Libitiku 14 - Hanunuu

Ti Paglumpiyu sa Tawu Inmayad sa Dilikadu pag Sakit sa Lukub

^1-2 Inda ti manga surundanun pagsabihun Panginuun sa kan Muysis tungkul sa paglumpiyu sa tawu inmayad sa dilikadu pag sakit sa lukub: Pagkatapus mitultul sa manughandug ti tungkul sa sakit usa ka tawu,

³ manluwas sa kampu ti manughandug ag himaldan niya kay bilug tunda pag tawu. Nu inmayad yi kay sakit,

⁴ manpabuul ti manughandug duwa ka malumpiyu pag manuk buhi, bag-u usa ka pulud kayu sidru, hanggan maragang pag panhigut, ag usa ka bugkus isupu.

⁵ Bag-u ipaiyaw manughandug ti usa ka manuk sa babaw anglit may danum ginan sa bulbugan.

⁶ Bul-un waya niya ti usa ka buhi pag manuk, hanggan ti kayu sidru, ti maragang pag higut, ag ti isupu, bag-u kay isugmaw tunda tanan sa danum may dugu manuk iniyaw.

⁷ Ag ti danum may dugu iwidwisik niya makapitu ka ulit sa tawu inmayad sa dilikadu pag sakit sa lukub, bag-u ipaalam niya kuntay malumpiyu yi tunda pag tawu. Bag-u palpasan manughandug ti buhi pag manuk sa bantud.

⁸ Dapat bag-u siya kilalan-un malumpiyu, pipian dapu niya kay rutay, kidkidun niya ti tanan buhuk hanggan bulbul, ag marigus siya. Mahimu yi siya makasulud sa kampu dapat unman siya mahimu umuli sa kay turda sa sulud pitu ka sirang.

⁹ Sa ikapitu pag sirang, kidkidun maan niya kay buhuk sa ulu hanggan kay bungut, kay kidsun, hanggan ti tanan-tanan niya bulbul, bag-u pipian niya kay rutay bag-u marigus.

¹⁰ Sa ikawalu pag sirang, kailangan magdara siya duwa ka lalaki anak karanidu ag usa ka timpu babayi karanidu, unman may alangan. Magdara diman siya unum ka kilu marinu pag kalasi arina may lakay lana bilang handug pasalamat. Ag magdara waya siya usa ka tasa lana.

¹¹ Bag-u darahun manughandug ti malumpiyu yi pag tawu dara kay manga handug sa atubangan Panginuun siyun sa arani sabian Turda Taragbuan.

¹² Bul-un manughandug ti usa ka lalaki karanidu hanggan ti usa ka tasa lana, ag ihandug niya tunda bilang handug bayad sa kasalanan. Bag-u ipaabwat niya tunda sa atubangan Panginuun bilang handug pag-ipaabwat.

¹³ Iyawun niya ti karanidu sa banal pag rugar, ati sa iriyawan handug panlumpiyu sa kasalanan hanggan handug surunugun. Inda pag handug karanidu banal gid, ag tunda para yi sa manga manughandug, parihu diman sa handug panlumpiyu sa kasalanan.

¹⁴ Bag-u bum-ul ti manughandug dugu karanidu ag ipayid niya tunda sa pararungpungan tuli tawu hanggan sa ina-ina niya sikun pag kamang ag lulud.

¹⁵ Manbuul lana ti manughandug ag ipauli niya sa kay wala pag dalukap,

¹⁶ ag kay usa niya ka ituturu sa sikun pag kamang isaw-saw sa lana ag iwidwisik makapitu ka ulit sa atubangan Panginuun.

¹⁷ Ti nasawad pag lana sa kay dalukap ipayid niya sa manga bahagi bilug tawu pinayidan dugu: sa pararungpungan tuli tawu hanggan sa ina-ina niya sikun pag kamang ag lulud.

^18-20 Ti nasawad pag lana sa dalukap manughandug ipayid niya sa ulu tawu. Bag-u ihandug manughandug ti handug para sa paglumpiyu kasalanan. Pagkatapus tunda, iyawun manughandug ti handug surunugun ag ihandug niya tunda sa harandugan kaibahan ti handug pasalamat. Sa kainda pag buwat manughandug sa atubangan Panginuun, mab-ul ti kayagtingan tawu ag malumpiyu yi siya.

²¹ Dapat nu pugri tunda pag tawu ag unman siya may kakayahan manhandug tunda pag manga handug, mandara lang siya usa ka lalaki karanidu ihandug niya bilang bayad sa kasalanan. Ipaabwat manughandug tunda pag handug sa Panginuun hampay malukat siya sa kay kasalanan. Mandara diman siya duwa ka kilu marinu pag kalasi arina may lakay lana ulibu bilang handug pasalamat. Ag mandara waya gid siya usa ka tasa lana.

²² Angay sa kay makayahan, mandara siya duwa ka kalampati ngatay duwa ka kurkuru; kay usa handug niya bilang paglumpiyu kasalanan ag kay usa waya handug bilang pagsunugun.

²³ Sa ikawalu pag sirang, darahun niya inda tanan pag handug sa atubangan Panginuun ati sa arani sabian Turda Taragbuan, ag ipakaun niya tunda sa manughandug.

²⁴ Bul-un manughandug ti karanidu handug bayad sa kasalanan hanggan ti usa ka tasa lana ag ipaabwat niya tunda sa atubangan Panginuun bilang handug pag-ipaabwat.

²⁵ Bag-u iyawun niya ti karanidu ag bum-ul siya dugu siyun ginan bag-u ipayid niya sa pararungpungan tuli tawu hanggan sa ina-ina niya sikun pag kamang ag lulud.

