Libitiku 16 - Hanunuu

Ti Buruwatun sa Sirang Paglukat

^1-2 Igu namatay kay duwa ka anak lalaki ni Aarun sa kanda maghandug sa Panginuun, nagkumun ti Panginuun sa kan Muysis, “Sabihi kanmu patar-ari si Aarun danga siya magsaka sa Pinakabanal pag Sulud-sulud, asan sa dayu limbun rutay, una kapira pag udas gustuhun niya. Nu buwatun niya tunda pihu mamatay siya. Dahil siti pag rugar aku pag magpakakit kang sadili sa histuda usa ka rurum sa tungud taklub Kaban Kasunduan, ti Ulian Pangaawa.”

³ Inda ti pag-isugu Panginuun sa kan Aarun buwatun sa udas sumaka siya sa Pinakabanal pag Sulud-sulud: Mandara siya turiti baka hampay ihandug bilang handug panlumpiyu sa kasalanan ag lalaki karanidu hampay ihandug bilang handug pagsunugun.

⁴ Kailangan marigus dap siya bag-u isulung niya kay rutay panmanughandug lunsay linu: kay pansirung pag rutay imaw ti magtakip sa kay kinatawu, kay huragkus, kay pantaung linu, hanggan kay rutay panluwas.

⁵ Mamakaun sa kanya ti kabuuhan Israil tigudwa ka lalaki kambing hampay ihandug sa paglumpiyu manga kasalanan ag usa ka lalaki karanidu handug pagsunugun.

⁶ Ihandug ni Aarun ti turiti baka bilang handug panlumpiyu sa kasalanan hampay malumpiyu siya hanggan kay buu magtal-anakan.

⁷ Bag-u bul-un niya ti duwa ka kambing, darahun diman niya sa atubangan Panginuun, ati baliwa sa may sabian Turda Taragbuan.

⁸ Ag buwatun niya lunggungan ti duwa ka kambing nu naan ti para sa Panginuun ag ti para sa kan Asasil.

⁹ Ti para sa Panginuun pag nabunut pag kambing ihandug niya bilang handug sa paglumpiyu kasalanan.

¹⁰ Dapat ti kambing nabunut para sa kan Asasil, ihandug niya inda buhi sa atubangan Panginuun bag-u palpasan niya tunda sa pangawakawaan, agud malukat ti manga tawu sa kanda manga kasalanan.

Ti Turun-anun tungkul sa tunda pag Buruwatun

¹¹ Iyawun ni Aarun ti turiti baka bilang handug sa paglumpiyu kay sadili hanggan sa kay magtal-anakan.

¹² Bag-u mam-ul siya burugtangan kamangyan, pun-un niya tunda baga ginan sa harandugan ati sa sulud Turda. Ag mam-ul diman siya duwa ka akup mabanglu pag kamangyan pinu, bag-u darahun niya tunda sa Pinakabanal pag Sulud-sulud.

¹³ Ati sa atubangan Panginuun, ipauli niya sa apuy ti kamangyan hampay kay anus tunda manalimbuuk sa sangput taklub Kaban Kasuguan, ti Ulian Pangaawa, hampay balaw siya mamatay.

¹⁴ Bag-u manbuul siya dugu baka ag tumindug sa atubangan Kaban maatubangan sa butlakan. Sa panab-anan niya ituturu, iwidwisik niya ti dugu sa inda pag taklub makapitu ginan.

¹⁵ Iyawun diman niya ti kambing bilang handug sa paglumpiyu kasalanan manga tawu. Daran-un niya inda kay dugu sa Pinakabanal pag Sulud-sulud bag-u iwidwisik inda sa taklub Kaban Kasunduan, parihu sa kay binwat sa dugu tudu baka.

¹⁶ Sa panab-anan tunda pag buwat ni Aarun, malumpiyu ti Pinakabanal pag Sulud-sulud ginan sa kayagtingan manga taga Israil hanggan sa kanda manga kasalanan ag paglapastangan. Buwatun diman niya inda sa iba pag manga bahagi Turda sa karaw-an kayagtingan manga taga Israil.

