Libitiku 1 - Hanunuu

Ti Handug Surunugun

^1-2 Sinabihan Panginuun si Muysis ati sa Turda Taragbuan kuntay sabihun niya inda sa manga Israilita: Nu may imaw sa kanyu manhandug hayup sa Panginuun, paghandug siya baka, karanidu, ngatay kambing.

³ Nu baka kay ihandug bilang handug pagsunugun, kailangan lalaki inda ag unman may alangan. Ihandug niya inda sa may arani sabian Turda Taragbuan, hampay sa panab-anan inda pag handug tanggapun siya Panginuun.

⁴ Ikupa niya kay kamang sa kay pag-ihandug ulu baka, ag tanggapun inda Panginuun hampay malukat siya sa kay manga kasalanan.

⁵ Bag-u iyawun niya tunda pag hayup sa atubangan Panginuun. Ag kay dugu tunda iwidwisik manga manughandug lahi ni Aarun sa sangput harandugan, arani sa may sabian Turda Taragbuan.

⁶ Bag-u anitan manughandug ti hayup ag pahatun.

⁷ Pagkatapus, ti manga manughandug lahi ni Aarun pumamakut apuy sa harandugan ag pagbahan nida inda manga kayu inuyun kaayad.

⁸ Bag-u ipauli nida kaayad ti pinahat taguban sa apuy, hanggan kay ulu ag manga taba.

⁹ Kailangan ugasan dapu manughandug ti manga sa sulud bilug, hanggan kay manga lulud tunda. Bag-u ti manughandug yi ti mansunug tunda tanan sa harandugan bilang handug pagsunugun. Kay hungaw tunda pag handug sa panab-anan apuy makapasulung gid sa Panginuun.

¹⁰ Nu karanidu ngatay kambing waydi ti ihandug tawu bilang handug pagsunugun, kailangan lalaki inda ag unman may alangan.

¹¹ Iyawun niya inda sa atubangan Panginuun ati sa amihan baliwa harandugan. Bag-u iwidwisik manga manughandug lahi ni Aarun kay dugu sa sangput harandugan.

¹² Pagka mapahat yi inda manughandug, ipauli kaayad inda manughandug sa apuy, hanggan kay ulu ag manga taba.

¹³ Kailangan ugasan dapu manughandug ti manga sa sulud bilug, hanggan kay manga lulud tunda. Bag-u ti manughandug yi ti mansunug tunda tanan sa harandugan bilang handug pagsunugun. Kay hungaw tunda pag handug sa panab-anan apuy makapasulung gid sa Panginuun.

¹⁴ Nu manuk ti ihandug usa ka tawu bilang handug pagsunugun para sa Panginuun, kailangan kalampati inda ngatay kurkuru.

¹⁵ Darahun inda manughandug sa harandugan, piritun niya kay liug tugka sa maplud kay ulu, ag patiktikun kay dugu sa sangput harandugan. Bag-u sunugun kay ulu sa harandugan.

¹⁶ Pagkatapus, bul-un niya kay pikpikun hanggan tanan kay kinaun, ag iyamut sa butlakan baliwa harandugan nu naan ti rayamtan dapug.

¹⁷ Buk-un niya ti manuk sa panab-anan paglanit kay pakpak, dapat balaw niya utasun kay pakpak. Bag-u sunugun niya ti manuk sa harandugan bilang handug pagsunugun. Kay hungaw tunda pag handug sa panab-anan apuy makapasulung gid sa Panginuun.