Kulusas 4 - Hanunuu

¹ Kamu pag manga amu, pagkaayad-ayad waydi sa kanyu manga panawuhun, danga pag-apiapiha. Alalahana waydi niyu, kamu hanggan may amu sa langit.

Manga Bilin

² Danga magsuku kamu sa magdarangin. Pangungud kamu sa darangin pag may pasalamat.

³ Kada kamu magdarangin, idarangin diman niyu kami hampay pakan-an kami Panginuun rugar sa makatudlu kay Bagaw ag hampay maipakilala ti madalum pag katutuuhanan ni Kiristu. Dahil sa kang magtudlu nakan aku pinirisu taynguna.

⁴ Idarangin niyu aku hampay maipakilala niku tunda pag katutuuhanan sa malinaw gid pag tudlu hampay maintindihan manga tawu.

⁵ Pagmadunung kamu sa kanyu pakiusa sa manga unman may sarig sa kan Kiristu. Danga ipalawuy niyu nu may rugar tumultul sa kanda.

⁶ Pawilyun niyu ti manga tawu sa kanyu harampangan. Adalan niyu kaayad nu kabitay masagut niyu ti kada usa sa kanda nu may paingana.

Ti Pangatapusan pag Kamusta

⁷ Si Tikiku kanta pagmahalun pag patar-ari ag matinupadun pag suruguun. Parihu diman ga kanmi siya panawuhun waydi sa buruwatun Panginuun. Siya ti bumarita sa kanyu sa tanan magpangyari tungkul sa kangku.

⁸ Sinugu niku siya asan tag sa kanyu hampay masulung maan kanyu naisipan nu maalaman niyu kanmi kahamtangan.

⁹ Kay kaibahan si Unisimu, kanta matinupadun ag pagmahalun pag patar-ari kasimanwa diman niyu. Sida ni Unisimu ni Tikiku ti bumarita sa kanyu tungkul sa tanan magpangyari sitay.

¹⁰ Pagkamustahun kamu ni Aristarku, parihu diman pinirisu kami. Pagkamustahun diman kamu ni Markus kay pinsan ni Birnabi. May bilin yi aku sa kanyu tungkul sa kan Markus, tanggapa niyu siya kaayad nu rumas-ug siya asan sa kanyu.

¹¹ Pagkamustahun diman kamu ni Huswi kay bansag si Hustu. Sida lang ti manga Hudiyu sitay magsarig sa kan Kiristu ti mag-awat mayad sa kangku sa magtudlu tungkul sa kay maghari Diyus. Pinasulung gid nida kang naisipan.

¹² Pagkamustahun diman kamu ni Ipapras kasimanwa diman niyu, panawuhun diman ni Kiristu Hisus. Pirmi siya magpangungud sa darangin hampay kamu parig-unun Diyus, unman may ikasabi ag lubus masurundun sa kagustuhan Diyus.

¹³ Maghiling gid aku sa kay magpakibudlay tungkul sa kanyu, tungkul sa manga mag-uli sa Laudisiya hanggan sa Hiirapulis.

¹⁴ Pagkamustahun diman kamu ni Dimas hanggan ni Lukas, kanta pagmahalun pag duktur.

¹⁵ Ipadakit duy niyu kang kamusta sa manga patar-ari sa Laudisiya hanggan sa kan Ninpas ag sa iglisya magtiripun sa kay balay niya.

¹⁶ Pagka nabasa niyu inda pag surat, ipabasa diman niyu sa iglisya sa Laudisiya. Basaha diman niyu kang surat tabug sa kanda.

¹⁷ Isabi niyu sa kan Arkipu magkun, “Pagpararguhan di niya ti buruwatun kay tinanggap ginan sa Panginuun.”

¹⁸ Aku si Pablu ti may surat inda pag kamusta. Alalahana di niyu aku sa pirisuhan. Pagsa kanyu ti papalad Diyus.