¹⁷ Kailangan unman may tawu sa sulud Turda ginan sa udas sumaka si Aarun sa Pinakabanal pag Sulud-sulud tugka sa lumuwas siya. Pagka mabuwat yi niya inda pag buruwatun para malukat siya hanggan kay magtal-anakan kaibahan ti buu Israil,

¹⁸ lumuwas siya sa Pinakabanal pag Sulud-sulud ag umati sa harandugan ati baliwa sa may arani sabian Turda. Bag-u mam-ul siya dugu baka hanggan kambing ihinandug ag ipayid niya sa manga ga sungay sa suuk harandugan hampay malumpiyu tunda.

¹⁹ Bag-u isawsaw niya kay ituturu sa dugu ag iwidwisik niya tunda makapitu sa harandugan para ihandug tunda sa Panginuun hampay malumpiyu ag pabanalun sa pagkamauring dahil sa kasalanan manga taga Israil.

²⁰ Pagkatapus mabwat ni Aarun ti paglumpiyu sa Pinakabanal pag Sulud-sulud hanggan ti iba waya pag manga bahagi Turda kaibahan ti harandugan, darahun niya sa karaw-an ti buhi pag kambing.

²¹ Ikupa niya kay duwa ka kamang sa ulu kambing bag-u iampu niya ti tanan kasalanan hanggan ti paglapastangan manga Israilita. Sa panab-anan siyun misalin kanda manga kasalanan tabug sa ulu kambing. Bag-u ipakaun ni Aarun sa katiwala ti kambing hampay palpasan sa pangawakawaan.

²² Nakan darahun kambing ti tanan kasalanan manga Israilita nu palpasan yi inda tawu sa pangawakawaan.

²³ Bag-u sumaka si Aarun sa Turda, ubahun niya kay rutay panpangulu manughandug kay isinulung katpung udwaya siya nakasaka sa Pinakabanal pag Sulud-sulud, ag tayakan niya inda ati.

²⁴ Marigus siya sa usa ka banal pag rugar ati sa Turda bag-u isulung niya kay panulungun pag rutay. Siyun ginan, lumuwas siya ag ihandug niya ti handug pagsunugun para sa kay sadili hanggan ti handug para sa manga Israilita hampay malumpiyu sida ginan sa kanda manga kasalanan.

²⁵ Sunugun diman niya sa harandugan ti manga taba handug sa paglumpiyu kasalanan.

²⁶ Ti piniyaran pag tawu para sa pagpalpas kambing para sa kan Asasil kailangan pipian niya kay rutay ag marigus bag-u siya bumalik sa kampu.

²⁷ Ti nasawad pag bahagi baka hanggan kambing kay dugu imaw ti dinara sa Pinakabanal pag Sulud-sulud hampay lumpiyuhun tunda, kailangan diman darahun sa luwas kampu ag sunugun.

²⁸ Ti tawu nagsunug tunda kailangan pipian niya kay rutay ag marigus bag-u siya bumalik sa kampu.

^29-31 Tunda ngani ti dapat buwatun manga taga Israil hanggan manga day-uhan mag-ulian kaibahan nida, tupadun nida inda hanggan waya aban. Sa ikasampulu pag sirang sa ikapitu pag bulan kailangan unman sida manhandum karan-unun ag danga diman magtarabahu, parihu sa Sirang Pamahari. Dahil sa tunda pag sirang buwatun nida ti tun-anun sa paglukat sa kanda ginan sa kanda manga kasalanan hampay malumpiyu sida sa atubangan Panginuun.

³² Ti pinili pag manughandug ag itinalaga kailis nimu ama bilang pangulu manughandug imaw ti paggampan sa buruwatun. Isulung niya kay rutay panpangulu manughandug,

³³ ag buwatun niya ti buruwatun sa paglumpiyu sa Pinakabanal pag Sulud-sulud, sa iba waya pag manga bahagi Turda kaibahan yi ti harandugan, ti manga manughandug hanggan ti tanan nasakupan.

³⁴ Kailangan tupadun nida inda pag surundanun hanggan aban. Bag-u malukat ti manga Israilita sa kanda kasalanan usa ka ulit kada timpu. Natupad ngani inda angay sa isinugu Panginuun sa kan Muysis.