Libitiku 19 - Hanunuu

Manga Tuhay-tuhay pag manga Surundanun

¹ Sinugu Panginuun si Muysis

² kuntay sabiha inda sa buu nasakupan Israil: Pagpangabuhi kamu may kabanalan dahil aku, ti Panginuun kanyu Diyus, banal.

³ Kailangan galangun niyu kanyu ina hanggan ama, ag kailangan diman tupadun niyu kang manga pag-isugu sa kanyu sa manga Sirang Pamahari. Aku ti Panginuun kanyu Diyus.

⁴ Danga kamu magsamba sa manga diyus-diyusan ngatay magbuwat manga tinawu-tawu. Aku ti Panginuun kanyu Diyus.

⁵ Nu manhandug kamu sa kangku manga handug para sa mayad pag pakiusa, ihandug niyu inda sa mayad pag paraan hampay tanggapun niku para sa kanyu.

⁶ Kan-un niyu ti taguban sa tunda diman pag sirang ngatay sa kinaaldawan. Dapat nu may masawad waya taguban tugka sa ikatlu pag sirang kailangan sunugun yi.

⁷ Nu kan-un waya niyu tunda sa ikatlu pag sirang, dayu niku tunda tanggapun dahil mayagting yi.

⁸ Una si unu ti kumaun tunda may saragtun dahil kay binul-an halaga ti banal pag bagay para sa kangku, nakan inda pag tawu danga yi pagkilalan-a nasakupan niyu.

⁹ Nu mag-ani kamu danga niyu pagtabuha ti manga sa saruy niyu tanman, ag danga yi niyu pagsagrawa kanyu nag-anihan.

¹⁰ Katunda diman sa taranuman manga ubas, danga yi niyu pagbaliki ti manga nasawad pag burak ngatay ti manga naragdag. Pabay-ani yi lang niyu tunda para sa manga pugri hanggan sa manga balaw Israilita mag-ulian kaibahan niyu. Aku ti Panginuun kanyu Diyus.

¹¹ Danga kamu magtakaw, hanggan magpudil, aw ngatay magpandaya sa kanyu kaparihu.

¹² Danga kamu magsumpa sa kapudilan tabug sa kang ngaran, dahil nu buwatun niyu inda paglapastanganun niyu kang ngaran. Aku ti Panginuun.

¹³ Danga niyu pagdayaa aw ngatay pagtakawi kanyu kaparihu. Danga yi niyu pagpaaldawan ti pagpakaun upa sa tawu pinatarabahu niyu.

¹⁴ Danga niyu pagbagawi manga kadautan ti bungul, ag danga kamu magpauli sarad-an sa lakawan manga buta. Tupada niyu inda pag manga sugu niku hampay ipakakit niyu maggalang kamu sa kangku sa kanyu Diyus. Aku ti Panginuun.

¹⁵ Kailangan hustu ag matadlung kanyu maghusay; danga niyu pagkampihi ti mayaman ngatay ti pugri.

¹⁶ Danga kamu maglilibakan sa kanyu kaparihu. Danga kamu magbuwat una hintay pag ikadamhak niyu kaparihu. Aku ti Panginuun.

¹⁷ Danga niyu pagkagaliti kanyu kaparihu. Paalalahani niyu siya nu nagsalan hampay unman kamu may saragtun.

¹⁸ Danga kamu magbalus hanggan magdumut sa iba, bagkus ngap mahalun niyu kanyu kaparihu parihu sa kanyu magmahal sa kanyu sadili. Aku ti Panginuun.

¹⁹ Tupada niyu kang manga sugu. Danga niyu pagpalahii ti usa ka hayup sa balaw kay kaparihu pag hayup. Danga kamu magtanum duwa ka kalasi binhi sa usa ka tanman. Danga kamu magsulung rutay binwat ginan sa duwa ka kalasi pisahan.

²⁰ Nu ti usa ka lalaki mangulid sa usa ka suruguun babayi karasalun yi sa iba lalaki, dapat inda pag babayi udwaya nalukat aw ngatay napalaya, kailangan parusahan sida. Dapat danga sida pagmatya dahil udwaya napalaya tida pag babayi.

^21-22 Kailangan dumara ti lalaki usa ka lalaki pag karanidu ati sa may arani sabian Turda Tiripnan bilang bayad sa kay kasalanan. Sa panab-anan paghandug manughandug sa karanidu sa kang atubangan, malukat ti lalaki sa kay kasalanan ag patawadun niku siya.

²³ Nu rumas-ug yi kamu sa daga ipakaun niku sa kanyu, sa sulud tulu ka timpu danga niyu pagkan-a kay manga burak kanyu itinanum. Kilalan-un niyu inda mauring.

²⁴ Sa ikap-at pag timpu, ti tanan pag burak ihandug niyu bilang pagdayaw sa kangku nakan balaw diman niyu inda kan-un.

²⁵ Dapat sa ikalima pag timpu makakaun yi kamu manga burak. Ag nu tupadun niyu inda pag manga surundanun, umabunda gid kay manga burak kanyu manga tanum. Aku ti Panginuun kanyu Diyus.

²⁶ Danga kamu magkaun taguban may dugu waya. Danga niyu pagbuwata ti manga pagbuwatun manughula hanggan panhirian.

²⁷ Nu manruku kamu sa namatay danga niyu pagpuldi kanyu buhuk sa sangput niyu ulu ngatay puldun kanyu bungut.

²⁸ Danga diman niyu pagbiyagi kanyu bilug. Ag danga diman kamu magpatatak sa kanyu bilug. Aku ti Panginuun.

²⁹ Danga niyu pagpakay-aha kanyu manga anak babayi sa pagpilit sa kanda kuntay ipabili nida kanda sadili pagkababayi, dahil lumantap ti kahalayan ag mapnu kadautan kanyu rugar.

³⁰ Sunda niyu kang manga pag-isugu sa kanyu sa Sirang Pamahari, ag galanga niyu ti rugar sarambahan niyu sa kangku. Aku ti Panginuun.

³¹ Danga kamu magdangup sa manga pandaniwan maghampang sa manga karadwa namatay, dahil nu buwatun niyu inda miminsan kamu sa mayagting. Aku ti Panginuun kanyu Diyus.

³² Galanga niyu ti manga gurangun, galanga diman niyu aku kanyu Diyus. Aku ti Panginuun.

³³ Danga niyu pag-apiha ti manga day-uhan mag-ulian asan sa kanyu.

³⁴ Tanggapa niyu sida bilang ga kanyu kaparihu, ag mahala niyu sida parihu sa kanyu magmahal sa kanyu sadili, dahil manga day-uhan diman kamu kaybi sa Ihiptu. Aku ti Panginuun kanyu Diyus.

³⁵ Danga kamu magdaya sa kanyu magkilu, ag magsukat, hanggan magtakal.

^36-37 Gamita niyu ti insaktu pag kiluhan, ag salupan, hanggan takalan. Aku ti Panginuun kanyu Diyus ti nagpalwas sa kanyu ginan sa Ihiptu. Tupada niyu ti tanan niku manga surundanun hanggan manga sugu. Aku ti Panginuun.