Libitiku 12 - Hanunuu

Ti manga Surundanun tungkul sa Babayi Nanganak

¹ Sinugu Panginuun si Muysis

² hampay sabihun inda sa manga Israilita: Nu ti usa ka babayi nanganak usa ka lalaki, baliwun siya mauring sa sulud pitu ka sirang, parihu ga katpung magkadugu siya.

³ Sa ikawalu pag sirang turiun kay anak.

⁴ Dahil pagduguun waya siya, umalagad siya 33 ka sirang bag-u di siya kilalan-un malumpiyu. Unman siya mahimu makaigpil una hintay pag bagay para sa Panginuun ag unman diman siya mahimu umatag sa Turda Taragbuan tugka sa udwaya siya malumpiyu.

⁵ Nu babayi kay anak, kilalan-un siya mauring sa sulud 14 ka sirang, parihu ga katpung magkadugu siya. Dahil pagduguun waya siya, umalagad siya 66 ka sirang bag-u di siya kilalan-un malumpiyu.

⁶ Nu tapus yi ti manga sirang niya para sa paglumpiyu, lalaki man ngatay babayi kay anak, dumara siya usa ka karanidu usa ka timpu kay idad atag sa manughandug ati sa may arani sabian Turda Taragbuan bilang handug pagsunugun, hanggan usa ka kurkuru ngatay kalampati bilang handug sa paglumpiyu kasalanan.

^7-8 Ihandug tunda manughandug sa atubangan Panginuun hampay madura ti kayagtingan babayi dahil sa kay magkadugu, siyun ginan kilalan-un yi malumpiyu siya. Nu unman siya makadara karanidu, mandara lang siya duwa ka kalampati ngatay duwa ka kurkuru; kay usa handug pagsunugun ag kay usa handug sa paglumpiyu kasalanan. Sa kainda pag buwat manughandug, madura yi kay kayagtingan ag bumaliw yi siya malumpiyu. Imaw inda ti surundanun tungkul sa babayi nanganak.