Libitiku 15 - Hanunuu

Ti manga Magluwas sa Bilug Tawu Pagkilalan-un Mauring

¹ Sinugu Panginuun si Muysis ag si Aarun

² kuntay sabiha inda sa manga Israilita: Nu may amumutul ti usa ka lalaki dahil sa kay sakit, inda pag magluwas sa kanya pagkilalan-un mauring.

³ Una parargu inda magtiktik ngatay unman, iminsan di man gid siya sa mauring.

⁴ Una hintay ti maigyaan niya ngatay matukawan bumaliw yi mauring.

^5-7 Ag una si unu ti makaigpil sa kanya ngatay sa kay nag-igyaan una sa kay nagtukawan, kailangan pipian niya kay rutay ag pagparigus, dapat ibilang di siya sa mauring tugka sa misalup ti init.

⁸ Una si unu ti mabug-anan tunda pag tawu, kailangan gid pipian niya kay rutay ag marigus, dapat ibilang di siya sa mauring tugka sa misalup ti init.

^9-10 Una hintay ti matukawan tunda pag tawu, parihu sa turukawan nu magsakay sa kabayu, bumaliw diman mauring. Ti makaigpil sa tunda pag gamit kailangan gid pipian niya kay rutay ag marigus, dapat ibilang di siya sa mauring tugka sa misalup ti init.

¹¹ Una si unu ti mahiyaptan tunda pag tawu nu udwaya nakaugas kay kamang, kailangan gid pipian niya kay rutay ag marigus, dapat ibilang di siya sa mauring tugka sa misalup ti init.

¹² Tunda pag tawu nu makaigpil anglit, kailangan gipakun yi pag anglit, una hintay pag gamit buwat sa kayu nu kay mahiyaptan kailangan ugasan di tunda.

^13-15 Nu maayadan yi inda pag tawu sa kay mag-asaydan, mag-alagad waya siya pitu ka sirang. Bag-u pipian niya kay rutay ag marigus sa danum ginan sa bulbugan hampay malumpiyu yi siya. Sa ikawalu pag sirang, kailangan mandara siya duwa ka kalampati ngatay duwa ka kurkuru sa atubangan Panginuun sa may sabian Turda Taragbuan. Bag-u ipakaun niya tunda sa manughandug imaw ti manhandug, kay usa handug sa paglumpiyu kasalanan ag kay usa handug pagsunugun. Sa katida pag buwat manughandug sa atubangan Panginuun, mab-ul ti kayagtingan ginan sa tunda pag tawu may amumutul, ag bumaliw yi siya malumpiyu.

¹⁶ Nu magluwas kay similya ti usa ka lalaki, kailangan marigus siya, dapat ibilang di siya sa mauring tugka sa misalup ti init.

¹⁷ Una hintay pag rutay aw ngatay gamit buwat ginan sa paknul nu natiktikan ginan sa kinatawu lalaki kailangan pipian, dapat ibilang di tunda sa mauring tugka sa misalup ti init.

¹⁸ Nu mangululidan ti lalaki ag babayi, bag-u manluwang ti ginan sa kinatawu lalaki, kailangan marigus sida duwa, dapat ibilang di sida sa mauring tugka sa misalup ti init.

¹⁹ Nu magkadugu ti usa ka babayi, kabilang siya sa mauring sa sulud pitu ka sirang, ag una si unu ti manhiyaput sa kanya ibilang diman sa mauring tugka sa misalup ti init.

²⁰ Nakan una hintay kay maigyaan una matukawan katpung sa kay magkadugu, bumaliw inda mauring.

^21-23 Una si unu ti makaigpil sa kay nag-igyaan aw ngatay sa kay nagtukawan kailangan gid pipian niya kay rutay bag-u marigus, dapat ibilang di siya sa mauring tugka sa misalup ti init.

²⁴ Nu mangulid ti lalaki sa babayi magkadugu, ibilang diman sa mauring ti lalaki sa sulud pitu ka sirang, hanggan ti una hintay kay maigyaan bumaliw diman mauring.

²⁵ Nu ti usa ka babayi magkadugu yi sa udwaya niya kaudasan aw ngatay linmampas sa kay kaudasan, ibilang siya sa mauring, parihu diman sa kay magkadugu. Ibilang siya sa mauring habang magkadugu waya.

²⁶ Una unu kay maigyaan ngatay matukawan habang magkadugu waya siya bumaliw diman mayagting, parihu diman sa kay magkadugu.

²⁷ Ag una si unu ti makaigpil siti bumaliw diman mauring. Kailangan pipian niya kay rutay ag marigus, dapat ibilang di siya sa mauring tugka sa misalup ti init.

^28-30 Nu nap-ut yi kay magkadugu babayi, pag-alagad siya pitu ka sirang ag malumpiyu yi siya. Sa ikawalu pag sirang, kailangan mandara siya duwa ka kalampati ngatay duwa ka kurkuru sa manughandug ati sa may sabian Turda Taragbuan. Ihandug manughandug kay usa bilang panlumpiyu sa kasalanan ag kay usa bilang handug pagsunugun. Sa panab-anan tunda pag buwat manughandug malukat ti babayi sa mauring dahil sa kay magkadugu.

³¹ Sinabihan Panginuun si Muysis hanggan si Aarun kuntay pasandami gid ti manga Israilita tungkul sa manga bagay makapauring sa kanda, hampay balaw sida mamatay nu umatag sida sa Turda Panginuun, asan sa karaw-an kampu.

^32-33 Tunda ngani ti manga surundanun tungkul sa lalaki pagluwangan ginan sa kay kinatawu ngatay may amumutul, hanggan tungkul sa babayi magkadugu ngatay pagduguun udwaya sa kay kabulanan, ag tungkul sa lalaki nangulid sa babayi mauring.