Karukuan 4 - Hanunuu

^1-2 Ti manga nasakupan Hirusalim parihu sa lunsay gintu magpud-as ngatay sa mahalaga manga batu nagkarawayak sa manga karsada. Parihu sida kaybi sa mahalaga pag gintu, dapat kainda pagbaliwun sida ga manga anglit binuwat lang manug-anglit.

³ Una ti simarun idu magpasusu kanda manga anak, dapat kang nasakupan mapinabay-anun sa kanda manga anak parihu sa manuk ustrits pagpabay-anan lang nida kanda manga itlug sa mainit pag baras sa tigangan daga.

⁴ Dahil sa uwaw ti dila nida manga lapsag maghuput sa kanda manga ngarus. Maghagad ti manga anak karan-unun, dapat unman gid may magpakaun sa kanda.

⁵ Ti manga tawu magkaun kaybi masarap karan-unun, magpanhagad wadi taynguna karan-unun sa manga tawu sa manga karsada. Ti manga nagdaka manga mayaman, magpunpun wadi taynguna karan-unun sa rayamtan paruk.

⁶ Ti parusa sa kang manga kasimanwa subra waya kaysa parusa sa Suduma, kadaka lang pinapas Diyus unman gid may nangawat sa kanda.

⁷ Kaybi, ti manga takinan sa Hirusalim mayad kay bilug, mabisug, malinis parihu sa burak, malagti parihu sa gatas, ag may kadayawan parihu sa mahalaga pag manga batu.

⁸ Dapat taynguna mas mabiru waya sida sa uring, ag unman yi sida magkakilala sa manga karsada. Ga manga but-ul wadi sida manga sinaput lukub, ag ga layung kayu.

⁹ Mayad waya ti nagkaramatay sa girahan kaysa nagkaramatay sa lun-us. Amat-amat sida nagkaramatay sa lun-us dahil unman gid may karan-unun.

¹⁰ Pagka rinmas-ug ti kadamhakan sa kang manga kasimanwa, una ti maawaun pag manga ina tinama kanda sadili manga anak hampay kan-un dahil sa masyadu pag lun-us.

¹¹ Ipinasamit Panginuun kay buu pangagalit sa Hirusalim. Nakan inirub niya inda hanggan ti manga patakinan inda.

¹² Unman makapaniwala ti manga hari sa buu kalibutan ag kanda manga nasakupan kuntay makaslud ti manga kalaban sa manga puwirtahan Hirusalim.

¹³ Dapat nangyari inda dahil sa manga kasalanan nida manga purupita ag manga manughandug, nagmatay sa matadlung pag manga tawu.

¹⁴ Ag taynguna maggarapgap sida sa manga karsada parihu sa buta. Nabasa dugu kanda manga rutay, nakan unman may nagpanghas mangigpil sa kanda.

¹⁵ Pagringgitan sida manga tawu, “Pagpakarayu kamu! Manga mayagting kamu! Danga niyu kami paglabuta.” Nakan nagpalagiw sida ag una naan yi lang sida pag nasyun nag-atag; dapat unman gid may nagtanggap sa kanda.

¹⁶ Ti Panginuun ti nagwayak sa kanda, unman yi sida labutun Panginuun. Unman yi paggalangun ti manga manughandug ag takinan.

¹⁷ Magpandululum yi kanmi manga pamantay sa kaalagad awat nimi kakampi pag manga nasyun, dapat unman gid sida nangawat sa kanmi. Magtanud kami sa kanmi manga bantayaw sa pagras-ug manga nasyun unman diman makaribri sa kanmi.

¹⁸ Pagtandan manga kalaban kanmi manga kimut. Unman kami makalakaw sa manga dalan. Arani yi kanmi katapusan. Bililangun yi kanmi manga sirang.

¹⁹ Mas mabisug waya sa manga agila kanmi manga kalaban maglagas sa kanmi. Paglagsun nida kami tugka sa manga bantud. Ag una sa pangawakawaan kami ati diman sida mag-alagad sa pagdugma sa kanmi.

²⁰ Nadakup nida kanmi hari ti pinili Panginuun, ti pagsarigan nimi mangalaga sa kanmi laban sa manga kalaban pag nasyun.

²¹ Sigi, pagbaya kamu ag pagmasulung, kamu pag manga nasakupan Idum mag-uli sa daga Us. Dapat ipainum diman sa kanyu ti ungut parusa Panginuun, bag-u malangu kamu ag maubahan.

²² Manga nasakupan Hirusalim, matapus yi kanyu parusa. Arani yi kamu ipauli Panginuun ginan sa pagkabihag. Dapat kamu pag nasakupan Idum parusahan Panginuun dahil sa kanyu manga kasalanan ag itultul niya kanyu kadautan.