Libitiku 13 - Hanunuu

Ti manga Surundanun sa Durungugun sa Lukub

¹ Inda pag manga surundanun ipinakaun Panginuun sa kan Muysis hanggan sa kan Aarun:

² Nu ti lukub usa ka tawu magkabaga, maglimutyug ngatay maglagti tanda dilikadu pag sakit sa lukub, kailangan daran-un tunda pag tawu sa kan Aarun ngatay sa usa ka manughandug lahi ni Aarun.

³ Himaldan manughandug tunda kay lukub, bag-u nu makitan niya maglagti kay bulbul ag nu nag-abasad, may dilikadu siya pag sakit sa lukub. Ag kailangan ipaalam manughandug kuntay mauring inda pag tawu.

⁴ Nu magpanlagti kay manga lukub balaw tuduk sa nayi hanggan unman maglagti kay bulbul, ipablag siya manughandug sa manga tawu sa sulud pitu ka sirang.

⁵ Sa ikapitu pag sirang, himaldan maan siya manughandug. Ag nu kumun diman kay lukub unman inda mag-amat, ipasaman di maan siya manughandug sa manga tawu sa sulud pitu ka sirang.

⁶ Sa ikapitu pag sirang, himaldan maan siya manughandug. Nu linmatu yi kay garis sa kay lukub ag unman yi inmamat, ipaalam manughandug kuntay malumpiyu yi siya dahil garis wata tunda. Siyun ginan, kailangan niya pipian kay rutay, ag malumpiyu yi siya.

⁷ Dapat nu inmamat ti manga garis sa kay lukub siyun ginan sa kay nagpahimalad sa manughandug ag ipinaalam manughandug kuntay malumpiyu siya, kailangan manpahimalad maan siya sa manughandug.

⁸ Nu ungud tutuu nan-amat kay garis, ipaalam maan manughandug kuntay mauring siya dahil may imaw siya magmaliw pag sakit sa lukub.

⁹ Una si unu ti may palatandaan may dilikadu pag sakit sa lukub kailangan darahun sa manughandug.

¹⁰ Nu sa maghimalad manughandug magpanlagti ti baga sa lukub ag makitan niya imaw kay dahilan nakan maglagti ti manga bulbul, ag mag-akitan yi ti nayi,

¹¹ usa tunda ka dilikadu pag sakit sa lukub magpabalik-balik. Ag ipaalam manughandug kuntay mauring siya. Balaw yi kailangan ipasaman waya siya hampay himaldan dahil pihu mauring siya.

¹² Nu sa maghimalad manughandug inmamat kay sakit sa buu bilug tawu,

¹³ kailangan himaldan waya gid niya kaayad tunda pag tawu. Ag nu ungud ngani inmamat kay sakit sa buu bilug niya hanggan nu nanlagti kay tanan lukub, ipaalam manughandug kuntay malumpiyu siya.

^14-15 Dapat nu sa maghimalad manughandug mag-akitan yi ti nayi, ipaalam niya kuntay mauring tunda pag tawu dahil may dilikadu siya pag sakit sa lukub. Inda pag magluwang nayi pagkilalan-un mayagting.

¹⁶ Dapat nu kinmugan ti nayi ag linmagti kay naglatuan, manpahimalad maan siya sa manughandug.

¹⁷ Nu tutuu ngani nag-ayad inda, ipaalam manughandug kuntay malumpiyu yi siya.

¹⁸ Nu ti usa ka tawu may baga naayadan di,

¹⁹ dapat pagka dugay nanlagti di maan aw ngatay naragang, kailangan ipahimalad niya tunda sa manughandug.

²⁰ Nu nag-abasad ti kurubyu ag linmagti ti bulbul, ipaalam manughandug kuntay mauring siya pag tawu, dahil may dilikadu siya pag sakit sa lukub ginan sa baga.

²¹ Dapat nu sa maghimalad manughandug unman maglagti kay bulbul hanggan unman diman mag-abasad kay kurubyu, bilang maglatu yi, ipablag siya manughandug sa manga tawu sa sulud pitu ka sirang.

²² Nu inmamat tunda sa iba pag bahagi lukub, ipaalam manughandug kuntay mauring siya, dahil tanda tunda dilikadu pag sakit sa lukub.

²³ Dapat nu unman waydi mag-amat, naglatuan lang tunda baga, ipaalam manughandug kuntay malumpiyu yi siya.

²⁴ Nu ti usa ka tawu napali ag nagkaimaw kurubyu bag-u linmagti tunda ngatay naragang,

²⁵ kailangan ipahimalad tunda sa manughandug. Nu linmagti kay bulbul ag nagkaimaw kurubyu, may imaw siya dilikadu pag sakit sa lukub nag-umpisa sa pali apuy. Ipaalam manughandug kuntay mauring siya.

²⁶ Dapat nu sa maghimalad manughandug unman maglagti ti bulbul hanggan unman diman mag-abasad ti kurubyu, ag nu bilang maglatu yi, ipablag siya manughandug sa manga tawu sa sulud pitu ka sirang.

²⁷ Sa ikapitu pag sirang, himaldan maan siya manughandug. Nu inmamat tunda sa iba bahagi lukub, ipaalam manughandug mauring siya, dahil tanda tunda dilikadu pag sakit sa lukub.

²⁸ Dapat nu unman mag-amat ag linmatu yi, usa lang tunda ka baga nag-umpisa sa pali apuy. Bag-u ipaalam manughandug kuntay malumpiyu yi siya.

