Kulusas 2 - Hanunuu

¹ Gustu niku pagmaalaman niyu nu kabitay kay kadaka kang magmasigasid para sa kanyu, una sa manga taga Laudisiya hanggan sa tanan udwaya nakakit sa kangku.

² Nakan katida kang pagbuwatun hampay rumig-un kanda tagipusuun ag hampay sida paminsanun sa pagmahal. Nu katida may kang-ud sida pag-intindi sa katutuuhanan bag-u kilalan-un nida si Kiristu, imaw ti madalum pag katutuuhanan kaybi ginan udwaya ipinaburayhaw Diyus.

³ Sa kanya pag nakapundu ti lubus mahalaga pag kadunungan hanggan kaalaman.

⁴ Kang pagsabihun inda hampay una si unu balaw may pumatalang sa kanyu sa kanda manga hampang palingu.

⁵ Madi aku unman asan, balaw magkalimtan niku kamu, aku magbaya sa kanyu maayus pag ugali hanggan sa kanyu marig-un pag sarig sa kan Kiristu.

Ti Kang-ud pag Ugali sa kan Kiristu

⁶ Nagpasakup yi kamu sa kan Kiristu Hisus sa kanyu Panginuun, nakan pag-ugali kamu magpakiusa sa kanya.

⁷ Pagga may gamut tulusan kamu sa kanya ag isarig niyu kanyu buhi sa kanya. Pagpakarig-un kamu sa kanyu pagsarig angay sa itinudlu sa kanyu. Pagpirmi yi gid kamu pagpasalamat sa Diyus.

⁸ Pag-aman kamu hampay balaw kamu madara kadunungan unman may kabuluhan pinathaw lang tawu, manga pinangawat ginurang, manga ugali kalibutan. Tunda pag kadunungan balaw ginan sa kan Kiristu.

⁹ Dahil pagka nabilug tawu si Kiristu, sa kanya diman ti kalubusan Diyus.

¹⁰ Sa kanyu magpakiusa sa kan Kiristu kang-ud diman hanggan kamu. Sakup diman niya ti tanan kapangyarihan una sa langit, una sa babaw daga.

¹¹ Dahil sa kanyu pakiusa sa kan Kiristu, ga tinuri yi kamu, balaw sa kanyu bilug pag tinuri nu unman dahil kamu irinibri sa daut kagustuhan niyu sadili pagkatawu. Inda ti ga tinuri ginan sa kan Kiristu.

¹² Pagka itinulbaw kamu, ilinbung kamu kaibahan ni Kiristu. Bag-u nabuhi maan uman niya dahil sa kanyu pagsarig sa makamaskihan buwat Diyus, imaw ti nagbuhi uman sa kan Kiristu.

¹³ Kamu pag manga balaw Hudiyu, daan ga tigbak kamu sa kanyu tagipusuun dahil sa kanyu kasalanan ag dahil kamu balaw sakup sa Kasuguan, dapat binuhi uman kamu Diyus kaibahan ni Kiristu. Pinatawad yi kita sa kanta tanan pag manga kasalanan.

¹⁴ Pinaiwdan niya kabuluhan ti tanan kasuratan laban sa kanta. Udyi kita may pag-isipun kapanagutan siti. Dinura Diyus tunda pag manga kasuratan pagka imininsan sa kan Kiristu sa kay napaku sa kurus.

¹⁵ Sa panab-anan niya kamatayan sa kurus, dinaug ni Kiristu ti tanan may kamaskihan hanggan kapangyarihan sa kalibutan, ipinakakit niya sa kayamuan tawu kay nanalu sa kanda.

¹⁶ Nakan ngani danga yi gid magpasakup kamu sa kanda manga tun-anun tungkul sa manga karan-unun hanggan irinmun, tungkul sa manga kapistahan, tungkul sa manga lapus lati hanggan Sirang Pamahari.

¹⁷ Inda ga manga aninu lang tungkul sa manga bagay rumas-ug aban dapat si Kiristu ngani ti tutuu.

¹⁸ Danga kamu maniwala hampay kanyu pirimyu unman madura sa kanyu. Dahil may manga tawu gustu nida pilitan kamu sa lagat-lagat unman maghandum karan-unun hanggan sa magsamba sa manga anghil. Magpalabi-labi sida sa kanyu dahil sa kanda nakitan ginan kunu sa Diyus. Dapat unman sida may ipadayaw-dayaw dahil kanda ugali naisipan parihu lang ga tanan tawu.

¹⁹ Nagbul-iw yi tunda pag manga tawu sa kan Kiristu, imaw ti ga ulu may kamaskihan sa buu bilug. Ginan sa kan Kiristu pag makatanggap ti bilug kabisugan hampay magkarausa ga may kaluas-luasan may manga kusug. Si Kiristu diman ti manug-alaga hanggan ti magpadaka angay sa kay kagustuhan Diyus.

Ti Bag-u pag Buhi sa kan Kiristu

²⁰ Namatay yi kamu kaibahan ni Kiristu, udyi kamu sirung kapangyarihan kadautan maghari sa kalibutan? Hayga kamu mag-ugali waya ga manga taga kalibutan waya? Hayga kamu magpaniwala sa manga tun-anun magkun,

²¹ “Danga maggaraw tida, danga pagsamiti, danga mag-igpil?”

²² Inda manga sugu pag-itudlu lang manga tawu tungkul sa manga bagay udyi mahalaga pagka kinaun yi.

²³ Nu sa ungud tunda pag manga turun-anun hanggan manga bilin ga anyu angay sa kadunungan, lalu tunda pag manga bilin tungkul sa pagsamba sa manga anghil ag tunda ngani tungkul sa magpanaguabi magpakumbaba ag tungkul sa magpakuri sa sadili bilug. Dapat tunda tanan unman waydi makaampara sa subra daut pag kagustuhan nida sadili pagkatawu.