Kulusas 3 - Hanunuu

¹ Kamu binuhi uman kaibahan ni Kiristu. Nakan pagkaibgi niyu ti ihinanda Diyus sa kanyu ati sa langit, ati si Kiristu nakatukaw baliwa sa sikun Diyus nakapaminsan sa kay karampatan maghari.

² Isip-isipa gid niyu ti manga bagay sa langit, balaw manga bagay sa babaw daga.

³ Dahil namatay yi kamu, kanyu tutuu pag buhi nakatagu sa Diyus, kaibahan ni Kiristu.

⁴ Si Kiristu ti tutuu pag buhi. Nu miburayhaw siya aban, miburayhaw diman hanggan kamu kaibahan niya, miusa sa kadayawan niya.

Ti Daan ag ti Bag-u pag Buhi

⁵ Nakan kailangan matyun yi lang niyu ti kagustuhan niyu angay waya sa kalibutan, ti panguragin, ti manga mahalay, ti gamun sa kahalayan, ti daut pag manga hilig, ti mairibgun sa kasiyunan imaw diman ti usa ka kalasi panamba sa diyus-diyusan.

⁶ Dahil nu magbuwat katunda ti tawu, magkagalit ti Diyus sa kanda, sa kanda maglabag sa kay kagustuhan.

⁷ Kaybi di waya nangugali diman kamu sa katida pag kagustuhan angay sa kalibutan. Ati katpung kamu sakup waya sa kanyu daut pag kagustuhan.

⁸ Dapat kainda, patlikudi yi niyu ti tanan inda, ti galit, ti pusuk yi pag isug, ti magkutub daut. Iwasi yi gid niyu ti pagmuransa, ti mayagting pag baragawun.

⁹ Danga kamu magpuludilan sa usa kag sa usa, dahil linukas yi niyu ti daan pagkatawu hanggan ti daan pag manga ugali.

¹⁰ Isinlung yi niyu ti bag-u pagkatawu, kay linalang Diyus ag kay diman pagbag-uhun Diyus hampay amat-amat kamu lalu ga kay histuda niya ag hampay kang-ud udyi may kurang kanyu pagkilala sa kanya.

¹¹ Nakan ngani ud may naglain parihu lang una manga balaw Hudiyu una manga Hudiyu, una tinuri una balaw tinuri, una manga dayuhan, una manga tawu balaw ga kanta kay ugali, una manga panawuhun una bukun panawuhun. Sa kan Kiristu unman may naglain ti tanan tawu ag siya ti sa kanyu tanan.

¹² Kamu manga sakup sa Diyus, kay pinili niya kamu, kay yi gid pagmahalun. Nakan ngani kailangan kamu pagmaawaun, pagmayad kanyu nabubut-un, pagmapinakumbabaun, pagmabuut hanggan matiniisun.

¹³ Pagparasunaidan kamu. Nu may hinanakit kamu pagparatawadan sa usa kag sa usa. Pinatawad yi kamu Panginuun, nakan kamu pagpatawad diman waydi.

¹⁴ Lalu pagmalahalan kamu dahil imaw ti pinagkabugkus sa kanyu lubus pagkarausa.

¹⁵ Pagpasakup kamu kanyu tagipusuun sa kahusayan kay pakaun ni Kiristu. Kamu binutung Diyus sa inda pag kahusayan, hampay kamu magkabuu usa ka bilug. Kailangan kamu pagpasalamat sa Diyus.

¹⁶ Ti barita tungkul sa kan Kiristu kailangan kanyu ituduk sa kanyu tagipusuun. Pagbililinan kamu, pag-aladalan kamu pag may kang-ud pag kaalaman. Pagkanta kamu may tapil pagsamba hanggan magdayaw sa Diyus. Pagkanta kamu angay sa kay udyuk Ispiritu Banal. Ginan sa kanyu tagipusuun pagkanta kamu pagpasalamat sa Diyus.

¹⁷ Una hintay kanyu buwatun, una sa bagaw una sa buruwatun, buwata niyu ti tanan angay sa kanyu pakiusa sa Panginuun Hisus. Sa panab-anan diman niya pagpasalamat kamu sa Diyus Ama.

Pagmirinsanan Kamu angay sa Bag-u pag Buhi

¹⁸ Kamu pag manga babayi, pagpasakup kamu sa kanyu sadili asawa, dahil katida gid ti angay sa kanyu pagsarig sa Panginuun.

¹⁹ Kamu pag manga lalaki, pagmahala gid niyu kanyu sadili asawa, danga sida pag-unuunuha.

²⁰ Kamu pag manga anak, pagpirmi pagsunud sa kanyu manga gurang, dahil katida gid ti pagbayaun Panginuun.

²¹ Kamu kay manga ama, danga waydi subra kanyu mag-irang sa kanyu manga anak, barang manlubay ngap kanda naisipan.

²² Kamu pag manga panawuhun, pagpirmi pagsunud sa kanyu amu sitay sa babaw daga. Una may maghiling, una unman, pagtarabahu kamu balaw kuntay sa bayaun manga tawu, bagkus ngap pagtarabahu kamu dahil matinupadun kamu sa kanyu maggalang sa Panginuun.

²³ Una hintay kanyu buwatun, lubusan di ngap niyu kanyu kasipagan, bilang ga sa Panginuun diman kanyu pagsirbi, balaw lang sa tawu.

²⁴ Alam diman niyu pirimyuhan kamu Panginuun. Matanggap diman niyu aban ti ihinanda niya sa kay manga anak. Dahil si Kiristu ngani ti Panginuun ti kanyu pagsirbihan.

²⁵ Ti makasalanan bay parusahan Diyus angay sa kanda manga kasalanan, dahil ti Diyus balaw may pag-apihun.