Karukuan 2 - Hanunuu

¹ Sa pangagalit Panginuun tinakluban niya madamul pag rurum ti Hirusalim. Pinabul-an niya halaga ti karinuan Israil bilang ga iyinamut niya sa daga ginan sa langit. Dahil sa kay pangagalit pinabay-anan niya una kay Balay.

² Dinaut niya unman may awa ti tanan manga balay sa manga linahi ni Hakub. Sa kay pangagalit pinandaut niya ti manga may alad batu pag manga banwa sa Huda. Ipinatabu niya ag pinakay-a inda pag kaharian hanggan ti manga takinan siyun.

³ Sa masyadu niya pangagalit dinura niya ti tanan kapangyarihan sa Israil. Unman niya inda inawatan pagka dinugma kalaban. Parihu siya sa apuy mag-irub sa manga linahi ni Hakub ag sa tanan manga bagay sa kanda kalibut.

⁴ Ipinatuyang niya kay pamana sa kay nasakupan, ga kay kalaban. Pinanmatay niya ti tanan pagmahalun niya nasakupan. Ipinasamit niya kay masyadu pangagalit ga apuy sa manga nasakupan Hirusalim.

⁵ Dinaut Panginuun ti Israil parihu ga kalaban. Dinaut niya ti manga may alad batu pag manga banwa sa Israil ag ti tanan mapag-un pag bahagi siyun. Dinugangan waya gid niya ti karukuan ag lulumian sa Huda.

⁶ Dinaut niya kay Balay ga payag lang sa tanman. Ipinahintulut niya kalimtan nasakupan Hirusalim ti itinagka pag manga pista ag manga Sirang Pamahari. Sa kay masyadu pag pangagalit ipinurya niya ti hari hanggan ti manughandug.

⁷ Dinayu Panginuun kay harandugan hanggan kay Balay. Ipinadaut niya sa kamang kalaban ti alad batu Hirusalim. Nanhuruyawan ti kalaban sa Balay Panginuun ga mag-alaala sa kapistahan.

⁸ Ginayak Panginuun dautun ti alad batu sa sangput Hirusalim. Ginayak niya mayad ti pagdaut ag binuwat gid niya inda. Nakan nagkaradaut ti alad panangga hanggan ti alad batu.

⁹ Nidna sa daga ti manga puwirtahan banwa. Nagkaradaut ti alad dahil pinamari inda Panginuun. Pinamihag ti hari ag ti may kangaranan pag manga tawu sa Hirusalim. Unman yi pag-itudlu ti kasuguan. Ag unman yi may barita ti manga purupita ginan sa Panginuun.

¹⁰ Ti manga manugpamahala sa Hirusalim matukawan sa daga unman gid magbagaw. Pinaulian nida manga galbuk kanda manga ulu ag nanrutay sida saku magpakakit kanda karukuan. Ti kasupangan pag manga babayi sa Hirusalim mayungduan sa kay-a.

¹¹ Nagkarabaga kang manga mata sa lumi. Masakit kang mag-asaydan. Ga mabka kang dubdub dahil sa kadamhakan niku kasimanwa. Nagkaralipung sa manga karsada banwa ti manga anak hanggan ti manga lapsag.

¹² Maglulumian sida maghagad karan-unun ag irinmun sa kanda manga ina. Magkaralipung sida sa manga karsada daka pag banwa parihu sa manga sundalu nabiyagan. Ag amat-amat sida magkaramatay sa sapupwan nida ina.

¹³ Manga nasakupan Hirusalim, unu nguna ti masabi niku sa kanyu? Sa unu niku pag-ipaparihu kanyu kakurian? Kanyu biyag ga parihu sa dagat kay kaabasad. Kabitay niku kamu mapabisug? Si unu nguna ti pumaayad sa kanyu?

¹⁴ Ti manga barita niyu manga purupita bukun tutuu, unman may kabuluhan ag magpatalang sa kanyu. Unman nida itinultul kanmu kasalanan hampay balaw mana kawu mabihag.

¹⁵ Ti tanan maglawuy sa kanyu magpamalakpak, magsagutsut, ag mag-il-ilung sa puya sa Hirusalim. Magkun sida, “Imaw aw nguna inda ti daka pag banwa pag-ingarnan ‘Pinakamarinu’ ag ‘Kabayaan Buu Kalibutan?’ ”

¹⁶ Ti tanan niyu kalaban magpamuya sa kanyu. Magsagutsut sida bag-u pagpangarutun kanda ngipun ag magsabi, “Nadaut yi nita ti Hirusalim! Imaw yi inda ti sirang kanta pag-alagdun; ag taynguna nakitan gid nita!”

¹⁷ Binwat Panginuun kay ginayak buwatun. Tinupad gid niya kay pagsabihun kaybi. Ipinadamhak niya kamu unman may awa. Pinasulung niya kanyu kalaban sa kanyu kadamhakan ag pinahintulutan niya magpadayaw sida sa kanda kapangyarihan.

¹⁸ Manga nasakupan Hirusalim, pagtawag kamu sa Panginuun. Sirang yabi, pabulusan kanyu luwa, parihu sa sapa. Danga kamu mag-apas sa lumi.

¹⁹ Pagbangun kamu sa yabi ag paghagad awat sa Panginuun. Ipadnug ti tanan niyu kabuyatan sa kanya, ga sa magbulus kamu danum. Ipaabwat kanyu manga kamang sa darangin para sa buhi niyu manga anak magkalipung sa lun-us sa manga karsada.

²⁰ Panginuun, bantayi kami. Isip-isipa niyu nu si unu ti pinakurianan nimu parihu kainda. Sa masyadu pag lun-us, kinaun manga ina kanda manga anak kanda pag-alagaun. Ti manughandug hanggan purupita pinanmatay sa kanmu Balay.

²¹ Nagkarawayak sa manga karsada ti manga bangkay manga anak ag gurangun. Nagkaramatay sa girahan ti manga kalay-awan lalaki ag babayi. Pinanmatay nimu sida unman may awa dahil sa kanmu pangagalit.

²² Binan-awan nimu ti kalaban sa pagsalakay sa kang sangput bilang nagban-aw lang karan-an. Sa sirang ipinakakit nimu kanmu pangagalit, unman gid may nakapalagiw ngatay nabuhi. Pinanmatay niku kalaban kang manga anak pag-alagaan ag pinadaka.