²⁹ Nu ti usa ka tawu may tanda dilikadu pag sakit sa lukub sa kay ulu una timid,

³⁰ kailangan ipahimalad niya inda sa manughandug. Nu inmabasad ti kurubyu ag kay manga buhuk ngatay kay bungut maggatul hanggan magkaunut, kailangan ipaalam manughandug kuntay mauring inda pag tawu, dahil may dilikadu siya pag sakit magatul sa ulu ngatay sa timid.

³¹ Nu sa maghimalad manughandug unman inmabasad ti kurubyu dapat unman yi inda may imaw mabiru pag buhuk ngatay bungut, ipablag siya manughandug ginan sa manga tawu sa sulud pitu ka sirang.

³² Sa ikapitu pag sirang, himaldan maan manughandug ti tawu may sakit magatul. Nu unman yi tunda mag-amat ag unman mag-abasad kay kurubyu hanggan unman diman magkaunut kay buhuk ngatay bungut,

³³ kailangan kalbuhun niya kay buhuk ngatay uguyan kay bungut dapat balaw niya iminsan ti bahagi may magatul. Bag-u ipablag maan siya manughandug sa sulud pitu ka sirang.

³⁴ Sa ikapitu pag sirang, himaldan maan manughandug kay may magatul. Nu unman tunda mag-amat hanggan mag-abasad kay kurubyu sa garis, ipaalam manughandug kuntay malumpiyu yi siya. Bag-u pipian tawu kay rutay, ag kilalan-un yi siya malumpiyu.

³⁵ Dapat nu inmamat kay magatul sa kay lukub matapus maipaalam manughandug kuntay malumpiyu yi siya,

³⁶ himaldan maan siya manughandug. Nu inmamat ti magatul sa kay lukub, balaw yi kailangan himaldan manughandug nu may buhuk ngatay bungut magkaunut dahil pihu mauring siya.

³⁷ Dapat nu sa maghimalad manughandug unman mag-amat hanggan unman may mabiru buhuk ngatay bungut magtubu, tunda duy inmayad yi ngap. Ag ipaalam manughandug kuntay malumpiyu yi siya.

³⁸ Nu may maglagti sa lukub usa ka tawu,

³⁹ kailangan ipahimalad niya tunda sa manughandug. Ag nu manga malapsi pag magpanlagti, tunda manga bulhug lang magtubu sa lukub. Tunda pag tawu malumpiyu di.

^40-41 Nu ti usa ka tawu nakalbu sa may bangas arani ngatay sa kay aripudwan, malinis di siya.

^42-44 Dapat nu may baga magkaragang sa kay kalbu, kailangan ipahimalad niya tunda sa manughandug. Ag nu tunda pag magkaragang pag baga usa ka dilikadu pag sakit sa lukub, ipaalam manughandug kuntay mauring siya.

⁴⁵ Ti tawu may dilikadu pag sakit sa lukub kailangan magsulung gitas pag rutay, barugaun niya kay buhuk, bag-u tabunan niya kay sirung pag bahagi niya uyahun. Bag-u manringgit siya, “Mauring aku! Mauring aku!”

⁴⁶ Ibilang siya sa mauring habang udwaya mag-ayad kay sakit. Kailangan ipauli siya sa luwas kampu balaw may kaibahan.

Ti manga Surundanun tungkul sa Kalmu

^47-50 Nu kalmuhun ti rutay buwat sa dilana ag rutay linu ngatay ti una hintay pag kalasi binwat ginan sa paknul, kailangan pag ipahimalad tunda sa manughandug. Igu mahimaldan manughandug ti rutay ngatay ti paknul, kailangan ipablag niya tunda sa sulud pitu ka sirang.

^51-52 Sa ikapitu pag sirang, himaldan maan tunda manughandug. Nu inmamat ti kalmu, tunda pag rutay ngatay pag paknul ibilang sa mauring, ag kailangan sunugun tunda sa apuy dahil mag-amat tunda pag kalmu.

⁵³ Dapat nu sa maghimalad manughandug unman mag-amat ti kalmu,

⁵⁴ sumugu siya kuntay pipii tunda pag rutay ngatay tunda pag panulung paknul, bag-u ipablag niya tunda sa sulud pitu waya gid ka sirang.

⁵⁵ Siyun ginan, himaldan maan manughandug. Ag nu ti kalmu unman magkauman, tunda pag rutay ngatay paknul pag panulung iminsan sa mauring una balaw inmamat kay kalmu. Kailangan sunugun tunda una sa luwas ngatay sa sulud panulung kay kalmu.

⁵⁶ Dapat nu sa paghimalad manughandug magpusyaw ti kalmu, gisia yi lang niya ti may kalmu pag bahagi rutay ngatay paknul.

⁵⁷ Dapat nu magbalik maan ti kalmu ag mag-amat, kailangan sunugun yi tunda pag rutay ngatay pag paknul.

⁵⁸ Nu nadura yi ti kalmu pagka napipian ti rutay ngatay ti paknul, pipian maan inda uman ag bumaliw yi inda malumpiyu.

⁵⁹ Imaw tunda ti manga surundanun nu kabitay maalaman kuntay malumpiyu ngatay mauring ti rutay buwat sa bulbul ngatay linu hanggan ti una hintay pag bagay ti binwat ginan sa paknul nagkaimaw kalmu.