Karukuan 5 - Hanunuu

¹ Panginuun, alalahana duy nu hintay gid ti nangyari sa kanmi. Bantayi duy kanmi kauyaan.

² Kanmi manga daga hanggan manga balay bin-ul manga day-uhan.

³ Naulila kami, kanmi manga ina nagbaliw buranday.

⁴ Kailangan waya nimi bilihun ti danum kanmi pag-inmun hanggan ti kayu kanmi pamagba.

⁵ Pagpatarabahuun kami ga manga hayup pag singkawan. Unman gid kami pagpaharyun.

⁶ Napasakup kami sa manga taga Ihiptu hanggan sa taga Asirya hampay lang may karan-unun kami.

⁷ Nagsalan kanmi manga ginurang namatay yi taynguna, ag kami ti mag-agwanta dahil sa kanda kasalanan.

⁸ Pagpangunahan kami manga panawuhun, unman may rumibri sa kanmi ginan sa kanda manga kamang.

⁹ Sa kanmi maghanap karan-unun, niuli ngap sa kadamhakan kanmi buhi sa manga armadu pag manga tawu sa pangawakawaan.

¹⁰ Pagramigan kami dahil sa masyadu pag lun-us, kanmi bilug ga pugun kay kainit.

¹¹ Pinanlugus kanmi manga babayi hanggan kanmi manga daraga sa Hirusalim hanggan sa iba waya banwa Huda.

¹² Binitin may higut sa kamang kanmi manga takinan, unman iginalang kanmi manga ginurang.

¹³ Kanmi manga kalay-awan lalaki pagpilitun maggaling ga manga panawuhun, ti manga anak mag-iridusmug magpas-an mabuyat pag manga kayu.

¹⁴ Ti manga kagurangunan udyi magtukaw sa puwirtahan banwa agud makapaanyu, ti manga kalay-awan lalaki udyi magpatunug manga pamatunug.

¹⁵ Udyi kami may kabayaan. Bagkus mana magsayaw kami, magpanruku ngap kami.

¹⁶ Udyi kanmi kadayawan. Kaawaawa kami, dahil nagsalan kami.

¹⁷ Dahil siyun magkasaktan kanmi tagipusuun ag magpandulum kanmi pamantay.

¹⁸ Mapanglaw yi ti Bantud Hirusalim, pagpasyaran wadi inda manga talun idu.

¹⁹ Panginuun, humari kawu sa unman may katapusan. Kanmu paghari pumarargu hanggan waya aban.

²⁰ Hayga pirmi nimu kami pagkalimtan? Hayga pinabay-anan nimu kami dugay?

²¹ Panginuun, balikan kami sa kanmu ag bumalik kami. Balikan sa kanmi ti kanmi mayad pag kahamtangan kaybi.

²² Masyadu yi aw kanmu pangagalit sa kanmi ag ipinurya yi gid nimu kami?