handug tunda bilang pasalamat.

¹⁶ Sunugun manughandug ti iba ka ginaling may lana, kaibahan ti tanan kamangyan ipinauli ati sa ginaling, bilang pag-alaala sa Panginuun. Tunda handug sa panab-anan apuy para sa Panginuun.