Karukuan 1 - Hanunuu

¹ Mapanglaw yi ti banwa Hirusalim, sa kabag-u mayamu tawu. Bantug inda kaybi sa buu kalibutan, dapat kainda parihu sa usa ka babayi buranday. Sa kabag-u imaw inda ti magpanguna pag banwa, dapat taynguna panawuhun yi.

² Parihu siya sa babayi magpakalumi buu yabi; kay manga luwa magbulus sa kay uyahun. Unman gid una di usa sa kay manga aguman lalaki ti nagpasulung sa kanya. Dinaya siya niya tanan kakilala ag nagbaliw kalaban niya sida.

³ Pinakurianan ti Huda ag binihag kay nasakupan. Ati sida pag nangulian sa iba nasyun nu naan makuri kanda kahamtangan. Linagas sida nida manga kalaban tugka sa unman yi sida may mapalagiwan.

⁴ Ti manga lakawan atabug sa Hirusalim mapanglaw, dahil unman yi may magluwang mansamba sa itinagka pag manga pista. Mapanglaw ti tanan sabian inda. Ti manga manughandug mag-arunghung ag ti manga daraga magpanruku gid. Masyadu maruku ti Hirusalim.

⁵ Kay manga kalaban imaw yi ti nagpanguna sa Hirusalim, ag nag-abunda sida. Pinakurianan Panginuun ti Hirusalim dahil sa kay mayamu manga kadautan. Kay manga nasakupan binihag niya manga kalaban.

⁶ Nadura yi ti rinu Hirusalim. Kay manga takinan ga parihu sa magkalun-us karasyaw maghanap hararabun dapat unman sida may nakitan. Unman yi sida may bisug habang magpalagiw sida sa manga maglagas sa kanda.

⁷ Taynguna asan sa kakurian ti Hirusalim ag magkawatak-watak, naimatun-an niya ti tanan niya kasiyunan kaybi. Pagka niatag siya sa kamang niya manga kalaban, unman may nangawat sa kanya. Pagpuyaan siya ag pagkasarin-an niya manga kalaban sa kay pagkadamhak.

⁸ Daka gid ti kasalanan Hirusalim, nakan nagbaliw mayagting inda. Ti tanan magdayaw sa kanya kaybi magpuya yi sa kanya, dahil nakitan nida kay kauyaan. Mag-arunghung siya ag magpatlikud sa kay-a.

⁹ Nakitan tanan kay kayagtingan. Unman niya inisip kay ras-ugan. Madala gid kay pagkadamhak, ag unman gid may nangawat sa kanya. Nakan nagsabi siya, “Panginuun, bantayi kang kakurian, dahil natalu aku kalaban.”

¹⁰ Pinanbuul kalaban ti tanan niya kasiyunan. Nakitan niya sinmaka ti balaw Israilita sa Balay Diyus, manga tawu balaw pagpasnuan Panginuun sumaka sa Balay Diyus.

¹¹ Kay nasakupan mag-arunghung habang maghanap sida karan-unun. Ibinalyu nida sa karan-unun kanda kasiyunan hampay mabuhi lang sida. Magkun ti Hirusalim, “Panginuun, bantayi aku, dahil pagpakay-ahun aku.”

¹² Magkun diman siya sa manga tawu maglawuy, “Baliwala lang aw inda sa kanyu? Bantayi niyu nu may makitan kamu mag-agwanta parihu sa kangku. Inda pag aragwantahun ipinakaun Panginuun sa kangku katpung sa kay masyadu pangagalit.

¹³ Ginan sa langit nagpadara siya apuy ga sa nagsunug sa kang manga but-ul. Pinaulian niya suduk kang lakawan ag nasduk aku. Binwat niya aku maruku, mag-agwanta sa buu sirang.

¹⁴ Tinipun niya kang manga kasalanan ag ga binuwat higut. Ag inda ti nagguyud sa kangku sa pagkabihag. Parihu lang ga pinaulian aku singkaw sa liug. Pinalumuy aku Panginuun ag ipinakaun sa kang manga kalaban balaw niku makaya.

¹⁵ Dinayu Panginuun ti tanan niku manga sundalu. Nanipun siya manga sundalu sa pagpadamhak sa kang kalay-awan manga lalaki. Ti manga mag-uli sa Huda ga manga ubas ipinaslud sa gilingan ag tinatatataan Panginuun.

¹⁶ Nakan ngani magtiktik kang manga luwa sa pakalumi. Unman gid may magpabisug sa kangku una di. Kaawaawa ti nasakupan Hirusalim dahil tinalu sida kalaban.”

¹⁷ Nanhagad awat ti Hirusalim, dapat unman gid may nangawat sa kanya. Ipinahintulut Panginuun ti manga nasyun sa kalibut manga linahi ni Hakub bumaliw kanda kalaban. Baliwun nida mayagting ti Hirusalim sa kanda magbantay.

¹⁸ Magkun ti Hirusalim, “Matadlung ti Panginuun; dapat unman niku sinunud kay sugu. Kamu tanan pag nasakupan, pagpatingi kamu ag bantayi niyu kang kakurian. Binihag kang kalay-awan manga babayi ag lalaki.

¹⁹ Nanhagad aku awat sa kang manga kakampi dapat dinaya nida aku. Nagkaramatay kang manga manughandug hanggan manga paggurangunun sa banwa habang maghanap sida karan-unun hampay mabuhi lang sida.

²⁰ “Bantayi, Panginuun, nu kabitay kang karukuan! Masyadu gid kang mag-agwanta bilang ga pin-ga kang tagipusuun, dahil nagbaliw malinabagun aku sa kanmu. May magmaratyan sa kang manga sugkadan, ag una sa sulud balay may magkamatay.

²¹ Nadnugan manga tawu kang mag-arunghung, dapat unman gid may magpabisug sa kangku una di. Nadnugan tanan niku manga kalaban kang kakurian, ag nagbaya sida sa kanmu binuwat sa kangku. Mana rumas-ug yi ti sirang kanmu itinaratu parusahan nimu sida hampay bumaliw parihu diman sida sa kangku.

²² Bantayi kanda daut pagbuwatun, ag parusahi sida parihu sa parusa nimu sa kangku dahil sa tanan niku manga kadautan. Unman may apas kang mag-arunghung ag masakit kang mag-adnugan.”