Libitiku 10 - Hanunuu

Ti Pagkamatay ni Nadab ag ni Abihu

¹ Ati katpung, si Nadab ag si Abihu kay manga anak ni Aarun nagbuul sida kanya-kanya paulian kamangyan. Pinaulian nida tunda baga apuy hanggan kamangyan ag ihinandug sa Panginuun. Dapat inda kanda binwat balaw gid angay sa sugu Panginuun, dahil kanda ginamit tuhay pag baga apuy balaw dapat nida gamitun.

² Nakan nagpadara apuy ti Panginuun ag inirub sida tugka sa namatay sa atubangan Panginuun ati sa Turda Taragbuan.

³ Magkun si Muysis sa kan Aarun, “Tunda ngani kay ibug sabihun Panginuun katpung magkumun siya, ‘Kailangan kilalan-un manga manughandug kang kabanalan, ag kailangan dayawun aku sa atubangan tanan manga tawu.’ ” Unman nakasagut si Aarun.

⁴ Nakan ipinatawag ni Muysis si Misail ag si Ilsapan, kay manga anak lalaki ni Usyil kay bapa ni Aarun, ag sinabihan sida, “Dali, bul-a niyu ti manga bangkay niyu manga katawuhan ati sa Turda bag-u daran-a atag sa luwas kampu.”

⁵ Nakan bin-ul ngani nida ti manga bangkay, dapat sa rutay lang sida pag naghiyaput, bag-u dinara nida sa luwas kampu angay sa isinugu ni Muysis.

⁶ Bag-u magkun si Muysis sa kan Aarun hanggan sa kay manga anak, sa kan Iliyasar ag sa kan Itamar, “Danga niyu pagbarugaa kanyu buhuk ngatay paggisia kanyu manga rutay sa pagpakakit kuntay kamu magkaruku sa namatay. Nu buwatun niyu tunda, mamatay diman kamu ag magalit ti Panginuun sa buu banwa Israil. Kanyu manga katawuhan Israilita, imaw ti manruku sa kanda duwa inirub Panginuun.

⁷ Danga dapu kamu mag-ighit ginan sa sabian Turda. Nu buwatun niyu inda, pihu mamatay kamu, dahil pinili kamu Panginuun bilang manughandug sa panab-anan pagbuhus lana sa kanyu.” Bag-u tinupad ngani nida kay pagsabihun ni Muysis.

⁸ Sinabi Panginuun sa kan Aarun,

⁹ “Kawu hanggan kanmu manga anak balaw mahimu magsulud sa Turda nu nakainum intus ngatay una hintay pag kalasi irinmun makalangu. Nu buwatun niyu tunda, pihu gid mamatay kamu. Inda pag manga surundanun kailangan gid niyu tupadun tugka sa sunud pag manga sinulput tawu.

¹⁰ Kailangan niyu maalaman nu hintay ti para sa Panginuun ag ti para sa tanan, ti malumpiyu ag ti mauring.

¹¹ Ag kailangan tudluan niyu kanyu kaparihu manga Israilita sa tanan surundanun ipinakaun niku sa kanyu sa panab-anan ni Muysis.”

¹² Sinabi ni Muysis sa kan Aarun hanggan sa kay duwa ka anak nasawad, si Iliyasar ag si Itamar, “Bul-a niyu ti nasawad pag handug pasalamat ginan sa manga handug sa panab-anan apuy ihinandug sa Panginuun. Tamaa niyu inda balaw may lakay pamadaka ag kan-a niyu sa may arani harandugan dahil banal gid inda pag handug.

¹³ Kan-a niyu inda sa may arani lang banal pag rugar, dahil imaw inda kanyu bahagi ginan sa manga handug sa panab-anan apuy. Imaw inda ti isinugu Panginuun sa kangku.

¹⁴ “Kan-un niyu kaibahan kanyu magtal-anakan ti dubdub hanggan ti balangbang hayup ipinaabwat ag ihinandug sa Panginuun. Kan-un niyu inda sa manga rugar pag-isipun malumpiyu. Ipinakaun inda sa kanyu bilang kanyu pag bahagi ginan sa manga handug manga Israilita para sa mayad pag pakiusa.

¹⁵ Nu manhandug ti manga Israilita, ihandug nida kay dubdub hanggan kay balangbang hayup kaibahan ti manga taba pag-ihandug nida bilang handug sa panab-anan apuy. Ti dubdub hanggan ti balangbang ipaabwat nida sa atubangan Panginuun bilang handug pag ipaabwat. Imaw inda kanyu bahagi hanggan niyu manga lahi tugka aban, angay sa sugu Panginuun.”

¹⁶ Pagka nangusisa si Muysis tungkul sa kambing handug sa paglumpiyu kasalanan, nakitan niya nasunug yi inda tanan. Inisugan gid niya si Iliyasar hanggan si Itamar, ag binagawan niya sida.

¹⁷ Magkun siya, “Hayga balaw niyu kinaun ti handug sa paglumpiyu kasalanan sa banal pag rugar? Inda pag handug banal gid ag ipinakaun inda Panginuun sa kanyu hampay malukat ti nasakupan Israil sa kanda manga kasalanan sa atubangan Panginuun.

¹⁸ Dahil kay dugu tunda unman dinara sa sulud Banal pag Sulud-sulud, nakan ngani mana kinaun niyu tunda ati sa Turda, angay sa kang pag-ibilin sa kanyu.”

¹⁹ Nagsagut si Aarun sa kan Muysis, “Kis-ab naghandug kang manga anak sa harandugan para sa paglumpiyu kasalanan hanggan kanda handug surunugun, dapat namatay ti duwa sa kanda. Sa inda pag nangyari makabaya aw nguna ti Panginuun nu kinaun niku ti handug sa paglumpiyu kasalanan taynguna pag sirang?”

²⁰ Nagpasnu si Muysis sa kay sagut ni Aarun.