²⁶ Bag-u paulian manughandug lana kay kamang sa wala pag dalukap,

²⁷ ag lakaw sa kay ituturu sikun pag kamang, iwidwisik niya ti lana ulibu makapitu ka ulit ati sa atubangan Panginuun.

²⁸ Ti nasawad pag lana sa kay dalukap ipayid niya sa manga bahagi bilug tawu pinayidan dugu: ipayid niya tunda sa sikun pararungpungan tuli tawu hanggan sa ina-ina niya sikun pag kamang ag lulud.

^29-31 Ti nasawad pag lana sa dalukap manughandug ipayid niya sa ulu tawu. Bag-u ihandug manughandug ti duwa ka kalampati ngatay ti duwa ka kurkuru; kay usa handug panlumpiyu sa kasalanan ag kay usa handug pagsunugun. Ihandug diman niya ti handug pasalamat. Katunda ngani ti buwatun manughandug sa atubangan Panginuun, hampay malukat ti tawu sa kay kasalanan.

³² Tunda ngani ti manga surundanun tungkul sa paglumpiyu kasalanan tawu may imaw dilikadu pag sakit sa lukub ag nu kabitay niya buwatun nu balaw niya makayahan ti pag kailanganun sa handug para sa paglumpiyu.

Ti manga Surundanun tungkul sa manga Kalmu Magtubu sa Balay

³³ Inda ti sinabi Panginuun sa kan Muysis hanggan sa kan Aarun

³⁴ tungkul sa dapat nida buwatun nu patubuun Panginuun ti kalmu sa kanda manga balay nu ati yi sida sa Kanaan, ti rugar ipakaun Panginuun sa kanda bilang maranahun nida:

³⁵ Nu ti may apu usa ka balay nakakit may imaw kalmu kay balay, kailangan sabihan niya ti manughandug.

³⁶ Kailangan bag-u sumaka ti manughandug sa tunda pag balay hampay bantayan ti kalmu, sumugu dap siya kuntay palwasan ti tanan kasiyunan ati ginan, dahil barang una tunda hanggan miminsan sa mauring. Nu matapus tida sumulud yi ti manughandug sa balay

³⁷ ag bantayan niya ti kalmu sa lingub. Bag-u nu makitan niya malatuy aw ngatay marara mag-uhup tugka sa basad lingub,

³⁸ lumuwas siya sa balay bag-u talakpan niya inda sa sulud pitu ka sirang.

³⁹ Sa ikapitu pag sirang, bantayan maan niya inda. Bag-u nu ti kalmu laun kay nagmaliw sa iba bahagi lingub,

⁴⁰ ipatingkab niya ti manga batu may imaw kalmu sa bahagi lingub ag iyamut sa luwas tag banwa, ati sa rugar rayamtan manga mauring pag bagay.

⁴¹ Ag silsilun niya inda tanan pag manga bahagi lingub sa sulud balay bag-u ti tanan sinilsil ipayamut niya sa luwas tag banwa, ati sa rugar rayamtan manga mauring pag bagay.

⁴² Bag-u ilisan niya ti manga daan batu tiningkab sa bahagi lingub ag pakputan pamalitis.

⁴³ Dapat nu pagkalawuy tida kinalmu maan ti balay,

⁴⁴ atagun maan inda manughandug ag bantayan. Nu magmaliw ti kalmu, ibilang tunda pag balay sa mauring, dahil inda pag kalasi kalmu pabalik-balik.

⁴⁵ Nakan ngani dautun tunda pag balay bag-u kay manga kalap iyamut sa luwas tag banwa, ati sa rugar rayamtan manga mauring pag bagay.

⁴⁶ Una si unu ti sumaka siyun pag balay tinalakpan yi, iminsan diman sa mauring tugka sa yabi.

⁴⁷ Una si unu ti maturug ngatay mangaun sa siyun pag balay kailangan gid pipian niya kay rutay.

⁴⁸ Dapat nu balaw yi binmalik ti kalmu sa paghimalad manughandug sa balay igu pinakputan pamalitis ti bahagi manga lingub kinalmu, ipaalam manughandug kuntay malumpiyu yi ti balay dahil nadura yi kay kalmu.

⁴⁹ Hampay miminsan sa malumpiyu ti balay, bumuul ti manughandug duwa ka manuk, ag kayu sidru, bag-u higut maragang hanggan isupu.

⁵⁰ Iyawun niya ti usa ka manuk sa babaw anglit may danum ginan sa bulbugan.

⁵¹ Bag-u bul-un niya ti kayu sidru, ti maragang pag higut, ti isupu, hanggan ti buhi pag manuk, ag isugmaw niya inda tanan sa danum may imaw dugu manuk iniyaw. Bag-u ti danum may imaw dugu iwidwisik niya makapitu ka ulit sa balay.

⁵² Nakan sa panab-anan dugu manuk, hanggan danum ginan sa bulbugan, ag buhi pag manuk, bag-u kayu sidru, ag isupu, hanggan marara pag higut, malumpiyu manughandug ti balay.

⁵³ Bag-u palpasan niya ti buhi pag manuk ati sa luwas banwa. Sa panab-anan tunda pag binwat manughandug, madura ti kayagtingan sa balay ag bumaliw malumpiyu yi tunda.

^54-57 Tunda ngani ti manga surundanun tungkul sa manga dilikadu pag sakit magatul sa lukub, una sa magkabaga, aw ngatay magkalupgas, una sa magnaknak, ag tungkul sa kalmu sa rutay hanggan kalmu sa balay. Nakan lakaw sa inda pag manga surundanun, maalaman niyu nu naan ti malumpiyu ag ti mauring.