Kanta ni Sulumun 8 - Hanunuu

¹ Nu kang patar-ari lang mana kawu pinasusu diman niku ina, arukan niku kawu una naan pag rugar ag unman may madulaw sa kangku.

² Daran-un niku kawu sa balay niku ina, ati tudluan nimu aku pagmahal. Painmun niku kawu mabanglu pag irinmun ginan sa kang manga pumigranata.

³ Kang ulu masangdayan sa kanmu wala pag kamang ag kanmu sikun mahagkungan sa kangku.

⁴ Kamu pag manga babayi sa Hirusalim, pagtaratu kamu balaw niyu pilitun ti pagmahal habang udwaya kay kang-ud pag kaudasan.

Ikan-um pag Kanta Manga Babayi sa Hirusalim

⁵ Si unu lugud inda ti magras-ug ginan sa pangawakawaan maslandigan sa kay aguman lalaki? Pinulaw niku kanmu tagipusuun sa sirung puun kayu mansanas, nu naan kawu pag-iinanak.

Babayi

⁶ Danga yi kawu magmahal iba nu unman sa kangku lang. Danga yi kawu maghagkung sa iba nu unman sa kangku lang. Dahil ti pagmahal parihu kay kapangyarihan sa kamatayan; ti mainit pag tagipusuun balaw maampara parihu sa pagras-ug kamatayan. Ti pagmahal parihu sa maglabdaban apuy.

⁷ Dayu pumsa una waya mayamu pag danum. Una bahaan waya, unman diman inda mapus-an. Unman inda mabili una ibayad waya tawu ti tanan niya pag kasiyunan.

Manga Patar-ari Lalaki Babayi

⁸ May patar-ari kami babayi, anak waya ag diit waya kay dubdub. Unu kanmi buwatun nu may maibug sa kanya?

⁹ Tugnaw man siya una unman, alagaan nimi siya.

Babayi

¹⁰ Tugnaw ngani aku, kang dubdub parihu sa manga bantayaw. Ag kang mahal, lubus masulung sa kangku.

¹¹ May ubasan si Sulumun sa Baal Hamun kay pagpaupahan sa manga manugtarabahu ati. Kada usa sa kanda magpakaun sa kan Sulumun 1,000 bilug pilak bilang kay bahagi ginan sa kay ubasan.

¹² Kawu ti bahala Sulumun, nu kanmu pag bahagi 1,000 bilug pilak ag ti bahagi manga manugtarabahu 200 bilug pilak. Dapat bahala di aku sa kangku pag sadili ubasan.

Lalaki

¹³ Mahal niku mapasyaran sa gardin, mayad waya kanmu manga kaibahan, mag-adnugan nida kanmu busis, padnugan diman sa kangku kanmu busis.

Babayi

¹⁴ Dali, abala kawu kang mahal. Palagiw kawu kabisug parihu sa anak karasyaw magluksu-luksu sa manga kabantudan punu manga tanum pagbuwatun pamanglu.