Karukuan 3 - Hanunuu

¹ Usa aku ti nakalakaw parusa Panginuun dahil sa kay pangagalit.

² Tinabug niya aku pakarayu ag pinalakaw sa dulum balaw sa marayaw.

³ Pinarusahan niya aku unman may apas sirang yabi.

⁴ Pinalumuy niya kang buu bilug, ag binari kang manga but-ul.

⁵ Dinugma niya aku ag masyadu kang karukuan ag kakurian.

⁶ Ipinatahan niya aku sa kadudulman parihu sa dugay yi pag namatay.

⁷ Tinarikadahan niya aku ag sinangput alad batu hampay balaw aku makapalagiw.

⁸ Una manhagad waya awat aku, unman niya aku pagpatingihan.

⁹ Hinarangan niya tumpuk manga batu kang lakawan, ag pinaliku-liku niya kang paglakawan.

¹⁰ Parihu siya sa usu ngatay liyun magpatagu ag mag-alagad tukbun aku.

¹¹ Ginuyud niya aku pakarayu sa lalakawan, bag-u ginutay-gutay ag pinabay-anan.

¹² Linabtung niya kay pamana ag ipinatuyang sa kangku.

¹³ Pinana niya aku ag linmapus gid sa kang tagipusuun.

¹⁴ Nagbaliw karasarin-an aku niku manga kasimanwa. Pagpuyaan nida aku sa buu sirang sa panab-anan pagkanta.

¹⁵ Pasay lang kakurian ti ipinakaun niya sa kangku.

¹⁶ Nagkarapanghal kang manga ngipun dahil pinakaun niya aku manga dariit pagbatu, bag-u tinatatataan niya aku sa daga.

¹⁷ Bin-ul niya sa kangku ti mayad pag kahamtangan, ag unman yi niku magkalakawan ti kaabundahan.

¹⁸ Nadura yi kang kadayawan ag ti tanan niku pag-sarigan sa Panginuun.

¹⁹ Mapait isipun kang pag-agwanta ag pag patalang-talang.

²⁰ Nu isipun niku inda pirmi, magpanlumuy aku.

²¹ Dapat magbalik kang pag-asa nu magkaisipan niku

²² ti pagmahal ag pangaawa Panginuun unman may katugkaan. Imaw tunda nakan unman kita napapas lubus.

²³ Matutum gid ti Panginuun. Pag-ipakakit niya kay pangaawa kada sirang.

²⁴ Magsabi aku sa kang sadili, “Ti Panginuun imaw ti tanan sa kangku, nakan magsarig aku sa kanya.”

²⁵ Ti Panginuun mayad sa manga magsarig ag magdangup sa kanya.

²⁶ Mayad ti mag-alagad kita may pag-agwanta sa pagribri Panginuun sa kanta.

²⁷ Mayad para sa usa ka tawu una anak waya madunung yi magsunud.

²⁸ Nu pagbunggudun kita Panginuun pagtukaw kita ka usa-usa ag pag-isip-isip.

²⁹ Pagpakumbaba kita sa kanta sadili sa atubangan Panginuun ag danga maduraan pag-asa.

³⁰ Nu may manampal sa kanmu, iatubang waya nimu kay baliw pingi. Ag tanggapa ti puya nimu manga kalaban.

³¹ Dahil ti Panginuun unman magbugya sa kanta una kapira.

³² Dapat una magpakaun siya kakurian, pag-ipakakit di maan niya kay pangaawa dahil sa kay daka pagmahal unman may katugkaan.

³³ Dahil unman siya magbaya sa pagpakuri ag pagsakit sa kanta.

^34-35 Unman gustu Kaabwat-abwatan pag Diyus puyaan ti manga pirisu ngatay pabay-anan ti karampatan tawu.

³⁶ Balaw magkaibug ti Panginuun balaw pakan-an katadlungan una si unu. Nakitan niya inda tanan pag bagay.

³⁷ Unman may manga bagay magpangyari nu unman kay pahintulutan Panginuun.

³⁸ Unman aw ti Kaabwat-abwatan pag Diyus ti mag-udyuk nu mangyari ti usa ka daut ngatay mayad pag bagay?

³⁹ Hayga magriklamu kita nu pagparusahan kita dahil sa kanta manga kasalanan?

⁴⁰ Dapat usisaun nita kanta pangabuhi ag bumalik sa Panginuun.

⁴¹ Bukasan nita kanta manga tagipusuun ag ipaabwat kanta manga kamang sa Diyus sa langit ag sabihun,

⁴² “Nagsalan kami ag naglaban ag unman nimu kami pagpatawadun.

⁴³ Nagalit kawu ag inunu-unu nimu kami ag pinanmatay unman may awa.

⁴⁴ Namatakip kawu rurum, hampay unman nimu masaydan kanmi darangin.

⁴⁵ Binwat nimu kami ga paruk mayagting sa pamantay iba manga nasyun.

⁴⁶ Pagpuyaan kami tanan nimi kalaban.

⁴⁷ Nag-agwanta kami sa kadalaan, kadilikaduhan, kadautan, ag kadamhakan.”

⁴⁸ Magbulus kang manga luwa dahil nidamhak kang manga kasimanwa.

⁴⁹ Parargu magbulus kang luwa

⁵⁰ tugka sa usdungan kita Panginuun ginan sa langit.

⁵¹ Masyadu gid aku nabyatan sa nalakawan manga babayi sa kanmi banwa.

⁵² Ga parihu aku sa manuk linagas niku manga kalaban una unman aku may nabwat salan sa kanda.

⁵³ Sinubukan nida aku matyun sa panab-anan paglagpak sa kangku sa ukang ag pagbintuk sa kangku.

⁵⁴ Ga malimus aku sa danum, ag kang isip mamatay yi aku.

⁵⁵ Ginan sa kaabasad-basadan ukang magtawag aku sa kanmu, Panginuun.

⁵⁶ Pinatingihan nimu kang magpaawa-awa ag maghagad awat.

⁵⁷ Nagras-ug kawu pagka magtawag aku sa kanmu, ag magsabi kawu danga aku magkadala.

⁵⁸ Panginuun, inawatan nimu aku sa kang kasaba ag irinibri nimu kang buhi.

⁵⁹ Nakitan nimu, Panginuun, ti kadautan binuwat sa kangku niku manga kalaban, nakan pakan-i aku katadlungan.

⁶⁰ Alam nimu nu kabitay kanda magbalus sa kangku ag ti tanan nida manga gayak laban sa kangku.

⁶¹ Panginuun, nadnugan nimu ti pamuya nida sa kangku. Alam nimu ti tanan nida gayak laban sa kangku,

⁶² ti manga gayak daut nida paghampangan buu sirang laban sa kangku.

⁶³ Bantayi sida! Pagpuyaan nida aku sa panab-anan kanta, matukawan sida ngatay matindugan.

⁶⁴ Balusi sida, Panginuun, angay sa kanda binuwat.

⁶⁵ Paganita kanda tagipusuun ag saadi sida.

⁶⁶ Lagsa sida ag rurisa sa kanmu pangagalit hampay madura sida sa kalibutan.