Kulusas 1 - Hanunuu

¹ Inda ti may surat si Pablu, dapat kanta patar-ari si Timutiyu magkamusta diman waydi sa kanyu. Aku ti kinaibgan Diyus hampay apustul ni Kiristu Hisus.

² Inda pag surat tabug sa manga banal mag-uli sa Kulusas, sa manga matinupadun pag patar-ari sa kan Kiristu. Pagsa kanyu ti papalad hanggan ti kahusayan ginan sa kanta Diyus Ama.

Manga Pasalamat sa Diyus

³ Pirmi kami magpasalamat sa Diyus, sa Ama nita Panginuun Hisu-Kiristu sa kada nimi magdarangin sa kanyu.

⁴ Dahil naalaman nimi ti tungkul sa kanyu pagsarig sa kan Kiristu Hisus hanggan sa kanyu pagmahal sa tanan manga nasakupan Diyus.

⁵ Dahil may pag-asa kamu makarubtan niyu ti manga inalistu para sa kanyu ati sa langit. Nasalman yi niyu ti tungkul sa pag-asahan niyu inda pagka itinudlu sa kanyu ti tutuu pag barita Diyus, imaw ti Mayad pag Barita.

⁶ Inda pag Mayad pag Barita linmantap sa buu kalibutan ag magdara papalad parihu diman sa nangyari sa kanyu pagka nadnugan niyu ag nasalman niyu ti katutuuhanan tungkul sa kay mayad pag nabubut-un Diyus.

⁷ Inda inadalan niyu ginan sa kan Ipapras, imaw ti matinupadun pag suruguun ni Kiristu. Parihu diman ga kanmi siya panawuhun waydi sa buruwatun, kanmi pinagkaginhawa sa kanyu.

⁸ Ginan sa kan Ipapras pag naalaman nimi tungkul sa pagmahal kay ipinakaun Ispiritu sa kanyu.

⁹ Nakan ngani pagka naalaman nimi inda, pirmi nimi pag-idarangin kamu sa Diyus hampay ilubus niya sa kanyu ti kang-ud pag kadunungan kay pakaun Ispiritu, hampay lalu niyu maintindihan kay kagustuhan Diyus.

¹⁰ Nu katunda, makaugali kamu angay sa Panginuun hampay kay pagbayaun, abunda sa mayad buwat ag dumaka kanyu pagkilala sa Diyus.

¹¹ Pag-idarangin diman nimi kamu hampay kay daka gid pag kamaskihan Diyus ti pumarig-un sa kanyu, hampay masulung di gid kamu mag-agwanta sa tanan kakurian,

¹² ag hampay kamu magbaya gid magpasalamat sa Diyus Ama, dahil binwat niya kamu kang-ud hampay may kahuray kamu sa kay kaharian hanggan karayawan, pinaminsan kamu sa manga nasakup sa kanya.

¹³ Irinibri niya kita ginan sa kapangyarihan kadudulman, ipinauli yi niya kita sa kaharian niya magmayadun pag Anak.

¹⁴ Dahil sa Anak, ipinatawad yi kanta manga kasalanan ag irinibri kita.

Pag-ipakilala si Kiristu hanggan kay Binwat

¹⁵ Sa kan Kiristu pag makilala ti Diyus, ti unman mag-akitan sa mata. Si Kiristu daan di Anak Diyus. Siya diman ti may kamaskihan sa tanan linalang.

¹⁶ Dahil ti tanan-tanan bagay una sa langit una sa babaw daga, ti manga mag-akitan hanggan ti unman mag-akitan, linalang Diyus sa panab-anan ni Kiristu, para diman sa kan Kiristu ti tanan tunda. Una ti manga anghil abwat kay katungkulan, ti manga magpamahala, ti manga naminunu, ti may manga kamaskihan sa langit hanggan sa babaw daga, kay diman linalang Diyus sa panab-anan ni Kiristu hampay ipasakup niya sa kan Kiristu.

¹⁷ Si Kiristu ti un-an sa tanan. Unman may kaayusan ti tanan manga bagay nu unman ginan lang sa kanya.

¹⁸ Siya ti pinagkaulu, ti iglisya kay pinagkabilug. Siya tigpakaun buhi sa iglisya. Siya ti panganay, daan di siya Anak Diyus. Siya ti un-an nabuhi uman hampay siya yi gid ti makamaskihan sa tanan.

¹⁹ Kay nagustuhan Diyus nu kabitay siya kay pagka-Diyus pagkatunda diman kay Anak.

²⁰ Minahal niya ti buu kalibutan hampay miusa maan sa kanya sa panab-anan niya Anak. Sa panab-anan dugu ni Kiristu ibinuhus sa kay namatay sa kurus, pinausa Diyus tag sa kay sadili ti tanan bagay linalang una sa langit, una sa bagaw daga.

²¹ Kumun diman kamu, kaybi kamu arayu sa Diyus, kanyu naisipan lunsay yi lang gid laban sa Diyus. Kanyu buwat pudu kadautan.

²² Dapat ay kamu pinausa Diyus tag sa kay sadili, dahil sa kay kamatayan ni Kiristu angay sa kay pagkatawu, hampay kamu ipaatubang sa Diyus ud may ikasabi, manga sakup yi sa Diyus, unman may kutub daut.

²³ Kailangan kamu pagmarig-un gid sa kanyu pagsarig sa Mayad pag Barita, danga pagpabay-ani niyu, barang maanggihut kamu ginan sa pag-asa kanyu tinanggap pagka nadnugan niyu ti Mayad pag Barita. Kay nagustuhan Diyus aku si Pablu hampay magsirbi sa Mayad pag Barita. Imaw diman pag Mayad pag Barita ti ipagpaliwanag sa tanan manga tawu.

Si Pablu Magsirbi sa Iglisya

²⁴ Magbaya aku sa kang mag-agwanta sa kang bilug taynguna alang-alang sa kanyu, dahil sa panab-anan niku kakurian inda pag-iparargu niku ti pag-agwantahun parihu ga kay inagwanta ni Kiristu para sa iglisya, sa kay pinagkabilug.

²⁵ Ikinatiwala Diyus sa kangku inda pag katungkulan alang-alang sa kanyu, nakan manugsirbi yi aku sa iglisya. Kang yi gid katungkulan hampay lubus kang pag-itudlu kay Bagaw Diyus sa kanyu.

²⁶ Imaw yi ti madalum pag katutuuhanan, kaybi di waya ginan sa kadugayan pag panahun unman waya nipaburayhaw niya sa manga linahi, dapat taynguna ipinaalam yi Diyus sa manga nasakup sa kanya.

²⁷ Kay gustu Diyus ipaalam sa kanda inda pag daka gid pag makadululaw pag katutuuhanan tungkul sa tanan nasyun tawu. Inda yi ngani ti madalum pag katutuuhanan, magkun, sa kanyu yi gid si Kiristu, nakan may pag-asa kamu miminsan sa Diyus ati sa kay kadayawan.

²⁸ Nakan ngani pag-itudlu nimi si Kiristu sa tanan tawu. Pagpaala-lahanan nimi sida, malinaw gid kanmi pagtudluan sida angay sa kanmi makakaya hampay mipaatubang nimi sa Diyus ti kada usa kang-ud ag unman may ikasabi dahil sa kanda magpakiusa sa kan Kiristu.

²⁹ Nakan purus yi gid aku sa kang magpakibudlay angay sa daka gid pag kamaskihan kay pakaun ni Kiristu sa kangku.