Libitiku 11 - Hanunuu

Ti manga Hayup Malumpiyu ag Mayagting

^1-3 Sinugu Panginuun si Muysis hanggan si Aarun hampay sabihun inda sa manga Israilita: Mahimu niyu kan-un una hintay pag manga hayup magkabuhi sa daga tunda may buka kanda manga kuku hanggan magtalta uman kanda kinaun.

^4-8 Dapat danga niyu pagkan-a ti manga hayup magtalta uman kanda kinaun una unman buka kanda kuku, parihu sa kamilyu, badyir ag kunihu. Danga niyu pagkan-a ti babuy, dahil una may buka kay kuku unman waydi tunda magtalta uman kay kinaun. Kilalan-un niyu mauring tunda pag manga hayup. Danga kamu magkaun ngatay mag-igpil tunda pag manga hayup namatay.

^9-12 Mahimu kanyu kan-un ti una hintay pag hayup magkabuhi sa danum may manga tadak hanggan manga siksik. Dapat danga gid niyu pagkan-a ti unman may tadak hanggan manga siksik, danga diman niyu pag-igpili ti bilug manga hayup namatay. Kilalan-un niyu mayagting tunda pag manga hayup.

^13-19 Danga gid niyu pagkan-a ti manga hayup maglayang parihu sa manga agila, manga uwak, manga manuk magkaun sa bangkay tawu ngatay hayup, manga buyaw, manga bukaw, manga andurugmun, manga manuk manga magdagit sa manga isda, manga talabung, manga tagwak, ag manga banug. Kilalan-un niyu mayagting tunda pag manga hayup.

^20-23 Mahimu niyu kan-un ti manga iyay maglayang ag magyapang may daraka manga lulud panlupsik, parihu sa manga apan, manga laylayu, hanggan manga tipung. Dapat danga gid niyu pagkan-a ti iba ka manga iyay maglayang ag magyapang. Kilalan-un niyu mayagting tunda pag manga hayup.

^24-28 Danga niyu pag-igpili ti bilug namatay hayup balaw buka kay kuku hanggan unman mag-uman magtalta kanda kinaun. Danga diman niyu pag-igpili ti namatay pag manga bilug hayup upat kay lulud may manga kuku pan-garus. Kilalan-un niyu mayagting tunda pag manga hayup. Una si unu ti makaigpil sa namatay bilug hayup, kailangan pipian niya kay rutay, dapat mauring waya siya tugka sa mag-isalup init.

^29-31 Kilalan-un niyu mayagting tunda pag manga hayup magyapang parihu sa manga angbu, manga bayukbuk angbu, manga suksuk, manga tiki, manga bayawak, manga buaya, manga akang, hanggan manga timbakalan. Una si unu ti makaigpil sa namatay bilug hayup kilalan-un mauring tugka sa pag-isalup init.

³² Una hintay pag bagay ti malagpakan bilug namatay tunda mauring yi gid, una bagay buwat sa kayu, una pisahan, una paknul, ngatay saku, hanggan una naan inda paggamitun. Kailangan ugasan tunda sa danum, dapat kilalan-un waya inda mauring tugka sa mag-isalup init, makalawuy tunda, malumpiyu yi.

³³ Nu malagpakan bilug namatay ti tapayan, tanan kay sukad tapayan mauring yi, ag kailangan basagun tunda.

³⁴ Una hintay pag karan-unun ti sinabakanan danum ginan sa tunda pag tapayan mayagting yi ngap waydi. Mayagting yi waydi ngapu una hintay pag irinmun ginan sa tunda pag tapayan.

³⁵ Una hintay ti malagpakan kanda bilug namatay mayagting yi ngap waydi. Nu pugun ti nalagpakan ngatay anglit, mayagting diman tunda ag kailangan diman basagun.

³⁶ Ti bulbugan ngatay ti bubun nu malagpakan namatay bilug hayup masabi di tunda malumpiyu, dapat ti makaigpil sa tunda pag namatay hayup bumaliw mayagting.

³⁷ Una hintay pag binhi ti malagpakan tunda malumpiyu di,

³⁸ dapat nu mahuruman sa danum pag binhi mayagting yi tunda.

³⁹ Nu namatay yi ti usa ka hayup pagkan-un, una si unu ti makaigpil kilalan-un siya mayagting tugka sa mag-isalup ti init.

⁴⁰ Una si unu ti bum-ul ngatay kumaun sa tunda pag bilug hayup kailangan pipian niya kay rutay, dapat baliwun siya mayagting tugka sa mag-isalup init.

^41-42 Danga niyu pagkan-a ti una hintay pag hayup magyapang dahil mayagting tunda: una hintay pag magyapang sa panab-anan niya tiyan ngatay upat aw ngatay mayamu kay karamay.

^43-44 Danga niyu pag-uringi kanyu sadili sa magkaun tunda pag manga hayup, dahil aku, ti Panginuun, kanyu Diyus. Ipakaun niyu kanyu sadili para sa kangku ag pagpangabuhi kamu may kabanalan dahil banal aku.

⁴⁵ Aku ti Panginuun imaw ti nagpalwas sa kanyu sa Ihiptu agud aku kanyu Diyus. Nakan ngani kailangan pagpangabuhi kamu may kabanalan dahil banal aku.

⁴⁶ Sa panab-anan inda pag manga surundanun tungkul sa tanan kalasi hayup: ti manga hayup magkabuhi sa daga, ti manga hayup magkabuhi sa danum, ti manga hayup maglayang, ti manga hayup magyapang.

⁴⁷ Maalaman niyu nu naan ti malumpiyu ag ti mauring, ti mahimu kan-un ag ti unman mahimu kan-un.