Kanta ni Sulumun 7 - Hanunuu

¹ Maangay pag babayi, pagkarinu kanmu manga lulud may lapak. Mayad gid kay histuda kanmu balangbang. Parihu inda sa manga alahas binwat anad pag manugbuwat.

² Kanmu pusud malidung ga basu punu masarap pag intus. Kanmu awak parihu sa binugkus tirigu sinangputan manga liryu.

³ Kanmu dubdub parihu sa kapid anak karasyaw.

⁴ Kanmu liug parihu sa bantayaw kinamhan sa bangkil ilipanti. Kanmu manga mata parihu kalinaw sa pararigsan sa Hisbun, arani sa may puwirtahan Bat Rabim. Kanmu irung kay karinu parihu sa abwat balay Libanun maatubangan sa Damasku.

⁵ Kanmu ulu parihu karinu sa Bantud Karmilu. Kanmu buhuk parihu kay kintab sa hari panrutayun. Nagarya ti hari sa kay karinuan.

⁶ Pagkarinu kawu, kang aguman. Kawu maariwaya gid.

⁷ Kanmu tindug parihu sa kayu palma, ag kanmu dubdub parihu sa tumpuk burak inda.

⁸ Magkun aku, “Mandayik aku sa palma ag humiyaput sa kay manga burak.” Kanmu dubdub parihu sa tumpuk ubas ag kay hungaw nimu arup parihu sa mansanas.

⁹ Kanmu aruk matagsing waya kaysa pinakamayad pag intus. Inda pag intus magbulus amat-amat sa manga bibig ag ngipun niku mahal.

Babayi

¹⁰ Aku sa kanya lang ag aku lang kay paghandumun.

¹¹ Abala kawu mahal niku, atag kita sa padang ag ati kita maturug sa may manga busang hinna.

¹² Manurip kita mipulaw ag bantayan nita nu magbukul ag magbusang yi ti ubas. Bantayan diman nita nu magbusang yi ti pumigranata. Bag-u ati patutuuhanan niku kang pagmahal sa kanmu.

¹³ Ati nimu pag mahungaw ti mandragura, arani sa kanta sabian ti tanan marinu pag manga burak kayu, ti daan ag ti bag-u. Dahil ihinanda niku inda para sa kanmu, kang mahal.